ພິທີເປີດບັ້ນຝຶກອົບຮົມວຽກງານໂຄສະນາປາຖະກະຖາຊຸດທີ 16

ໃນວັນທີ 23 ຕຸລາ 2017 ຢູ່ທີ່ສະຖາບັນຝຶກອົບຮົມໂຍທາທິການ ແລະ ຂົນສົ່ງ ຫລັກ 19, ກະຊວງ ຍທຂ ໄດ້ຈັດພິທີເປີດຝຶກອົບຮົມວຽກງານໂຄສະນາປາຖະກະຖາ ຊຸດທີ 16 ຂື້ນ, ໂດຍພາຍ ໃຕ້ການເປັນປະທານ ຂອງທ່ານ ລັດຕະນະມະນີ ຄູນນີວົງ ຮອງລັດຖະມົນຕີ ກະຊວງ ຍທຂ, ມີ ທ່ານ ສີປະເສີດ ແສນສະຫວັດ, ຮອງຫົວໜ້າຄະນະໂຄສະນາ ອົບຮົມສູນກາງພັກ ພ້ອມດ້ວຍຄະນະຄູ ອາຈານ ແລະ ມີບັນດານັກສຳມະນາ ກອນ ທີ່ມາຈາກບັນດາກົມ, ກອງ, ສະຖາບັນ, ລັດວິສາຫະກິດເຂົ້າ ຮ່ວມຝຶກອົບຮົມ ຈຳນວນ 32 ທ່ານ.

ການຝຶກອົບຮົມໃນຄັ້ງນີ້ ຜູ້ເຂົ້າຮ່ວມຈະໄດ້ຮຽນຮູ້ ກ່ຽວກັບການປັບປຸງທັດສະນະຫລັກໝັ້ນ ທາງດ້ານການ ເມືອງ, ຄຸນສົມບັດສິນທຳປະຕິວັດຂອງພະນັກງານນຳພາຂັ້ນຕ່າງໆ ເພື່ອສາມາດຈຳແນກມິດ ສັດຕູຢ່າງ ຈະແຈ້ງ, ເຮັດໃຫ້ພະນັກງານ, ສະມາຊິກພັກຂັ້ນຕ່າງໆ ເຊື່ອໝັ້ນຕໍ່ການນຳພາຂອງພັກ, ການຄູ້ມຄອງ ຂອງລັດ, ຕໍ່ອຸດົມການ ແລະ ຈຸດໝາຍຂອງການ ປະຕິວັດ.

ອັນສຳຄັນແມ່ນໃຫ້ສາມາດນຳໄປຈັດຕັ້ງປະຕິບັດ ແລະ ມີຄວາມສາມາດຊວນເຊື່ອ, ປຸກລະດົມພະນັກງານ ພາຍໃຕ້ຄວາມຮັບຜິດຊອບ ຂອງຕົນ  ປະຕິບັດໜ້າທີ່ໂດຍດີ, ຮູ້ປຸກລະດົມປະຊາຊົນ ເຂົ້າຮ່ວມຂະບວນ ການຈັດຕັ້ງປະຕິບັດແນວ ທາງນະໂຍບາຍຂອງພັກ ແລະ ແຜນພັດທະນາເສດຖະກິດສັງຄົມຂອງລັດ ວາງ ອອກ ຜູ້ເຂົ້າຮ່ວມຍັງຈະສາມາດໝູນໃຊ້ເຂົ້າ ໃນວຽກງານຕົວຈິງຂອງຕົນໃນການຍົກລະດັບຄວາມຮູ້ທາງ ດ້ານການຂີດຂຽນ, ການແຕ່ງໂຄສະນາອະທິບາຍແນວທາງ, ແຜນນະໂຍບາຍ, ກົດໝາຍຂອງລັດ ແລະ ທັດສະນະຂອງພັກ, ບັນດາສະພາບການ ທີ່ເກີດຂື້ນແຕ່ລະໄລຍະ ຢູ່ພາຍໃນ ແລະ ຕ່າງປະເທດ.

ຫລັກສູດ​ ໄດ້ດຳເນີນໄປເປັນເວລາ 10 ວັນ ຈຶ່ງຈະສຳເລັດບັ້ນຝຶກອົບຮົມໃນຄັ້ງນີ້

 

 

 

 

Additional information