ກອງປະຊຸມສຳມະນາວິຊາການ ກ່ຽວກັບວຽກງານການຈັດຕັ້ງ ແລະ ການເຄື່ອນໄຫວ ຂອງບັນດາດ່ານໃນທົ່ວປະເທດ

ໃນຕອນເຊົ້າເວລາ 8:30 ໂມງ ຂອງວັນທີ 1 ມີນາ 2018 ຢູ່ທີ່ຫ້ອງປະຊຸມໃຫຍ່ເບີ 1 ກະຊວງໂຍທາທິການ ແລະ ຂົນສົ່ງ ໄດ້ມີພິທີເປີດກອງປະຊຸມສຳມະນາວິຊາການ ກ່ຽວກັບວຽກງານການຈັດຕັ້ງ ແລະ ການເຄື່ອນໄຫວ ຂອງບັນດາ ດ່ານໃນທົ່ວປະເທດ ຂືຶ້ນໃຫ້ກຽດເປັນປະທານນຳໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ, ທ່ານ ປອ. ບຸນຈັນ ສິນທະວົງ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ, ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ. ມີບັນດາທ່ານຫົວໜ້າກົມ, ຮອງຫົວ ໜ້າກົມ, ບັນດາທ່ານ ທີ່ມາຈາກກະຊວງທີ່ກ່ຽວຂ້ອງ, ທະນາຄານແຫ່ງ ສປປ ລາວ, ສະຖາບັນຄົ້ນຄວ້າ ເສດຖະກິດແຫ່ງຊາດ, ບັນດາທ່ານທີ່ມາຈາກພະແນກໂຍທາທິການ ແລະ ຂົນສົ່ງ ແຂວງ ແລະ ນະຄອນຫຼວງວຽງຈັນ ເຂົ້າຮ່ວມທັງໝົດ 134 ທ່ານ.

ກອງປະຊຸມໃນຄັ້ງນີ້ມີຄວາມສຳຄັນຫຼາຍ ຜູ້ເຂົ້າຮ່ວມໄດ້ຮັບຟັງຜົນຂອງການລົງເກັບກຳຂໍ້ມູນ ກ່ຽວກັບການຈັດຕັ້ງ ແລະ ການເຄື່ອນໄຫວຂອງບັນດາດ່ານໃນທົ່ວປະເທດ ແລະ ຜົນການສຶກສາຄົ້ນຄວ້າ ກ່ຽວກັບຮູບແບບໃນການຄຸ້ມຄອງດ່ານ ສາກົນ ແລະ ດ່ານປະເພນີ, ພ້ອມກັນນີ້ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ເໜັ້ນໜັກໃຫ້ຜູ້ເຂົ້າຮ່ວມກອງປະຊຸມ ທັງຈາກກະຊວງກ່ຽວຂ້ອງ ແລະ ທ້ອງຖິ່ນ ພ້ອມກັນປະກອບຄຳຄິດຄຳເຫັນ ຢ່າງມີຈຸດສຸມ ເພາະຄຳຄິດຄຳເຫັນເຫຼົ່ານີ້ ຈະເປັນພື້ນຖານໃຫ້ຄະນະຮັບຜິດຊອບ ໃນການຄົ້ນຄວ້າ ໂຄງປະກອບ ການຈັດຕັ້ງ, ພາລະບົດບາດ, ສິດ ແລະ ໜ້າທີ່ແຕ່ລະປະເພດດ່ານ ລວມທັງຂັ້ນຄຸ້ມຄອງ ເພື່ອກຳນົດເຂົ້າໃນຮ່າງ ດຳລັດ ກ່ຽວກັບການຈັດຕັ້ງ ແລະ ການເຄື່ອນໄຫວຂອງບັນດາດ່ານໃນທົ່ວປະເທດ ເພື່ອຮັບປະກັນການຕິດຕໍ່ພົວພັນ, ເຊື່ອມໂຍງກັບປະເທດເພື່ອນບ້ານ ແລະ ພື້ນຖານສາກົນ, ຊຸກຍູ້ການເຕີບໂຕຂອງເສດຖະກິດແຫ່ງຊາດ ແລະ ຮັບປະ ກັນຄວາມສະຫງົບ ປອດໄພພາຍໃນປະເທດ.

ກອງປະຊຸມດຳເນີນໄປເປັນເວລາ 2 ວັນ ແລະ ໄດ້ປິດລົງໃນວັນທີ 2 ມີນາ 2018.


ກວດແກ້ໂດຍ ທ່ານ ແສງຈັນ ຫອມສີລາຮັກ

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

 

 

 

 

 

 

 

 

Additional information