ພິທີເປີດໂຄງການກໍ່ສ້າງ ຂົວຂ້າມນ້ຳຂອງ ກ້ອນຕື່ນ-ຫ້ວຍແກ້ວ ແລະ ໂຄງການກໍ່ສ້າງເສັ້ນທາງປູຢາງ 2 ຊັ້ນ ແຕ່ເມືອງປາກທາ ຫາ ເມືອງຜາອຸດົມ, ແຂວງ ບໍ່ແກ້ວ

ໃນຕອນເຊົ້າຂອງວັນທີ 2 ກຸມພາ 2018 ຢູ່ທີ່ເມືອງປາກທາ ແຂວງ ບໍ່ແກ້ວ ໄດ້ມີພິທີເປີດການກໍ່ສ້າງ ຂົວຂ້າມນ້ຳຂອງ ກ້ອນຕື່ນ-ຫ້ວຍແກ້ວ ແລະ ໂຄງການກໍ່ສ້າງເສັ້ນທາງປູຢາງ 2 ຊັ້ນ ແຕ່ເມືອງປາກທາ ຫາ ເມືອງຜາອຸດົມ, ແຂວງ ບໍ່ແກ້ວ ໃຫ້ກຽດເຂົ້າຮ່ວມໃນພິທີນຳໂດຍ ທ່ານ ປອ. ບຸນທອງ ຈິດມະນີ ກຳມະການ ກົມການເມືອງສູນກາງພັກ, ຮອງນາຍົກລັດຖະມົນຕີ, ປະທານກວດກາຄະນະກວດກາສູນກາງພັກ, ປະທານອົງການກວດກາລັດຖະບານ, ຫົວໜ້າ ອົງການຕ້ານການສໍ້ລາດບັງຫຼວງຂັ້ນສູນກາງ, ທ່ານ ປອ. ບຸນຈັນ ສິນທະວົງ ກຳມະການສູນກາງພັກ, ເລຂາ ຄະນະພັກ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ,​ ທ່ານ ປອ. ຄຳພັນ ເຜີຍຍະວົງກຳມະການສູນກາງພັກ,   ເຈົ້າແຂວງ ແຂວງ ບໍ່ແກ້ວ, ທ່ານ ພົງສະ ຫວັນ ສິນທະວົງ ກຳມະການສູນກາງພັກ,   ເຈົ້າແຂວງ ແຂວງ ໄຊຍະບູລີ. ມີທ່ານ ເຈົ້າເມືອງປາກທາ, ທ່ານ ເຈົ້າເມືອງຜາອຸດົມ, ທ່ານ ຫົວໜ້າກົມຂົວທາງ, ທ່ານ ຫົວໜ້າຫ້ອງການກະຊວງ, ທ່ານ ອຳນວຍການລັດວິສາຫະກິດວິສະວະກຳຄົມມະນາຄົມ, ຕາງໜ້າໃຫ້ບໍລິສັດຜູ້ຮັບເໝົາໂຄງການກໍ່ສ້າງຂົວຂ້າມ ນ້ຳຂອງ ກ້ອນຕື່ນ-ຫ້ວຍແກ້ວ ແມ່ນທ່ານ ອິນປັນ ຟອງແມ່ຂອງ ຜູ້ອຳນວຍ ການລັດວິສາຫະກິດກໍ່ສ້າງຄົມມະນາຄົມ ແລະ ຕາງໜ້າໃຫ້ບໍລິສັດຜູ້ຮັບເໝົາໂຄງການກໍ່ສ້າງເສັ້ນທາງ ປູຢາງ 2 ຊັ້ນ ແຕ່ເມືອງປາກທາ ຫາ ເມືອງຜາອຸດົມ ແມ່ນທ່ານ ວິໄລ ສີລາຊາ ປະທານ ກຸ່ມບໍລິສັດທະວີໂຊກ ຈຳກັດ ແລະ ມີພະນັກງານທະຫານຕຳຫຼວດພໍ່ແມ່ປະຊາ ຊົນເມືອງປາກທາ ແຂວງ ບໍ່ແກ້ວເຂົ້າຮ່ວມຢ່າງພ້ອມພຽງ.

ໂຄງການກໍ່ສ້າງ ຂົວຂ້າມນ້ຳຂອງ ກ້ອນຕື່ນ-ຫ້ວຍແກ້ວ ໄດ້ເຊັນສັນຍາ ວັນທີ 12 ຕຸລາ 2017 ມີໄລຍະເວລາກໍ່ສ້າງ 36 ເດືອນ ເລີ່ມແຕ່ວັນທີ 12 ຕຸລາ 2017 ຫາ 12 ກັນຍາ 2020 ແລະ ໂຄງການກໍ່ສ້າງເສັ້ນທາງປູຢາງ 2 ຊັ້ນ ແຕ່ເມືອງປາກທາ ຫາ ເມືອງຜາອຸດົມ, ແຂວງ ບໍ່ແກ້ວ ມີໄລຍະເວລາກໍ່ສ້າງ 36 ເດືອນ ເລີ່ມແຕ່ວັນທີ 22ສິງຫາ 2017 ຫາວັນທີ 22 ສິງຫາ 2020

ໃນພິທີໄດ້ຮັບຟັງການໂອ້ລົມຂອງ ທ່ານ ປອ. ບຸນທອງ ຈິດມະນີ ກຳມະການກົມການເມືອງສູນກາງພັກ, ຮອງນາຍົກ ລັດຖະມົນຕີ, ປະທານກວດກາຄະນະກວດກາສູນກາງພັກ, ປະທານອົງການກວດກາລັດຖະ ບານ, ຫົວໜ້າອົງການ ຕ້ານການສໍ້ລາດບັງຫຼວງຂັ້ນສູນກາງ ເຊິ່ງທ່ານໄດ້ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ຈົ່ງພ້ອມກັນເຊີດຊູສະຕິ ເປັນ ເຈົ້າໃນການປະຕິບັດໜ້າທີ່ວຽກງານ ດ້ວຍຄວາມຮັບຜິດຊອບສູງ ເພື່ອເຮັດໃຫ້ໂຄງການນີ້ ສຳເລັດຕາມແຜນການທີ່ ວາງໄວ້ ພ້ອມທັງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ ແລະ ຊັ້ນຄົນຕ່າງໆ ຈົ່ງອຳນວຍຄວາມສະດວກເພື່ອໃຫ້ໂຄງ ການນີ້ສຳເລັດຕາມຄາດໝາຍທີ່ວາງໄວ້ເພື່ອ ອຳນວຍຄວາມສະດວກໃນການໄປມາຫາສູ່, ສຸກຍູ້ສົ່ງເສີມການຜະລິດ, ການຈໍລະຈອນສິນຄ້າ, ອຳນວຍ ຄວາມສະດວກແກ່ການລົງທຶນ, ການທ່ອງທ່ຽວ, ການຂົນສົ່ງ ແລະ ການບໍລິການ ອື່ນໆ ພັດທະນາ ເສດຖະກິດ-ສັງຄົມຂອງປະເທດເຮົາໃຫ້ຈະເລີນຮຸ່ງເຮືອງຂຶ້ນເລື້ອຍໆ. 

ໃນໂອກາດນີ້ທ່ານ ປອ. ບຸນທອງ ຈິດມະນີ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ພ້ອມ ດ້ວຍຄະນະ ໄດ້ມອບເງິນຈຳນວນໜຶ່ງ ພ້ອມດ້ວຍເຄື່ອງຊ່ວຍເຫຼືອໃຫ້ແກ່ເມືອງປາກທາ ແລະ ເມືອງຜາອຸດົມ ອີກດ້ວຍ.

 

 ກວດແກ້ໂດຍ: ທ່ານ ແສງຈັນ ຫອມສີລາຮັກ

ຂຽນຂ່າວໂດຍ: ຈັນທະລາ ຂັນທະວີໄຊ

 

 

 

 

 

 

 

 

 

 

 

 

 

 

 

 

 

Additional information