ສະຖາບັນຄົ້ນຄວ້າ ຍທຂ ຮ່ວມກັບຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດ ຄົ້ນຄ້ວາການຄຸ້ມຄອງ ແລະ ພັດທະນາຕົວເມືອງ

ໃນຕອນບ່າຍຂອງວັນທີ 27 ກັນຍາ 2017 ເວລາ 16:00 ໂມງ ຢູ່ທີ່ຫ້ອງປະຊຸມສະຖາບັນຄົ້ນຄ້ວາໂຍທາທິການ ແລະ ຂົນສົ່ງ ໄດ້ມີພິທີເຊັນບົດບັນທຶກຄວາມເຂົ້າໃຈການຮ່ວມມືລະຫວ່າງ ສະຖາບັນຄົ້ນຄ້ວາໂຍທາທິການ ແລະຂົນສົ່ງ ກັບ ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດລາວ, ໃຫ້ກຽດເຂົ້າຮ່ວມໃນພິທີ ມີ ທ່ານ ປອ ສັນຕິສັກ ສິມມາລາວົງ, ຮອງລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ຮສ.ປອ ພຸດ ສິມມາລາວົງ ສະມາຊິກສະພາ ແຫ່ງຊາດ, ຮອງອະທິການບໍດີມະຫາວິທະຍາໄລ ແຫ່ງຊາດລາວ. ທ່ານ ສຈ.ປອ ບຸນເຫລື່ອມ ສີສຸລາດ ຜູ້ຊ່ວຍ ລັດຖະມົນຕີ ກະຊວງ ຍທຂ,  ທ່ານ ສຈ.ປອ ສົມພອນ ເດດອຸດົມ ທີ່ປຶກສາລັດຖະມົນຕີກະຊວງ ຍທຂ. ທ່ານ ນ ພອນສະຫວັນ ແພງສີດາ ຫົວໜ້າສະຖາບັນຄົ້ນຄ້ວາ ຍທຂ. ທ່ານ ຮອງ ສຈ. ດາສັກ ອຸເທນທະປັນຍາ ຄະນະບໍດີ ຄະນະວິຊາສະຖາປັດ ຕະຍະກຳສາດ ມະຫາວິທະຍາໄລແຫ່ງຊາດ ພ້ອມດ້ວຍພະນັກງານວິຊາການທັງສອງຝ່າຍ ເຂົ້າຮ່ວມ.

ບົດບັນທຶກຄວາມເຂົ້າໃຈການຮ່ວມມືສະບັບນີ້ຈະໄດ້ດຳເນີນໄປເປັນເວລາ 5 ປີ ເຊິ່ງທັງສອງຝ່າຍເຫັນດີ ເປັນເອກະ ພາບກັນ ຄົ້ນຄ້ວາດ້ານວິທະຍາສາດ, ການບໍລິການວິຊາການ, ການຄຸ້ມຄອງຜັງເມືອງ ແລະ ການພັດທະນາ ຕົວເມືອງ, ເຊິ່ງໃນນີ້ຈະໄດ້ພ້ອມກັນສຶກສາເອກະລັກ ຂອງທ້ອງຖິ່ນ ແລະ ຂອງຊາດ ໃນສະຖາປັດຕະຍະກຳ, ມາດຕະຖານທີ່ພັກ ພາອາໃສລາຄາປະຢັດ, ຄົ້ນຄ້ວາຜັງເມືອງໃນແຕ່ລະ ລະດັບ, ການຄຸ້ມຄອງບໍລິຫານ ແລະ ການພັດທະນາຕົວເມືອງໃຫ້ ຄົບຊຸດ ພ້ອມທັງຄົ້ນຄ້ວາອອກແບບສະຖາປັດ ຕະຍະກຳທີ່ມີຄວາມຫລາກຫລາຍ ແລະ ມີເອກະລັກ ຊົນເຜົ່າ ແລະ ອື່ນໆ, ຈາກນັ້ນຈະໄດ້ເຜີຍແຜ່ຜົນຂອງການຄົ້ນຄ້ວາໂດຍການຈັດຝຶກອົບຮົມ, ສ້າງຄວາມເຂັ້ມແຂງໃຫ້ ອົງການປົກຄອງທ້ອງຖິ່ນ. ພັດທະນາຫັລກສູດການຝຶກອົບຮົມໃຫ້ເປັນລະບົບ ຕາມມາດຕະຖານມະຫາວິທະຍາໄລແຫ່ງຊາດ, ເຄື່ອນໄຫວແລກປ່ຽນ ດ້ານວິຊາການຮ່ວມກັນ ໃນຮູບແບບກອງປະຊຸມ, ສຳມະນາໃຫ້ເປັນປົກກະຕິ ແລະ ຕໍ່ເນື່ອງ. ເຊິ່ງໃນນີ້ທັງສອງກະຊວງ ຈະໄດ້ພ້ອມກັນສົ່ງເສີມເພື່ອຂົນຂວາຍແຫລ່ງງົບປະມານໃນການຈັດຕັ້ງປະຕິບັດ ໃຫ້ປະກົດຜົນເປັນຈິງ.

Additional information