ພິທີເຊັນສັນຍາ ຈົດໝາຍສະແດງເຈດຈຳນົງເພື່ອສືບຕໍ່ການຮ່ວມມື ປີ 2018-2020 ລະຫວ່າງ ກະຊວງ ໂຍທາທິການ ແລະ ຂົນສົ່ງ ສປປ ລາວ ແລະ ກະຊວງ ຂົນສົ່ງ ແລະ ໂຍທາທິການ ລັດແຟຼນເດີ ແຫ່ງຣາຊະອານະຈັກແບນຊິກ.

ໃນວັນວັນທີ 14 ພຶດສະພາ 2018 ຢູ່ທີ່ຫ້ອງປະຊຸມ ກົມໂຍທາທິການທາງນ້ຳ ໄດ້ມີພິທີເຊັນສັນຍາ ຈົດໝາຍສະແດງ ເຈດຈຳນົງເພື່ອສືບຕໍ່ການຮ່ວມມື ປີ 2018-2020 ລະຫວ່າງ ກະຊວງ ໂຍທາທິການ ແລະ ຂົນສົ່ງ ສປປ ລາວ ແລະ ກະຊວງ ຂົນສົ່ງ ແລະ ໂຍທາທິການ ລັດແຟຼນເດີ ແຫ່ງຣາຊະອານະຈັກແບນຊິກ ໃຫ້ກຽດເຂົ້າຮ່ວມນຳໂດຍ ທ່ານ ມັດ ສູນມາລາ ຜູ້ຊ່ວຍລັດຖະມົນຕີ, ທ່ານ ບົວຜັນ ເທດດາວັນ ຮອງຫົວໜ້າກົມໂຍທາທິການທາງນ້ຳ, ທ່ານ ຄຳຫຼ້າ ພົມ ມະວັນ ຮອງຫົວກົມ ແຜນການ ແລະ ການຮ່ວມມື, ທ່ານ ສິລິພອນ ອິນທິລາດ ຫົວໜ້າສະຖາບັນຝຶກອົບຮົມ ໂຍທາທິການ ແລະ ຂົນສົ່ງ, ທ່ານ ສົມພອນ ຫຼວງລາດ ຫົວໜ້າພະແນກຂົນສົ່ງທາງນ້ຳ, ທ່ານ ສຸກສະຫວັນ ທິທະວົງ ຜູ້ປະສານງານໂຄງການ ກົມໂຍທາທິການທາງນ້ຳ ແລະ ຄະນະຜູ້ແທນລັດແຟຼນເດີ ນຳໂດຍ Mr. Filip BOELAERT, Civ.Eng, Secretary General, Department of Mobility and Public Works, Government of Flanders, Chairman of the Delegation. Ms. Katrien Criel, Policy Officer Internationnal Affair, Department of Mobility and Public Works, Government of Flanders.

ກົມໂຍທາທິການທາງນໍ້າ ກະຊວງໂຍທາທິການ ແລະ ຂົນສົ່ງ ໄດ້ຈັດກອງປະຊຸມເຊັນ ສັນຍາຈົດໝາຍສະແດງເຈດ ຈໍານົງ ເພື່ອສືບຕໍ່ໂຄງການກໍ່ສ້າງທາງນໍ້າລາວ-ແຟຼນເດີ ໃນປີ 2018-2020 ລະຫວ່າງກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ແລະ ກະຊວງໂຍທາທິການ ແລະ ຂົນສົ່ງ ລັດແຟຼນເດີ ແຫ່ງຣາຊະອານະຈັກແບນຊິກ ລະຫວ່າງວັນ ທີ 13-14 ພຶດສະພາ 2018; ຝ່າຍລາວໂດຍທ່ານ ມັດ ສູນມາລາ ຜູ້ຊ່ວຍລັດຖະມົນຕີກະຊວງ ຍທຂ ພ້ອມດ້ວຍຄະນະ ແລະ ຝ່າຍຣາຊະອານາຈັກແບນຊິກໂດຍທ່ານ ຟີລິບ ໂບແລຼດ (Filip BOELAERT) ເລຂາທິ ການໃຫຍ່ ກະຊວງ ຍທຂ ລັດແຟຼນເດີ.

ທ່ານ ມັດ ສູນມາລາ ກ່າວວ່າ: ໂຄງການກໍ່ສ້າງທາງນ້ຳລາວ-ແຟຼນເດີ ເລີ່ມແຕ່ປີ 2001 ເຖິງປັດຈຸບັນ ຄື: ກະຊວງ ຍທຂ ແຫ່ງ ສປປ ລາວ ຈະຊ່ວຍບັນດາບໍລິສັດລັດແຟຼນເດີ ໂດຍອໍານວຍຄວາມສະດວກໃນການຮ່ວມມືຕາມຄວາມ ເໝາະສົມກັບບໍລິສັດລາວ, ມີການແລກປ່ຽນເອກະສານ ແລະ ການວາງສະແດງວັດຖຸອຸປະກອນກ່ຽວກັບ ການ ຂົນສົ່ງ ທາງນໍ້າ ແລະ ທ່າເຮືອ ເພື່ອສົ່ງເສີມໃຫ້ບໍລິສັດລາວ ແລະ ການຈັດຕັ້ງທັງສອງຝ່າຍ ສາມາດປະກອບສ່ວນຕາມໜ້າ ທີ່ສະເພາະ ໂດຍຜ່ານການສົ່ງເສີມດ້ານເຕັກໂນໂລຊີ ແລະ ຄວາມຮູ້ຂອງລັດແຟຼນເດີ, ການຮ່ວມມື ກັບຄູ່ຄ້າໃນ ສປປ ລາວ ພ້ອມທັງໂຄສະນາສິນຄ້າ ແລະ ເຕັກໂນໂລຊີ ຂອງລັດແຟຼນເດີ ໃຫ້ຮັບຮູ້ກ່ຽວກັບການປະມູນຈັດຊື້ລະດັບສາກົນ ທັງໝົດທີ່ກ່ຽວຂ້ອງກັບວິຊາສະເພາະທີ່ພົວພັນເຖິງບົດບັນທຶກສະບັບນີ້.

ການຈັດກອງປະຊຸມ, ນອກຈາກຈະສະໜອງທາງດ້ານເອກະສານ ແລະ ຂໍ້ມູນຂ່າວສານ ເພື່ອປະເມີນຄວາມເປັນ ໄປໄດ້ໃນການສ້າງຫຼັກສູດການຝຶກອົບຮົມພາຍໃຕ້ຫົວຂໍ້ ຄື: ຊ່ວຍເຫຼືອໃນການສ້າງຫຼັກສູດ ແລະ ຄູຝຶກສໍາລັບນາຍ ທ່າເຮືອ-ລູກເຮືອ ເພື່ອອອກໃບຢັ້ງຢືນຢ່າງຖືກຕ້ອງສອດຄ່ອງ ແລະ ການພັດທະນາຖານຂໍ້ມູນ ແລະ ເກັບກໍາຂໍ້ມູນ ທີ່ກ່ຽວຂ້ອງກັບສະຕິການຂົນສົ່ງ, ທ່າເຮືອ, ຕາຝັ່ງເຈື່ອນ ແລະ ການຄຸ້ມຄອງຄວາມສ່ຽງຕໍ່ໄພນໍ້າຖ້ວມ.

    

 

 ກວດແກ້ໂດຍ ທ່ານ ວຽງຄອນ ວົງຄຳຈັນ

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

 

 

 

 

 

 

 

 

Additional information