ທ່ານລັດຖະມົນຕີ ກະຊວງ ຍທຂ ພ້ອມດ້ວຍຄະນະ ເດີນທາງໄປ ຮ່ວມງານວາງສະແດງທາງດ້ານອຸດສະຫະກຳລົດໄຟ ສາກົນ ແລະກອງປະຊຸມຜູ້ນຳລະດັບສູງ ຢູ່ ສປ ຈີນ

ໃນລະຫວ່າງວັນທີ 23-26/10/2017 ທີ່ຜ່ານມາ, ໂດຍປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກ ລັດຖະມົນຕີ ສະບັບເລກທີ 1463/ຫສນຍ.ກລຂ, ລົງວັນທີ 26/9/2017, ທ່ານ ປອ. ບຸນຈັນ ສິນທະວົງ, ລັດຖະມົນຕີ ກະຊວງໂຍທາທິການ ແລະຂົນສົ່ງ ພ້ອມດ້ວຍຄະນະ ໄດ້ເດີນທາງໄປຮ່ວມງານວາງສະແດງ ທາງດ້ານອຸດສະຫະ ກຳລົດໄຟສາກົນ ແລະກອງປະຊຸມຜູ້ນຳລະດັບສູງ (2017 China International Rail Transit Industrial Expo and High Level Forum) ແລະກອງປະຊຸມຄວາມປອດໄພທາງລົດໄຟສາກົນ ຄັ້ງທີ 27 (The 27th International Railway Safety Conference (IRSC 2017)) ຢູ່ ສປ ຈີນ.

ກອງປະຊຸມດັ່ງກ່າວ ມີຄະນະຜູ້ແທນເຂົ້າຮ່ວມທັງໝົດປະມານ 250 ຄົນ ຈາກ 25 ປະເທດ, ຈຸດປະສົງຫລັກຂອງ ກອງປະຊຸມ ແມ່ນເພື່ອສົ່ງເສີມຄວາມຮ່ວມມື ແລະເຕັກໂນໂລຊີໃໝ່ທີ່ກ້າວໜ້າ ແລະທັນສະໄໝ, ເພື່ອປະກອບສ່ວນ ຂອງທາງລົດໄຟ ໃນການເຊື່ອມຕໍ່ພາກພື້ນ, ໂດຍສະເພາະແມ່ນການພັດທະນາ ແລະການລວບລວມວິໄສທັດ ແນໃສ່ ສົ່ງເສີມການພັດທະນາຄວາມປອດໄຟ ຂອງໂຄງລ່າງພື້ນຖານທາງລົດໄຟໃຫ້ດີຂຶ້ນ.

ໃນກອງປະຊຸມ ທ່ານລັດຖະມົນຕີ ໄດ້ກ່າວຄຳປາໃສກ່ຽວກັບ “ການພັດທະນາທາງລົດໄຟ ໃນ ສປປ ລາວ (Railway Development in Lao PDR)” ຕໍ່ກອງປະຊຸມປຶກສາຫາລືກ່ຽວກັບຂໍ້ລິເລີ້ມ “ໜຶ່ງແລວທາງ ໜຶ່ງເສັ້ນທາງ (The Belt and Road) ອີກດ້ວຍ.

Additional information