ກອງປະຊຸມພົບປະ ແລະ ເຮັດວຽກຮ່ວມກັນ ລະຫວ່າງ ກະຊວງໂຍທາທິການ ແລະ ຂົນສົ່ງ ສປປ ລາວ ແລະ ກະຊວງຄົມມະນາຄົມ-ຂົນສົ່ງ ສສ ຫວຽດນາມ

         ໃນລະຫວ່າງວັນທີ 29 ພະຈິກ ຫາ 01 ທັນວາ 2017, ຄະນະຜູ້ແທນ ກະຊວງຄົມມະນາຄົມ-ຂົນສົ່ງ ແຫ່ງ ສາທາລະນະລັດ ສັງຄົມນິຍົມ ຫວຽດນາມ (ກະຊວງ ຄ​ຂ ຫວຽດ​ນາມ), ນໍາໂດຍ ສະຫາຍ ເລ ດິ່ງ ເທາະ, ຮອງລັດຖະ ມົນຕີ ພ້ອມດ້ວຍຄະນະ ແລະ ຄະນະຜູ້ແທນ ກະຊວງ ຍທຂ ຂອງລາວ, ນຳໂດຍ ສະຫາຍ ສັນຕິສຸກ ສິມມາລາວົງ, ຮອງລັດຖະມົນຕີ ພ້ອມດ້ວຍຄະນະ; ໄດ້ປະຊຸມປຶກສາຫາລືກ່ຽວກັບ ການຮ່ວມມືສອງຝ່າຍ ດ້ານຄົມມະນາຄົມ-ຂົນສົ່ງ, ກອງປະຊຸມປຶກສາຫາລືຄັ້ງນີ້ ທັງສອງຝ່າຍໄດ້ພ້ອມກັນ ທົບທວນຄືນການຈັດຕັ້ງປະຕິບັດວຽກງານຮ່ວມມືສອງຝ່າຍ ໃນປີ 2017, ໂດຍສະເພາະ ແມ່ນບັນດາກິດຈະກຳຕ່າງໆ ເພື່ອເປັນການສະເຫຼີມສະຫຼອງປີສາມັກຄີມິດຕະພາບ ລາວ- ຫວຽດນາມ ພ້ອມທັງໄດ້ປຶກສາຫາລືແຜນວຽກທີ່ຈະຈັດຕັ້ງປະຕິບັດໃນປີ 2018.

         ກອງປະຊຸມຄັ້ງນີ້, ສອງຝ່າຍໄດ້ເປັນເອກະພາບກັນຫລາຍໜ້າວຽກ ເປັນຕົ້ນແມ່ນບັນດາກິດຈະກຳ ຕ່າງໆ ທີ່ສອງກະຊວງຈັດຂື້ນ ເພື່ອເປັນການສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ 2017  ແລະ ໄດ້ລົງນາມບົດບັນທຶກຫຼາຍສະບັບຮ່ວມກັນ, ໂດຍໄດ້ເປັນເອກະພາບກັນມອບໃຫ້ ກົມແຜນການ ແລະ ການຮ່ວມມື ຂອງ ກະຊວງໂຍທາທິການ ແລະ ຂົນສົ່ງ ສປປ ລາວ ແລະ ກົມຮ່ວມມືສາກົນ ຂອງກະຊວງຄົມມະນາຄົມ-ຂົນສົ່ງ ສສ ຫວຽດນາມ ເປັນຈຸດປະສານງານກັນຢ່າງເປັນປົກກະຕິ ເພື່ອສ້າງແຜນການແລກປ່ຽນ ແລະ ຊຸກຍູ້ການຈັດຕັ້ງຜັນ ຂະຫຍາຍບັນດາເນື້ອໃນກອງປະຊຸມທີ່ໄດ້ຕົກລົງເປັນເອກະພາບກັນຜ່ານມານັ້ນ, ກອງປະຊຸມປືກສາຫາລືໄດ້ດຳເນີນ ໄປດ້ວຍບັນຍາກາດອັນສະໜິດສະໝົມ ແລະ ການຮ່ວມມື ຊຶ່ງເຕັມໄປດ້ວຍຄວາມສາມັກຄີ ແບບພິເສດອ້າຍນ້ອງ ແລະ ໄດ້ສຳເລັດລົງຢ່າງຈົບງາມໃນວັນດຽວກັນ.

Additional information