ຄະນະກຳມະການດ້ານຄວາມປອດໄພທາງຫລວງ ຂັ້ນແຂວງ ແລະ ນະຄອນຫລວງ ປະຊຸມຖອດຖອນບົດຮຽນ

      ກອງປະຊຸມຖອດຖອນບົດຮຽນ ຂອງຄະນະກຳມະການ ດ້ານຄວາມປອດໄພທາງຫລວງ ຂັ້ນແຂວງ ແລະນະຄອນ ຫລວງວຽງຈັນ ໄດ້ຈັດຂື້ນວັນທີ 19-20 ມີນາ 2018 ຢູ່ທີ່ຫ້ອງປະຊຸມພະແນກໂຍທາທິການ ແລະ ຂົນສົ່ງ ແຂວງ ສະຫວັນນະເຂດ, ພາຍໃຕ້ການເປັນປະທານຮ່ວມ ຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງ ຍທຂ, ຫົວໜ້າຄະນະກຳມະການ ແຫ່ງຊາດ ດ້ານຄວາມປອດໄພ ທາງຫລວງ ແລະ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງ ແຂວງສະຫວັນນະເຂດ, ພ້ອມດ້ວຍຜູ້ເຂົ້າຮ່ວມບັນດາທ່ານຫົວໜ້າກົມ, ຮອງກົມ ຈາກຂະແໜງການທີ່ກ່ຽວ ຂ້ອງ, ຫົວໜ້າພະແນກ, ຮອງຫົວໜ້າພະແນກ ຍທຂ, ເຈົ້າໜ້າທີ່ຕຳຫລວດຈະລາຈອນ ແລະ ພະນັກງານວິຊາການ ເຂົ້າຮ່ວມ ປະມານ 150 ຄົນ.

         ການຄຸ້ມຄອງຄວາມປອດໄພທາງຫລວງ ເປັນວຽກທີ່ສຳຄັນ ຊື່ງພວກເຮົາທຸກຄົນຕ້ອງຮັບຜິດຊອບຮ່ວມກັນ ແລະ ດຳເນີນເປັນປົກກະຕິຕໍ່ເນື່ອງ ເພື່ອເສີມສ້າງພາບພົດອັນຈົບງາມໃຫ້ແກ່ສັງຄົມ, ມີຄວາມສະຫງົບ, ມີຄວາມ ເປັນລະບຽບຮຽບຮ້ອຍ ໃນການໃຊ້ລົດໃຊ້ຖະໜົນເວົ້າລວມ, ເວົ້າສະເພາະແມ່ນການອຳນວຍຄວາມສະດວກ ແກ່ການ ຈະລາຈອນຕາມທ້ອງຖະໜົນຫລວງ, ໃຫ້ມີຄວາມສະດວກ, ປອດໄພ ແລະ ເປັນປົກກະຕິ, ເປັນສ່ວນໜຶ່ງໃນການ ປະກອບສ່ວນສ້າງສາພັດທະນາປະເທດຊາດ ຕາມທິດຂອງລັດຖະບານ. ວຽກງານຄຸ້ມຄອງຄວາມປອດໄພທາງຫລວງ ແມ່ນໄດ້ຈັດຕັ້ງປະຕິບັດຕະຫອດມາ ຊຶ່ງແມ່ນກະຊວງ ຍທຂ ເປັນຜູ້ສ້າງນິຕິກຳ ເພື່ອເປັນເຄື່ອງມືໃນການຕິດຕາມ ຄຸ້ມຄອງ, ກະຊວງ ປ້ອງກັນຄວາມສະຫງົບ ເປັນຜູ້ບັງຄັບໃຊ້ກົດລະບຽບ ແລະ ກົດໝາຍ ແລະ ບັນດາຂະແໜງການ ອື່ນໆ ທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ເປັນຜູ້ຈັດຕັ້ງປະຕິບັດຮ່ວມກັນ.

      ກອງປະຊຸມໄດ້ຮັບຟັງການລາຍງານສະພາບການຈັດຕັ້ງປະຕິບັດ ວຽກງານຄວາມປອດໄພທາງຫລວງ ຈາກກອງ ເລຂາ ຄຊປທ ເຊັ່ນ ສະພາບການກວດກາຂອງເຈົ້າໜ້າທີ່, ຂໍ້ສະດວກ, ຂໍ້ຫຍຸ້ງຍາກ, ຈຳນວນອຸປະຕິເຫດທີ່ເກີດຂື້ນ ໃນຊ່ວງໄລຍະທີ່ຜ່ານມາ, ບັນດາສາຍເຫດທີ່ພາໃຫ້ເກີດອຸປະຕິເຫດ ລວມທັງວິທີປ້ອງກັນ ແລະ ແກ້ໄຂ. ຫລັງຈາກນັ້ນ ຜູ້ເຂົ້າຮ່ວມກອງປະຊຸມໄດ້ແບ່ງໜ່ວຍຄົ້ນຄວ້າ ເພື່ອປືກສາຫາລືປະກອບຄຳຄິດຄຳເຫັນແບບເປີດກວ້າງ, ກ່ຽວກັບວຽກ ງານຄວາມປອດໄພທາງຫລວງ ແລະ ສ້າງແຜນການຮ່ວມກັນ ເພື່ອໃຫ້ມີຄວາມເຂົ້າໃຈເປັນເອກະພາບກັນ ແລະ ພ້ອມກັນຈັດຕັ້ງປະຕິບັດໃຫ້ມີສິດທິຜົນ ໂດຍສະເພາະແມ່ນບັນຫາຂໍ້ຄົງຄ້າງຜ່ານມາ ເພື່ອຜັນຂະຫຍາຍມາເປັນແຜນ ການ, ແຜນງານ ແລະ ວາງຄາດໝາຍສູ້ຊົນ. ວ່າພວກເຮົາຈະເຮັດອັນໃດກ່ອນ, ອັນໃດຕາມຫລັງ, ອັນໃດຄວນເຮັດ ຄຽງຄູ່ກັນໄປ, ດ້ວຍວິທີໃດ ແລະ ໃຜຈະເປັນຜູ້ເຮັດ ເພື່ອແກ້ໄຂສະພາບການຈະລາຈອນທີ່ເປັນຢູ່ໃນປະຈຸບັນ ໃຫ້ມີ ຄວາມສະດວກ, ປອດໄພ ແລະ ໂລ່ງລ່ຽນ. ກ້າວໜ້າໄປຄຽງຄູ່ກັບປະເທດເພື່ອນບ້ານ, ອານຸພາກພື້ນ ແລະ ສາກົນ ເທື່ອລະກ້າວ, ເພື່ອອຳນວຍຄວາມສະດວກ ໃຫ້ແກ່ການຈະລາຈອນທາງຫລວງ, ເປັນການຫລຸດຜ່ອນການເກີດອຸປະຕິເຫດ, ຫລຸດ ຜ່ອນຜູ້ບາດເຈັບ ແລະ ເສັຍຊີວິດ ຈາກການເກີດອຸປະຕິເຫດຕາມທ້ອງຖະໜົນຫລວງ.

Additional information