ສຳມະນາການຄຸ້ມຄອງພື້ນຖານໂຄງລ່າງເສັ້ນທາງ

ໃນຕອນເຊົ້າວັນທີ 14 ກັນຍາ 2017 ຢູ່ທີ່ສະຖາບັນຝຶກອົບຮົມ ໂຍທາທິການ ແລະ ຂົນສົ່ງ (ຫຼັກ 19) ໄດ້ມີ ພິທີເປີດສຳມະນາກ່ຽວກັບການຄຸ້ມຄອງພື້ນຖານໂຄງລ່າງເສັ້ນທາງ ROAD INFRASTRUCTURE ASSET MANAGAMENT ພາຍໃຕ້ການເປັນປະທານ ຂອງ ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີ ກະຊວງ ຍທຂ. ມີຜູ້ເຂົ້າຮ່ວມສຳມະນາທັງໝົດ 20 ທ່ານ, ຍິງ 2 ທ່ານ.   ໃນນີ້ມາຈາກ ກົມຂົວທາງ 4 ທ່ານ, ສະຖາບັນຄົ້ນຄວ້າ ຍທຂ 2 ທ່ານ, ສະຖາບັນຝຶກອົບຮົມ ຍທຂ 2 ທ່ານ, ພະແນກ ຍທຂ ນະຄອນຫຼວງ ວຽງຈັນ 2 ທ່ານ, ຄະນະວິສະວະກຳ 2 ທ່ານ, ຫ້ອງການ ຍທຂ ເມືອງສີໂຄດຕະບອງ 1 ທ່ານ, ຫ້ອງການ ຍທຂ ເມືອງສີສັດຕະນາກ 2 ທ່ານ, ຫ້ອງການ ຍທຂ ເມືອງໄຊເສດຖາ 2 ທ່ານ, ຫ້ອງການ ຍທຂ ເມືອງຈັນທະບູລີ 1 ທ່ານ, ແລະ ຫ້ອງການ ເມືອງຫາດຊາຍຟອງ 2 ທ່ານ.

 ກອງປະຊຸມໃນຄັ້ງນີ້ໄດ້ຍົກລະດັບຄວາມຮູ້ຄວາມເຂົ້າໃຈ ກ່ຽວກັບການຄຸ້ມຄອງກິດຈະການຂົວທາງ, ການ ປະຕິບັດຕົວຈິງກ່ຽວກັບການຄຸ້ມຄອງກິດຈະການຂົວທາງ, ການຄຸ້ມຄອງຂໍ້ມູນ ແລະ ການວາງແຜນບູລະ ນະຮັກສາສຳລັບກິດຈະການຂົວທາງ, ແນວຄິດກ່ຽວກັບການບູລະນະຮັກສາທາງ ແລະ ຄາດຄະເນການ ເສື່ອມສະພາບຂອງທາງ, ການກວດກາອຸປະກອນອື່ນໆຂອງທາງ ແລະ ການບູລະນະຮັກສາທາງ, ສະພາບ ການດ້ານພື້ນຖານໂຄງລ່າງໃນປະເທດລາວ, ປຶກສາຫາລືດ້ານການບູ ລະນະຮັກສາເສັ້ນທາງ ແລະ ການພັດ ທະນາໂຄງລ່າງພື້ນຖານເສັ້ນທາງ.

ໃນພິທີດັ່ງກ່າວໄດ້ຮັບຟັງໃຫ້ທິດຊີ້ນຳຈາກທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີ ກະຊວງ ຍທຂ, ເຊິ່ງທ່ານໄດ້ເນັ້ນຢ້ຳໃຫ້ບັນດານັກສຳມະກອນ ສຸມທຸກສະຕິປັນຍາ ເຂົ້າໃນການສຳມະນາຄັ້ງນີ້ເພື່ອ ນຳເອົາບົດຮຽນທີ່ໄດ້ໄປໜູນໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງ ໃຫ້ມີປະສິດທິພາບ ແລະ ໃຫ້ ບັນລຸຕາມຄາດໝາຍ.

 

 

 

 

Additional information