ສັບປະດາແຫ່ງຊາດດ້ານຄວາມປອດໄພທາງຖະໜົນ ທີ່ນະຄອນຫຼວງວຽງຈັນ

ຄະນະ​ກຳມະການ​ແຫ່ງ​ຊາດ ດ້ານ​ຄວາມ​ປອດ​ໄພ​ທາງ​ຖະໜົນ,   ກະຊວງ ​ໂຍທາ​ທິການ ​ແລະ ຂົນ​ສົ່ງ ໄດ້ຈັດ​ງານສັບ ປະດາແຫ່ງຊາດດ້ານຄວາມ​ປອດ​ໄພ​ທາງ​ຖະໜົນ​ ຂຶ້ນໃນເວລາ 6:00 ໂມງ ​ຂອງ​ວັນ​ທີ 7 ເມສາ 2018 ທີ່​ສູນ​ການ​ຄ້າ ລາວ-​ໄອ​ເຕັກ, ນະຄອນຫຼວງ​ວຽງ​ຈັນ ​ໂດຍ​ການ​ເຂົ້າ​ຮ່ວມ​ຂອງ​ທ່ານ  ທ່ານ ປອ. ສິນລະວົງ ຄຸດໄພທູນ ກຳມະການ ກົມການເມືອງສູນກາງພັກ, ເລຂາຄະນະພັກ, ເຈົ້າຄອງນະຄອນຫຼວງວຽງຈັນ, ທ່ານ ປອ. ບຸນຈັນ ສິນທະວົງ ກຳມະ ການສູນກາງພັກ, ລັດຖະມົນຕີກະຊວງ ຍທຂ, ທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງ ຍທຂ, ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີກະຊວງ ຍທຂ, ທ່ານ ວຽງສະຫວັດ ສີພັນດອນ ຮອງລັດຖະມົນ ຕີກະຊວງ ຍທຂ, ຜູ້ຕາງໜ້າຄະນະ​ກຳມະການ​ແຫ່ງ​ຊາດ ດ້ານ​ຄວາມ​ປອດ​ໄພ​ທາງ​ຖະໜົນ, ກະຊວງ ປ້ອງ​ກັນ​ຄວາມ​ສະຫງົບ ​ໂດຍສະ​ເພາະ​ພະ​ແນ​ກຕຳຫຼວດ​ຈາລະ​ຈອນ​ນະຄອນຫຼວງ​ວຽງ​ຈັນ, ອົງການ​ຈັດ​ຕັ້ງ​ສາກົນ, ຕາງໜ້າ​ຈາກມະ ຫາວິທະຍາ​ໄລ, ນ້ອງ​ນັກ​ຈາກໂຮງຮຽນ​ມັດທະຍົມ ​ແລະ ຈາກພາກສ່ວນ​ກ່ຽວຂ້ອງ​ເຂົ້າ​ຮ່ວມ​ທັງ​ໝົດປະມານ 800 ຄົນ .

 ໃນ​ການຈັດ​ງານສັບປະດາແຫ່ງຊາດດ້ານຄວາມ​ປອດ​ໄພ​ທາງ​ຖະໜົນ​ ໂດຍພາຍ​ໃຕ້​ຫົວ​ຂໍ້  ທ່ອງທ່ຽວປອດໄພ ໃສ່ໃຈກົດຈະລາຈອນ ​ນີ້​ເພື່ອປູກ​ຈິດ​ສຳນຶກ ​ແລະ ​ປຸກ​ລະດົມມວນ​ຊົນ​ທົ່ວ​ສັງຄົມ​ ກໍ່​ຄື​ປະຊາຊົນ​ບັນດາ​ເຜົ່າ ​ໃນ​ຂອບ​ເຂດ​ທົ່ວ​ປະ​ເທດ ​ໃຫ້​ເຫັນ​ເຖິງຄວາມ​ໝາຍ​ຄວາມ​ສຳຄັນ ​ໃນ​ການ​ຫຼຸດຜ່ອນ, ປ້ອງ​ກັນການ​ເກີດ​ອຸປະຕິ​ເຫດ​ ​ແລະ ໃຫ້​ມີ​ສະຕີ​ລະວັງ​ຕົວ​ໃນ​​ເວລາ​ຂັບ​ຂີ່ຕາມ​ທ້ອງ​ຖະໜົນ, ​ໂດຍສະ​ເພາະ​ຢ່າງ​ຍິ່ງ​ແມ່ນ​ກຸ່ມ​ສ່ຽງທີ່​ອາດ​ຈະ​ກໍ່​ໃຫ້​ເກີດ​ອຸປະຕິ​ເຫດ​ເຊັ່ນ: ຊາວ​ໜຸ່ມ ​ແລະ ​ເຍົາວະ​ຊົນ, ນອກ​ຈາກນັ້ນ​ຍັງ​ເປັນ​ການປູກ​ຈິດ​ສຳນຶກ​ໃຫ້​ທຸກ​ຄົນ​ເຫັນ​ໄດ້​ຄວາມ​ສຳຄັນ ​ໃນ​ການ​ປ້ອງ​ກັນ  ​ແລ​ະ ຕີ​ຖອຍ​ບັນຫາການ​ເກີດ​ອຸປະຕິ​ເຫດຈາກການຂັບຂີ່ຍານພາຫະນະ ​ເຮັດ​ແນວ​ໃດ​ໃຫ້ການ​ສູນ​ເສັຍ​ເສຍ​​ຊິວິດ ​ແລະ ຊັບ​ສິນ ຍ້ອນ​ອຸປະຕິ​ເຫດ​ທາງ​ຖະໜົນ​ເປັນ​ຈຳນວນ​ຫຼວງ​ຫຼາຍ ​ໃຫ້​ນັບ​ມື້​ນັບ​ຫຼຸດ​ນ້ອຍ-ຖອຍລົງ​ເປັນ​ກ້າວໆ. ​​ໃນ​ຕອນ​ທ້າຍ ທ່ານ​ປະ​ທ່ານ​ຍັງ​ໄດ້​ຮຽກຮ້ອງ​ໃຫ້​ພໍ່​ແມ່ນ​ພີ່ນ້ອງ ບັນດາ​ເຜົ່າ ​ໃນ​ຂອບ​ເຂດ​ທົ່ວ​ປະ​ເທດ ​ເວົ້າ​ລວມ ​ເວົ້າ​ສະ​ເພາະ ຊາວ​ນະຄອນຫຼວງ​ວຽງ​ຈັນ​ ຈົ່ງ​ເພີ່​ມສະຕິ​ລະວັງ​ຕົວ​ໃນ​ການ​ເດີນທາງ​ໄປ-ມາ, ພ້ອມ​ກັນ ປະຕິບັດ​ກົດ​ລະບຽບ​ກົດ​ຈາລະຈອນ ຢ່າງ​ເຂັ້ມ​ງວດ ​ເຮັດ​ແນວ​ໃດ ​ໃຫ້ການ​ເດີນທາງ​ໃນ​ຊິວິດ​ປະຈຳ​ວັນ​ມີ​ຄວາມ​ສະດວກ​ສະບາຍ ​ແລະ ປອດ​ໄພ. ຢາກ​ເຮັດ​ໄດ້​ຄື​ແນວ​ນັ້ນ​ຕ້ອງ​ເອົາ​ໃຈ​ໃສ່​ສີ່​ປະການ​ຕັ້ນຕໍ​ດັ່ງ​ນີ້: ຫຼຸດ​ຜອນຄວາມ​ໄວ, ດື່ມບໍ່​ຂັບ, ​ໃສ່​ສາຍ​ແອວ​ນິລະ​ໄພ ​ແລະ​ ໃສ່​ໝວກ​ກັນ​ກະທົບ​ໃນ​ເວລາ​ຂັບ​ຂີ່​ລົດຈັກ.

  ​ໃນ​ງານ​ດັ່ງກ່າວ ຍັງ​ມີ​ການ​ໂຕ້​ວ່າ​ທີ ກ່ຽວ​ກັບ​ບັນຫາ​ຄວາມ​ປອດ​ໄພ​ທາງ​ຖະໜົນ ​ໃນ​ຫົວ​ຂໍ້: ການ​ກໍ່ສ້າງ​ເສັ້ນ​ທາງ ​ແລະ ການ​ນຳ​ໃຊ້​ເສັ້ນ​ທາງ; ການ​ໃສ່​ໝວກ​ກັນ​ກະທົບ ​ແລະ ບໍ່ໃສ່​ໝວກ​ກັນ​ກະທົບ ​ໃນ​ເວລາ​ຂັບ​ຂີ່, ​ແລະ ການ​ຂັບ​ຂີ່ລົດ​ໄວ ​ແລະ ການ​ຂັບ​ຂີ່ລົດ​ຊ້າ. ພ້ອມ​ນັ້ນ​ຍັງ​ມີ​ບັນດາ​ຮ້ານ​ວາງສະ​ແດງ​ທັງ​ພາກ​ລັດ ​ແລະ ​ເອກະ​ຊົນ ​ມາໃຫ້​ຄວາມ​ຮູ້​ແກ່​ສັງຄົມກ່ຽວ​ກັບ ​ເຕັກນິກ​ການ​ຂັບ​ຂີ່​ລົດ​ປອດ​ໄພ, ການ​ປະຖົມພະຍາ​ເບື້ອງຕົ້ນ​ກໍລະນີ​ເກີດ​ອຸປະຕິ​ເຫດ ​ແລະ ກິດຈະກຳ​ຖາມ​ຕອບ​ມີ​ລາງ​ວັນ ​ແລະ ອື່ນໆ.

 

ກວດແກ້ໂດຍ ທ່ານ ແສງຈັນ ຫອມສີລາຮັກ

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

 

 

 

 

 

 

 

 

 

Additional information