ກອງປະຊຸມຄັ້ງທີ 4 ຂອງຄະນະຊີ້ນຳໂຄງການກໍ່ສ້າງທາງລົດໄຟ ແຕ່ຊາຍແດນລາວ-ຈີນ ຫາ ນະຄອນຫຼວງວຽງຈັນ

ໃນຕອນເຊົ້າເວລາ 8:30 ໂມງ ຂອງວັນທີ 9 ມີນາ 2018 ຢູ່ທີ່ຫ້ອງປະຊຸມໃຫຍ່ເບີ 1 ກະຊວງໂຍທາທິການ ແລະ ຂົນສົ່ງ ໄດ້ເປີດກອງປະຊຸມຄັ້ງທີ 4 ຂອງຄະນະຊີ້ນຳໂຄງການກໍ່ສ້າງທາງລົດໄຟ ແຕ່ຊາຍແດນລາວ-ຈີນ ຫາ ນະຄອນ ຫຼວງວຽງຈັນ ໂດຍການເປັນປະທານນຳໂດຍ ທ່ານ ປອ. ບຸນຈັນ ສິນທະວົງ ລັດຖະມົນຕີ ກະຊວງ ຍທຂ, ຫົວໜ້າ ຄະນະຊີ້ນຳໂຄງການກໍ່ສ້າງທາງລົດໄຟລາວ-ຈີນ, ທ່ານ ລັດຕະນະມະນີ ຄູນນີວົງ ຮອງລັດຖະມົນຕີ ກະຊວງ ຍທຂ, ຫົວໜ້າຄະນະຄຸ້ມຄອງໂຄງການກໍ່ສ້າງທາງລົດໄຟລາວ-ຈີນ. ມີບັນດາທ່ານຮອງລັດຖະມົນຕີ, ທ່ານຮອງເຈົ້າຄອງນະ ຄອນຫຼວງວຽງຈັນ, ບັນດາທ່ານຮອງເຈົ້າແຂວງ, ເຂົ້າຮ່ວມທັງໝົດ 18 ທ່ານ.

ກອງປະຊຸມໄດ້ຮັບຟັງລາຍງານ ບົດບັນທຶກກອງປະຊຸມຄັ້ງທີ 3 ຂອງຄະນະຊີ້ນຳໂຄງການກໍ່ສ້າງທາງລົດໄຟລາວ-ຈີນ ຄັ້ງວັນທີ 25/8/2017, ຮັບຟັງລາຍງານຄວາມຄືບໜ້າການຈັດຕັ້ງປະຕິບັດໂຄງການ ແລະ ຂໍ້ສະເໜີ, ພ້ອມກັນນີ້ບັນ ດາທ່ານຜູ້ເຂົ້າຮ່ວມໄດ້ປະກອບຄຳຄິດຄຳເຫັນ ຮ່າງຄູ່ມືການຊຳລະຄ່າຊົດເຊີຍສິ່ງກີດຂວາງ, ຂໍ້ຕົກລົງວ່າດ້ວຍການ ກຳນົດລາຄາຫົວໜ່ວຍຊົດເຊີຍສິ່ງກີດຂວາງຂອງທ່ານ ເຈົ້າແຂວງໆວຽງຈັນ, ຂໍ້ຕົກລົງວ່າດ້ວຍການກຳນົດລາຄາ ຫົວໜ່ວຍຊົດເຊີຍສິ່ງກີດຂວາງຂອງທ່ານເຈົ້າແຂວງໆ ຫຼວງພະບາງ, ຂໍ້ຕົກລົງວ່າດ້ວຍການກຳນົດລາຄາຫົວໜ່ວຍຊົດ ເຊີຍສິ່ງກີດຂວາງຂອງທ່ານ ເຈົ້າແຂວງໆ ຫຼວງນ້ຳທາ, ບົດບັນທຶກກອງປະຊຸມໃນວັນທີ 1/3/2018 ກ່ຽວກັບງົບປະ ມານຄ່າຊົດເຊີຍສິ່ງກີດຂວາງ, ມູນຄ່າກໍ່ສ້າງທາງເຊື່ຶອມເຂົ້າສະຖານີລົດໄຟ ແລະ ງົບປະມານປະຈຳປີ 2018 ຂອງຄະ ນະຄຸ້ມຄອງໂຄງການ, ຂໍ້ຕົກລົງການແບ່ງຄວາມຮັບຜິດຊອບຂອງຄະນະຊີ້ນຳ.

ກອງປະຊຸມໄດ້ດຳເນີນໄປເປັນເວລາເຄິ່ງວັນ ແລະ ປິດລົງໃນວັນດຽວກັນ.       

 

ກວດແກ້ໂດຍ ທ່ານ ແສງຈັນ ຫອມສີລາຮັກ

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

Additional information