ກະຊວງ ຍທຂ ມີແຜນຈະປັບປຸງໂຄງການນ້ຳປະປາ, ສຸຂະພິບານ ແລະ ສຸຂາອະນາໄມ

ໃນຕອນບ່າຍຂອງວັນທີ 28 ກັນຍາ 2017 ເວລາ 01 ໂມງ 30 ນາທີ ຢູ່ທີ່ຫ້ອງຮັບແຂກ ກະຊວງໂຍທາທິການ ແລະ ຂົນສົ່ງ ທ່ານ ປອ ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ພ້ອມດ້ວຍຄະນະ ໄດ້ຮັບຕ້ອນ ທ່ານ Jean Christophe ຜູ້ຕາງໜ້າຈາກ ທະນາຄານໂລກ ພ້ອມດ້ວຍຄະນະ, ໃນໂອກາດທີ່ມາ ເຮັດວຽກຢູ່ ສປປ ລາວ ໃນລະຫວ່າງວັນທີ 25/9-3/10/2017 ນີ້.

ໃນໂອກາດນີ້ ທ່ານ ປອ ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ສະແດງ ຄວາມຕ້ອນຮັບຢ່າງອົບອຸ່ນ ແລະ ສະນິດສະໜົມຕໍ່ການມາຢ້ຽມຢາມ ພ້ອມທັງໄດ້ປຶກສາຫາລືກັນ ກ່ຽວກັບການຮ່ວມມື ທີ່ສອງຝ່າຍສົນໃຈຮ່ວມກັນ ເຊັ່ນ: ແຜນງານຮ່ວມມືລະຫວ່າງທະນາຄານໂລກ ແລະ ລັດຖະບານລາວ ໃນສົກປີ 2016-2021 ເພື່ອສະໜັບສະໜູນແກ້ໄຂບັນຫາດ້ານໂພສະນາການ, ເຊິ່ງພົວພັນເຖິງການເຂົ້າເຖິງນ້ຳປະປາ, ສຸຂາ ພິບານ ແລະ ອະນາໄມທີ່ດີ. ເຊິ່ງບັນດາໜ້າວຽກດັ່ງກ່າວ ທະນາຄານໂລກເຫັນວ່າສອດຄ່ອງກັບພາລະບົດບາດ ແລະ ຄວາມຮັບຜິດຊອບຂອງກະຊວງ ຍທຂ ໂດຍສະເພາະແມ່ນກົມນ້ຳປະປາ. ໂຄງການດັ່ງກ່າວນີ້ຈະໃຫ້ການສະໜັບ ສະໜູນລະບົບນ້ຳ, ສຸຂາພິບານ ແລະ ອະນາໄມ ຢູ່ໃນເຂດຊົນນະບົດໃຫ້ມີຄວາມຍືນຍົງ, ລວມທັງການສ້າງຂີດຄວາມ ສາມາດໃຫ້ພາກລັດ ຢູ່ຂັ້ນສູນກາງ, ຂັ້ນແຂວງ ແລະ ເມືອງ ຢູ່ໃນ 4 ແຂວງເປົ້າໝາຍເຊັ່ນ: ແຂວງຜົ້ງສາລີ, ແຂວງ ຫລວງນ້ຳທາ, ແຂວງອຸດົມໄຊ ແລະ ແຂວງຊຽງຂວາງ.

Additional information