ພິທີປະກາດການລິເລີ່ມໂຄງການ ສຳລັບໂຄງການຂະຫຍາຍໂຄງລ່າງນ້ຳສະອາດ ແລະ ໂພສະນາການ (SUNWIP)

ໃນຕອນບ່າຍຂອງວັນທີ 25 ເມສາ 2018 ກົມນ້ຳປະປາ ໄດ້ຈັດພິທີປະກາດການລິເລີ່ມໂຄງການຂະຫຍາຍໂຄງລ່າງ ນ້ຳສະອາດ ຂຶ້ນຢູ່ທີ່ຫ້ອງປະຊຸມກົມຂົນສົ່ງ ກະຊວງ ຍທຂ ໂດຍການເປັນປະທານ ຂອງ ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ ແລະ ທ່ານ ລີໂອ ຟາເບີ, ເອກອັກຄະລັດຖະທູດຈາກສະຫະພາບເອີລົບ ມີທ່ານ ພົມມາ ແວວລາວັນ ຫົວໜ້າກົມນ້ຳປະປາ, ມີບັນດາທ່ານຫົວໜ້າກົມ, ທ່ານຮອງຫົວໜ້າກົມ ແລະ ພະນັກງານ ທັງສອງຝ່າຍເຂົ້າຮ່ວມຢ່າງພ້ອມພຽງ.

ຈຸດປະສົງຂອງໂຄງການ SUNWIP ແມ່ນເພື່ອປັບປຸງການເຂົ້າເຖິງນ້ຳທີ່ສະອາດ ແລະ ປອດໄພ ໃຫ້ແກ່ປະຊາຊົນ ຕະຫຼອດປີ ແລະ ການສົ່ງເສີມຄວາມຮູ້ການນຳໃຊ້ນ້ຳໃຫ້ຖືກສຸຂະອະນາໄມ ເເລະ ເພື່ອສຸຂະອະນາໄມທີ່ດີຂື້ນ, ຊື່ງສາມາດຫຼຸດຜ່ອນຜົນທະທົບ ເເລະ ປ້ອງການພະຍາດຖອກທ້ອງ ແລະ ເພີ່ມຜົນປະໂຫຍດໃຫ້ມີໂພສະນາການ ທີ່ດີຂື້ນ. ໂຄງການ ຈະ ສຸມໃສ່ 3 ໜ້າວຽກໃຫ່ຍ ຄື: 1) ການພັດທະນາໂຄງລ່າງພື້ນຖານ ກໍ່ຄືການສ້າງລະບົບ ນໍ້າປະປາຂະໜາດນ້ອຍທີ່ຮັບປະກັນ ການເຂົ້່າເຖິງນໍ້າທີ່ສະອາດ, ປອດໄພ ແລະ ມີພຽງພໍຕະຫຼອດປີ ໃຫ້ແກ່ບັນດາ ເມືອງທີ່ທຸກຍາກ, 2) ຈັດຕັ້ງປະຕິບັດກິດຈະກຳປູກຈິດສຳນຶກໃຫ້ແກ່ກຸ່ມບ້ານເປົ້າໝາຍ ແລະ ໄກ້ຄຽງ ເພື່ອສົ່ງເສີມ ການປ່ຽນແປງພືດຕິກຳດ້ານ ສຸຂະອະນາໄມ ແລະ ໂພສະນາການ ໃຫ້ດີຂື້ນ, 3) ການສ້າງຄວາມເຂັ້ມແຂງໃຫ້ແກ່ ໜ່ວຍງານຄຸ້ມຄອງ ແລະ ບຳລຸງຮັກສາລະບົບການນຳໃຊ້ນຳ້ ເຊັ່ນ ຫ້ອງການນໍ້າປະປາເມືອງທີ່ເປັນເປົ້າໝາຍ ຂອງໂຄງການລວມເຖິງໜ່ວຍງານຂັ້ນແຂວງ ແລະ ຂັ້ນສູນກາງ. ພ້ອມກັນນັ້ນໂຄງການ, ກໍ່ຍັງນອນຍູ່ໃນເເຜນການ ດຳເນີນງານ ຂອງເເຜນຍຸດທະສາດເເຫ່ງຊາດ ຂອງ ນໍ້າປະປາ ເເລະ ສຸຂະພິບານ ເເລະ ເເຜນຍຸດທະສາດໂພຊະນາ ການເເຫ່ງຊາດອີກດ້ວຍ.

ໃນພີທີດັ່ງກ່າວ ທ່ານ ນາງ ວິໄລຄຳ ໂພສະລາດ, ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ກໍ່ໄດ້ມີຄຳ ເຫັນກ່ຽວກັບໂຄງການ "ກະຊວງໂຍທາທິການ ແລະ ຂົນສົ່ງ ຜູ້ຈັດຕັ້ງປະຕິບັດໂຄງການ ໄດ້ຕາງໜ້າໃຫ້ລັດຖະບານ ສປປ ລາວ ສະແດງຄວາມຂອບອົກຂອບໃຈ ເເລະ ຊາບຊື້ງໃນການສະຫນັບສະຫນູນຢ່າງຫຼວງຫຼາຍຈາກສະຫະ ພາບເອີຣົບ ແລະ KfW. ໂຄງການນີ້ຈະມີຜົນປະໂຫຍດຢ່າງຫຼວງຫຼາຍຫາກໂຄງການນີ້ສາມາດຈັດຕັ້ງປະຕິບັດໄດ້ ສຳເລັດ ກໍຈະປະກອບສ່ວນ ໃຫ້ແກ່ປະຊາຊົນໃນເຂດຊົນນະບົດ ສາມາດເຂົ້າເຖີງນໍ້າສະອາດ ແລະ ສຸຂາອະນາໄມ ທີ່ດີ ຢ່າງຫນ້ອຍ 80,000 ຫາ 100,000 ຄົນ. ແລະ ຍັງເປັນການປະກອບສ່ວນໃນຄາດໝາຍສູ້ຊົນ ຂອງສປປ ລາວ ເພື່ອບັນລຸເປົ້າໝາຍການພັດທະນາແບບຍືນຍົງ SDG 6 ກໍ່ຄຶຮອດປີ 2030 ປະຊາຊົນທົ່ວປະເທດຕ້ອງໄດ້ນໍາໃຊ້ນໍ້າ ສະອາດ ໝາຍເຖີງນໍ້າປະປາທີ່ປອດໄພ ".

 

ກວດແກ້ໂດຍ ທ່ານ ແສງຈັນ ຫອມສີລາຮັກ

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

 

Additional information