ກະຊວງໂຍທາທິການ ແລະ ຂົນສົ່ງ ເຊື່ອມຊຶມເອກະສານ ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ

ໃນຕອນເຊົ້າຂອງວັນທີ 27 ກັນຍາ 2017 ຢູ່ທີ່ຫ້ອງປະຊຸມໃຫຍ່ກະຊວງ ຍທຂ ໄດ້ມີພິທີເຊື່ອມຊຶມວັນສ້າງຕັ້ງ ສະຫະພັນນັກຮົບເກົ່າແຫ່ງຊາດລາວ ຄົບຮອບ 15 ປີ, ແຕ່ວັນທີ 9/9/2002 – 9/9/2017. ໃຫ້ກຽດຂຶ້ນປະຖະກະຖາ ໂດຍ ສະຫາຍ ພົນຈັດຕະວາ ຄຳຫອມ ແສງບົວລົມ ວິລະຊົນແຫ່ງຊາດ, ຮອງເລຂາຄະນະພັກ, ຮອງປະທານ ສະຫະພັນນັກຮົບເກົ່າແຫ່ງຊາດລາວ, ໃຫ້ກຽດເຂົ້າຮ່ວມຮັບຟັງໃນຄັ້ງນີ້ ມີ ທ່ານ ລັດຕະນະມະນີ ຄູນນີວົງ, ຮອງ ເລຂາພັກຮອງລັດຖະມົນຕີກະຊວງ ຍທຂ, ມີທ່ານ ປອ ສັນຕິສຸກ ສິມມາລາວົງ, ຄະນະປະຈຳພັກ, ຮອງລັດຖະມົນຕີ ກະຊວງ ຍທຂ, ພ້ອມດ້ວຍພະນັກງານຫລັກແຫລ່ງ ຂອງກະຊວງ ຍທຂ ເຂົ້າຮ່ວມຢ່າງພ້ອມພຽງ.

ຜ່ານການເຊື່ອມຊຶມວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ໃນຄັ້ງນີ້ ເຮັດໃຫ້ພະນັກງານຫລັກ ແຫລ່ງຂອງ ກະຊວງ ຍທຂ ເພີ່ມຄວາມຮັບຮູ້ ແລະ ຄວາມເຂົ້າໃຈ ກ່ຽວກັບຄວາມໝາຍຄວາມສຳຄັນ ແລະ ເງື່ອນໄຂທີ່ພາໃຫ້ເກີດ ມີສະຫະພັນນັກຮົບເກົ່າແຫ່ງຊາດລາວ, ເຂົ້າໃຈເຖິງມູນເຊື້ອ ແລະ ຜົນງານ ອັນຍິ່ງໃຫຍ່ຂອງນັກຮົບເກົ່າ ໂດຍ ສະເພາະແມ່ນຄວາມພິລາດອາດຫານ, ຄວາມດຸໝັ້ນ, ຄວາມອົດທົນ ແລະ ຄວາມມີໄຫວພິກ ໃນສະໄໝຕໍ່ສູ້ກອບກູ້ ຄວາມເປັນເອກະລາດຂອງຊາດ ຈົນຮອດສະໄໝປົກປັກ ຮັກສາ ແລະ ສ້າງສາປະເທດຊາດ.

ປະຈຸບັນ ສະຫະພັນນັກຮົບເກົ່າກໍ່ມີພາລະບົດບາດ ແລະ ໜ້າທີ່ຂອງຕົນ ເປັນໃຈກາງໃຫ້ແກ່ຖັນແຖວ ນັກຮົບເກົ່າ ກ່ຽວກັບການພົວພັນລະຫວ່າງສາຍຕັ້ງ ແລະ ສາຍຂວາງ ພົວພັນລະຫວ່າງຂັ້ນລຸ່ມ ແລະ ຂັ້ນເທິງ ເພື່ອປັບປຸງ ການຈັດຕັ້ງວາງແນວທາງນະໂຍບາຍຕ່າງໆ ໃຫ້ສອດຄ່ອງກັບແນວທາງນະໂຍບາຍ ຂອງພັກໃນແຕ່ລະໄລຍະຢ່າງ ກົມກຽວ, ພົວພັນຮ່ວມມືກັບສະຫະພັນນັກຮົບເກົ່າຕ່າງປະເທດ, ພາກພື້ນ ແລະ ສາກົນຢ່າງກ້ວາງຂວາງ.

ພິທີເຊື່ອມຊຶມດັ່ງກ່າວໄດ້ດຳເນີນໄປເປັນເວລາເຄິ່ງວັນ ແລະ ໄດ້ປິດລົງໃນເວລາ 11:45 ນາທີ ຂອງວັນດຽວກັນ.

Additional information