ທ່ານລັດຖະມົນຕີ ກະຊວງ ຍທຂ ພ້ອມດ້ວຍຄະນະ ເດີນທາງໄປຮ່ວມກອງປະຊຸມລັດຖະມົນຕີຂົນສົ່ງອາຊຽນ ຄັ້ງທີ 23 ທີ່ປະເທດສິງກະໂປ

ໃນລະຫວ່າງວັນທີ 12-13/10/2017 ທີ່ຜ່ານມາ, ທ່ານ ປອ. ບຸນຈັນ ສິນທະວົງ, ລັດຖະມົນຕີ ກະຊວງໂຍທາທິການ ແລະຂົນສົ່ງ ພ້ອມດ້ວຍຄະນະ ໄດ້ເດີນທາງໄປຮ່ວມກອງປະຊຸມລັດຖະມົນຕີຂົນສົ່ງອາຊຽນ ຄັ້ງທີ 23 ແລະກອງ ປະຊຸມລະຫວ່າງ ອາຊຽນ+ສປ ຈີນ, ອາຊຽນ+ຍີ່ປຸ່ນ. ອາຊຽນ+ສ.ເກົາຫລີ  ຊຶ່ງຈັດຂຶ້ນທີ່ປະເທດສິງກະໂປ. ໃນກອງ ປະຊຸມດັ່ງກ່າວ ໄດ້ມີການລົງນາມໃນບັນດາເອກະສານທີ່ສຳຄັນຈຳນວນ 5 ສະບັບຄື:

  1. ສັນຍາຂົນສົ່ງທາງອາກາດ 2 ຝ່າຍ (Air Service Agreement (ASA)) ລະຫວ່າງ ສປປ ລາວ ແລະປະເທດ ຟີລິບປິນ.
  2. ສັນຍາອາຊຽນວ່າດ້ວຍການຂົົນສົ່ງຜູ້ໂດຍສານຂ້າມແດນ (The ASEAN Framework Agreement on the Facilitation of Cross Border Transport of Passenger by Road Vehicle).
  3. ອະນຸສັນຍາຫລາຍຝ່າຍອາຊຽນ ກ່ຽວກັບສິດໃນການນຳໃຊ້ລະຫັດຖ້ຽວບິນຮ່ວມລະຫວ່າງທຸກຈຸດ ພາຍໃນດິນແດນ ຂອງບັນດາປະເທດອາຊຽນ (The Protocol on Domestic Code-Share Rights between Point within the Territory of any other ASEAN Member State)
  4. ບົດບັນທຶກຄວາມເຂົ້າໃຈ ລະຫວ່າງອາຊຽນ ແລະ ສປ ຈີນ ກ່ຽວກັບການສືບສວນສອບສວນເຫດການ ແລະ ອຸປະຕິ ເຫດຂອງເຮືອບິນ (The MOU between the Authority in Charge of Aircraft Accident Investigation of ASEAN Member States and the Civil Aviation Administration of China on Cooperation Relating to Aircraft Acciedent and Incident Investigation.
  5. ອະນຸສັນຍາວ່າດ້ວຍການຈັດຕັ້ງປະຕິບັດຂໍ້ຜູກພັນໝວດທີ 10 ກ່ຽວກັບການບໍລິການຂົນສົ່ງທາງອາກາດ ພາຍໃຕ້ ກອບສັນຍາອາຊຽນ ວ່າດ້ວຍການບໍລິການ (The Protocol to Implement the 10th Package of Commitment on Air Transport Service Under AFAS).

ເດີນທາງໄປຮ່ວມກອງປະຊຸມລັດຖະມົນຕີຂົນສົ່ງອາຊຽນ ຄັ້ງທີ 23 ແມ່ນສຳເລັດຜົນຕາມແຜນການເປັນຢ່າງດີ, ໂດຍ ສະເພາະແມ່ນການລົງນາມໃນສັນຍາຂົນສົ່ງທາງອາກາດ 2 ຝ່າຍລະຫວ່າງ ສປປ ລາວ ແລະປະເທດຟີລິບປິນ, ຊຶ່ງແມ່ນ ເປັນສັນຍາເປີດກວ້າງການຮ່ວມມືດ້ານການບິນພົນລະເຮືອນ ລະຫວ່າງສອງປະເທດເວົ້າລວມ, ເວົ້າສະເພາະແມ່ນເພື່ອ ອຳນວຍຄວາມສະດວກ ໃຫ້ແກ່ສາຍການບິນທີ່ຖືກແຕ່ງຕັ້ງຂອງທັງສອງຝ່າຍ ສາມາດບິນໄປມາຫາສູ່ ແລະ ບິນຜ່ານນ່ານ ຟ້າຂອງກັນ ແລະກັນໄດ້, ແນໃສ່ຊຸກຍູ້ ແລະສົ່ງເສີມຂະແໜງການຄ້າ, ການລົງທຶນ ແລະການທ່ອງທ່ຽວ ລະຫວ່າງສອງ ຝ່າຍ ແລະອາຊຽນ ໃນຕໍ່ໜ້າ.

Additional information