ຂ່າວພາຍໃນກະຊວງ

ຜົນສຳເລັດຂອງບັ້ນຝຶກອົບຮົມຫຼັກສູດທິດສະດີການເມືອງ-ການປົກຄອງ ໄລຍະສັ້ນ 50 ວັນ, ຊຸດທີ XXI

ພິທີປິດຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 50 ວັນ ຊຸດທີ XXI ໃຫ້ແກ່ ພະນັກງານຫລັກ ແຫລ່ງ ຂອງ ກະຊວງໂຍທາທິການ ແລະ ຂົນສົ່ງ ​ໄດ້​ສຳເລັດການຝຶກອົບຮົມ ໃນວັນ​ທີ 04  ຕຸລາ 2018 ທີ່ສະຖາບັນ ຝຶກອົບຮົບ ໂຍທາທິການ ແລະ ຂົນສົ່ງ (ຫລັກ 19 ທ່າ​ນາ​ແລ້ງ) ​ໂດຍ​​ການເປັນປະທານ​ຂອງ ສະຫາຍ ວຽງສະຫວັດ ສີພັນດອນ, ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ເຂົ້າຮ່ວມມີບັນດາຄະນະກົມ, ຮອງກົມ ຂອງສະຖາບັນການເມືອງ ແລະ ການປົກຄອງແຫ່ງຊາດ, ສະຖາບັນຝຶກອົບຮົມ ຍທຂ, ກົມຈັດຕັ້ງ ແລະ ພະນັກງານ ກະຊວງ ຍທຂ, ຄູອາຈານ ແລະ ນັກສຳມະນາກອນ.

ການຝຶກອົມຮົມທິດສະດີການເມືອງ-ການປົກຄອງ ຊຸດທີ່ XXI ຈະໄດ້ເລີ່ມດຳເນີນການຝຶກ ແຕ່ວັນທີ 27 ກໍລະກົດ ແລະ ສໍາເລັດ ວັນທີ 04 ຕຸລາ 2018, ເຊີ່ງມີນັກສຳມະນາກອນເຂົ້າຮ່ວມທັງໝົດ 30 ສະຫາຍ, ຍິງ 11 ສະຫາຍ ແລະ ມີບັນດາອາຈານເຂົ້າຮ່ວມສິດສອນທັງໝົດແມ່ນມາຈາກສະຖາບັນການເມືອງ ແລະ ການປົກຄອງແຫ່ງຊາດ, ນອກ ຈາກນີ້ຍັງມີ​ບັນດາຄູຮັບເຊີນຈາກບັນດາກົມ, ກອງໃນກະຊວງ ຍທຂ, ກະຊວງປ້ອງກັນປະເທດ ແລະ ກະຊວງປ້ອງ ກັນຄວາມສະຫງົບ.

ການຝຶກອົບຮົມໃນຄັ້ງນີ້ ເນື້ອໃນຕົ້ນຕໍຂອງການຝຶກອົບຮົມແມ່ນບັນຫາພື້ນຖານທາງດ້ານຫຼັກມູນທິດສະດີມາກ-ເລນິນ, ທິດສະດີ ການບໍລິຫານ, ການປົກຄອງ ແລະ ແນວທາງນະໂຍບາຍການປ່ຽນແປງໃໝ່ຂອງພັກ ໂດຍໄດ້ແບ່ງອອກ ເປັນ 5 ກຸ່ມວິຊາຮຽນ ລວມທັງໝົດມີ 39 ບົດລະອຽດຄື: ພາກທີ່ I ພາກປັດສະຍາ ປະກອບມີບົດຮຽນ 8 ບົດ; ພາກທີ່ II ພາກເສດຖະກິດການເມືອງ ປະກອບມີບົດຮຽນ 10 ບົດ; ພາກທີ່ III ພາກລັດທິສັງຄົມນິຍົມວິທະຍາສາດ ປະກອບມີບົດຮຽນ 8 ບົດ; ພາກທີ່ IV ພາກບໍລິຫານສາດ ປະກອບມີບົດຮຽນ 8 ບົດ ​ແລະ ພາກທີ່ V ພາກກໍ່ສ້າງພັກ ປະກອບມີບົດຮຽນ 5 ບົດ. ຊຶ່ງ​ການ​ຮຽນ​ການ​ສອນ​ແມ່ນໄດ້ມີການ ແຕ່ງຕັ້ງຄະນະບໍລິຫານຫຼັກສູດເພື່ອຊີ້ນຳ, ຄະນະປະສານງານລະຫວ່າງສອງສະຖາບັນ ​ແລະ ນັກ​ສຳ​ມະ​ນາກ​ອນຍັງໄດ້ແຕ່ງຕັ້ງຄະນະຫ້ອງ, ຄະນະໜ່ວຍ ແລະ ໜ່ວຍງານຕ່າງໆ ເພື່ອຮັບປະກັນການສ່ອງແສງລາຍງານ ແລະ ການເຄື່ອນໄຫວກິດຈະກຳໃຫ້ເປັນປົກກະຕິ, ຄ່ຽງຄູ່ກັບ ການຂື້ນຫ້ອງຮຽນ, ຄົ້ນຄວ້າຮ່ຳຮຽນ. ນັກສຳມະນາກອນ ກໍ່ຍັງໄດ້ມີການເຄື່ອນໄຫວ ວຽກງານຕ່າງໆ ເຊັ່ນ: ໄປຢ້ຽມຍາມຊົມ ຫໍພິພິທະພັນ ປະທານສຸພານຸວົງ;   ຫໍພິພິທະພັນ ກຳລັງປ້ອງກັນຄວາມສະຫງົບ ແລະ ຫໍພິພິທະພັນ ປະທານ ໄກສອນ ພົມ ວິຫານ.

ນອກຈາກນັ້ນ ນັກສໍາມະນາກອນໃນຊຸດນີ້ ກໍຍັງໄດ້ມີໂອກາດໄປຢ້ຽມສະຖາບັນການເມືອງ ແລະ ການປົກຄອງ ແຫ່ງຊາດ ຢູ່ທ່າງອນ, ໄດ້ຂື້ນຫ້ອງຮັບຟັງການບັນຍາຍກ່ຽວກັບປະຫວັດຄວາມເປັນມາ,  ສະພາບ ການຈັດຕັ້ງ ແລະ ການເຄື່ອນໄຫວທາງດ້ານວິຊາສະເພາະ ຂອງສະຖາບັນດັ່ງກ່າວ.

ຜ່ານການຮ່ໍ່າຮຽນ ແລະ ພຶດຕິກໍາຕົວຈິງ ​ເຫັນ​ວ່າ​ນັກ​ສຳ​ມະ​ນາກ​ອນສາມາດ​ຮັບ​ຮູ້​​ໄດ້​ບັນຫາ​ພື້ນຖານ ຂອງ​ທິດ​ສະ​ດີ​ມາກ-​ເລ​ນິນ ​ໃນ​ເງື່ອ​ນໄຂ​ໃໝ່​ຢ່າງ​ເປັນ​ລະບົບ ​ແລະ ເຂົ້າໃຈແຈ້ງກວ່າເກົ່າ ເປັນຕົ້ນແມ່ນວິທີ ສັດຈະວິພາກວັດຖຸນິຍົມ,​ ບັນດາຄູ່ມືມາດຕາເກນ ແລະ ກົດເກນພື້ນຖານຈຳນວນໜຶ່ງ, ທິດສະດີວ່າດ້ວຍ ຮູບຖານເສດຖະກິດສັງຄົມ, ບັນດາ ຫຼັກມູນພື້ນຖານທາງດ້ານທິດສະດີເສດຖະສາດການເມືອງຂອງມາກ, ແນວທາງເສດຖະກິດ ແລະ ນະໂຍບາຍສັງຄົມ ຂອງພັກ, ທິດສະດີກໍ່ສ້າງພັກແບບໃໝ່ຂອງເລນິນ; ນອກ ຈາກ​ນັ້ນ, ນັກ​ສຳ​ມະ​ນາກ​ອນຍັງ​ກຳ​ໄດ້​ກ່ຽວ​ກັບ ບົດບາດ ການນຳພາຂອງພັກ ແລະ ການຄຸ້ມຄອງຂອງລັດ ຕໍ່ກົນໄກເສດຖະກິດການຕະຫຼາດ, ການພົວພັນເສດຖະກິດກັບຕ່າງ ປະເທດ ແລະ ການສູ້ຊົນເຮັດໃຫ້ປະ ເທດເຮົາຫຼຸດພົ້ນອອກຈາກຄວາມທຸກຍາກ; ພ້ອມກັນເຊື່ອມຊຶມຄືນໃໝ່ຕໍ່ແນວ ທາງປ່ຽນແປງໃໝ່ຂອງພັກຢ່າງຮອບດ້ານທີ່ມີຫຼັກການຂອງພັກ, ເປັນຕົ້ນແມ່ນຈຸດໝາຍເສັ້ນທາງກ້າວຂຶ້ນຂອງປະເທດ ເຮົາ, ຮັບຮູ້ບັນຫາແນວທາງເສດຖະກິດ ແລະ ນະໂຍບາຍສັງຄົມຈຳນວນໜຶ່ງທີ່ຈຳເປັນຂອງພັກເຮົາ; ສ້າງທັດສະນະ ຫຼັກໝັ້ນການເມືອງໃຫ້ມີຄວາມໜັກແໜ້ນຕື່ມອີກກ້າວໜຶ່ງ,ພ້ອມກັນນີ້ຍັງເປັນການຝຶກຝົນຫຼໍ່ຫຼອມຕົນເອງທາງດ້ານຄຸນສົມບັດ ສິນທຳປະຕິວັດ ເພີ່ມທະວີສະຕິລະວັງຕົວຕໍ່ກົນອຸບາຍຂອງສັດຕູ ແລະ ກຸ່ມຄົນບໍ່ດີ. ພ້ອມກັນນັ້ນຍັງເປັນການສ່ອງ ແສງ ໃຫ້ເຫັນດ້ານຕັ້ງໜ້າດ້ານຫຍໍ້ທໍ້ທີ່ເກີດຂຶ້ນໃນສັງຄົມ.

ທ່ານ ປອ. ບຸນຈັນ ສິນທະວົງ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ລົງຊີ້ນຳໃກ້ສິດການສ້ອມແປງຂົວຂ້າມນ້ຳເຊືອງ ແຂວງ ຫຼວງພະບາງ

ທ່ານ ປອ. ບຸນຈັນ ສິນທະວົງ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ລົງຊີ້ນຳໃກ້ສິດຮ່ວມກັບກົມຂົວທາງ ແລະ ພະແນກ ໂຍທາທິການ ແລະ ຂົນສົ່ງ ແຂວງ ຫຼວງພະບາງ ໃນການສ້ອມແປງຂົວຂ້າມນ້ຳເຊືອງ ແຂວງ ຫຼວງພະບາງ.

 

 

 

 

 

ກອງປະຊຸມຄະນະຊີ້ນຳໂຄງການ ແລະ ສະຫລຸບຜົນສຳເລັດ ຂອງໂຄງການນ້ຳປະປາ ແລະ ສຸຂາພິບານຕົວເມືອງນ້ອຍ

ໃນວັນທີ 25 ກັນຍາ 2018 ຢູ່ທີ່ສູນປະຊຸມ ICTC (ຫຼັກ 5) ໄດ້ເປີດກອງປະຊຸມຄະນະຊີ້ນຳໂຄງການ ແລະ ສະຫລຸບຜົນສຳເລັດ ຂອງໂຄງການນ້ຳປະປາ ແລະ ສຸຂາພິບານຕົວເມືອງນ້ອຍ, ໂດຍໃຫ້ກຽດເປັນປະທານຂອງທ່ານ ນາງ ວິໄລຄຳ ໂພສາລາດ, ຮອງລັດຖະມົນຕີ ກະຊວງ ຍທຂ, ມີບັນດາທ່ານ ຮອງເຈົ້າແຂວງ 10 ແຂວງ, ເຈົ້າເມືອງ 13 ເມືອງ, ບັນດາທ່ານຫົວໜ້າກົມ,ຮອງກົມ, ຫົວໜ້າພະແນກ, ເຈົ້າເມືອງ ແລະ ບັນດາພາກສ່ວນທີ່ກ່ຽວຂ້ອງ ເຂົ້າຮ່ວມ ກອງປະຊຸມດຳເນີນໄປແຕ່ວັນທີ 25-26 ເປັນເວລາ 2 ວັນ.

ໃນພິທີດັ່ງກ່າວ ທ່ານ ພົມມາ ແວວລາວັນ ຫົວໜ້າກົມນໍ້າປະປາ ໃຫ້ຮູ້ວ່າ: ຜົນສຳເລັດໃນການຈັດຕັ້ງປະຕິບັດໂຄງການມີດັ່ງນີ້: ສ້າງຄວາມເຂັ້ມແຂງໃຫ້ຂະ ແໜງການນ້ຳປະປາ ດ້ານການວາງແຜນ, ດ້ານການຄຸ້ມຄອງ ແລະ ປັບປຸງຂະແໜງການນ້ຳປະປາ,​ ເປົ້າໝາຍຍຸດທະສາດຂອງຂະແໜງການນ້ຳປະປາ ແລະ ຕົວເມືອງໄດ້ຖືກຮັບຮອງ (MPWT), ສຳເລັດການເຊັນຂໍ້ຕົກລົງການບໍລິການ ໄດ້ສ້າງຂຶ້ນລະຫວ່າງເຈົ້າແຂວງ ແລະ ບັນດາລັດວິສາຫະກິດນ້ຳປະປາ ແຂວງ ທີ່ມີຕົວເມືອງໂຄງການ, ສຳເລັດສັນຍາເງິນກູ້ຕໍ່ ໄດ້ເຊັນ ລະຫວ່າງ ກະຊວງການເງິນ ແລະ ບັນດາລັດວິສາຫະກິດນ້ຳປະປາແຂວງ ທີ່ມີຕົວເມືອງໂຄງການ, ສຳເລັດການສ້າງແຜນດຳເນີນທຸລະກິດ 3 ປີ ຕໍ່ເນື່ອງ ໃຫ້ບັນດາລັດວິສາຫະກິດນ້ຳປະປາແຂວງ, ສຳເລັດການເຊັນຂໍ້ຕົກລົງໃນການຄຸ້ມຄອງສຸຂາພິບານ ໃນຂັ້ນເມືອງ ຢູ່ບັນດາຕົວເມືອງໂຄງການ, ສຳເລັດການຮ່າງຄູ່ມື ສະພາບໍລິຫານນ້ຳປະປາ ຮ່ວມກັບໂຄງການສ້າງຄວາມສາມາດໃຫ້ແກ່ຂະແໜງ ການນ້ຳປະປາ, ສຳເລັດການປັບປຸງລະບົບໃບບິນເກັບເງິນ ແລະ ບັນຊີເຊື່ອມຕໍ່ເຂົ້າກັນ ໄດ້ສຳເລັດການຕິດຕັ້ງທັງໝົດ 16 ລັດວິສາຫະກິດນ້ຳປະປາ, ເຊິ່ງໄດ້ເລີ່ມຕົ້ນຈັດຕັ້ງປະຕິບັດ ແລະ ຕິດຕາມໃນບັນດາລັດວິສາຫະກິດນ້ຳປະປາ, ໄດ້ປັບປຸງບັນດາລັດວິສາຫະກິດນ້ຳປະປາ, ທີ່ມີຕົວເມືອງໂຄງການ ໃຫ້ສາມາດກຸ້ມຈ່າຍຄ່າ ການດຳເນີນງານ ແລະ ບຳລຸງຮັກສາ ການບໍລິການໜີ້ ແລະ ເຮັດໃຫ້ຄ່າຫລຸຍຫ້ຽນ, ການປັບປຸງລາຄານ້ຳປະປາ ແມ່ນເຮັດ ຂະໜານກັບການລົງທຶນ ສຳລັບບັນດາລັດວິສາຫະກິດນ້ຳປະປາ ທີ່ມີຕົວເມືອງໂຄງການ, ລັດວິສາຫະກິດນ້ຳປະປາ ສ່ວນຫຼາຍແມ່ນມີໜີ້ຕ້ອງຮັບມູນຄ່າຕ່ຳ ກວ່າ 90 ວັນ ເຊິ່ງເປັນທີ່ຍອມຮັບໄດ້, ສືບຕໍ່ເນາະນຳກ່ຽວກັບນະໂຍບາຍ ຕໍ່ນ້ຳເຂົ້າບ້ານໂດຍບໍ່ເສຍເງິນ ໂດຍມີການປັບປຸງລະບົບສຸຂາພິບານໃນຄົວເຮືອນ ໄປພ້ອມໆກັນ.

ການພັດທະນາຂະແໜງນ້ຳປະປາ ປັບປຸງ 4 ເມືອງ ແລະ ກໍ່ສ້າງໃໝ່ເກົ້າຕົວເມືອງ ແລະ ເຮັດບົດສຶກສາຄວາມເປັນໄປໄດ້ອີກ 2 ຕົວເມືອງ ມີປະຊາຊົນ ທີ່ອາໃສໃນຕົວເມືອງ ແລະ ອ້ອມຂ້າງໄດ້ຮັບຜົນປະໂຫຍດ156.150 ຄົນ ຈາກ 13 ຕົວເມືອງ 10 ແຂວງ.

ໃນພິທິ ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ ໄດ້ກ່າວວ່າ: ນໍ້າແມ່ນປັດໃຈໜຶ່ງທີ່ຈໍາເປັນ ເພື່ອຍົກລະດັບຄຸນນະພາບ ຊີວິດການ ເປັນຢູ່ຂອງປະຊາຊົນໃຫ້ດີຂຶ້ນ ການຊົມໃຊ້ນໍ້າປະປາໃນຕົວເມືອງ ແລະ ຊົນລະບົດຍັງແມ່ນຕົວຊີ້ບອກ ພື້ນຖານໃນການພັດທະນາ ເສດຖະກິດ-ສັງຄົມ ໃນແຕ່ລະໄລຍະ ສະນັ້ນ ລັດຖະບານຈິ່ງໄດ້ເອົາໃຈໃສ່ຂະຫຍາຍ ໃນນໍ້າປະປາໃຫ້ທົ່ວເຖິງ ໃນຕົວເມືອງນ້ອຍ ແລະ ຊົນລະບົດໃນທົ່ວປະເທດ ເພື່ອສ້າງ ໃຫ້ກາຍ ເປັນຕົວເມືອງສົມບູນ ແບບທີ່ມີນໍ້າຊົມໃຊ້ຢ່າງທົ່ວເຖິງ

 

 

 

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

 

 

 

 

Additional information