ຝຶກອົບຮົມການຄຸ້ມຄອງໂຄງການສຳລັບການກໍ່ສ້າງເສັ້ນທາງ

  ໃນ​ປະ​ຈຸ​ບັນ, ​ສ​ ປ​ ປ​ ລາວ ​ແມ່ນ​ພວມ​ສຸມ​ໃສ່ ການ​ວາງ​ແຜນ ແລະ ກໍ່​ສ້າງ​ເສັ້ນ​ທາງ​ໃນ​ຂອບ​ເຂດ​ທົ່ວ​ປະ​ເທດ ເພື່ອ​ເຮັດ​ໃຫ້​ປະ​ຊາ​ຊົນ​ລາວ​ໃນ​ຂອບ​ເຂດ​ທົ່ວ​ປະ​ເທດ​ສາ​ມາດ​ເຊື່ອມ​ໂຍງ ແລະ ເຊື່ອມ​ຈອດ​ກັນ​ໄດ້​ຢ່າງ​ທົ່ວ​ເຖີງ, ນອກນີ້ ຍັງ​ແນ່​ໃສ​ເຮັດ​ໃຫ້ ສ​ ປ​ ປ ລາວ ສາ​ມາດ​ເຊື່ອມ​ໂຍງ​​ຢ່າງ​ໂລ່ງ​ລຽນກັບ​ບັນ​ດາ​ປະ​ເທດ​ເພື່ອນ​ບ້ານ​ທີ່​ມີ​ຊາຍ​ແດນ​ຕິດ​​ຈອດ. ເພື່ອ​ເຮັດ​ໃຫ້​ການກໍ່​ສ້າງ ແລະ ບູ​ລະ​ນະ​ຮັກ​ສາ​ເສັ້ນ​ທາງ​ໃຫ້​ມີ​ປະ​ສິດ​ຕິ​ຜົນ​ສູງ ພວກ​ເຮົາ​ຈື່ງ​ມີ​ຄວາມ​ຈຳ​ເປັນ​ຕ້ອງ​ໄດ້​ຮຽນ​ຮູ້, ປຶກ​ສາ​ຫາ​ລື ແລະ ເປັນ​ເອ​ກະ​ພາບ​ກັນ​ໃນ​ດ້ານ​ເຕັກ​ນິກ​ການກໍ່​ສ້າງ ແລະ ຄຸ້ມ​ຄອງ-ບູ​ລະ​ນະ​ຮັກ​ສາ ບັນ​ດາ​ເສັ້ນ​ທາງ​ໃຫ້​ມີ​ຄວາມ​ຍືນ​ຍົງ.

 ໂດຍ​ອີງ​ຕາມ​ທິດ​ຊີ້​ນຳ​ຂອງ​​ຄະ​ນະ​ພັກ ຄະ​ນະ​ນຳກະ​ຊວງ ຍ​ທ​ຂ, ສະ​ຖາ​ບັນ​ຝຶກ​ອົບ​ຮົມ ໂຍ​ທາ​ທິ​ການ​ແລະ ຂົນ​ສົ່ງ ຈື່ງ​ໄດ້​ກະ​ກຽມຫຼັກ​ສູດ​ຝຶກ​ອົບ​ຮົມ ການ​ຄຸ້ມ​ຄອງ​ໂຄງ​ການ​ສຳ​ລັບ​ການກໍ່​ສ້າງ​ເສັ້ນ​ທາງ ໂດຍ​​ມີການ​ປຶກ​ສາ​ຫາ​ລື​ກັບ​ກົມ​ຂົວ-ທາງ ແລະ ໂຄງ​ການ​ພັດ​ທະ​ນາ​ໂຄງ​ລ່າງ​ເສັ້ນ​ທາງ​ທີ 6 (RIP 6). ຫຼັກ​ສູດ​ຝຶກ​ອົບ​ຮົມ​ທີ່​ກ່າວ​ມານີ້ ແມ່ນ​ແນ່​ໃສ່​ຍົກ​ລະ​ດັບ​ຄວາມ​ຮູ້ ​ແລະ ຄວາມ​ສາ​ມາດ​ໃຫ້​ແກ່​ພະ​ນັກ​ງານ​ທີ່​ພວມ​ເຮັດ​ວຽກ​ໃນ​ຂະ​ແໜງ​ຂົວ​-ທາງ ໂດຍ​ສະ​ເພາະ​ຜູ້​ທີ່​ເປັນ​ຫົວ​ໜ້າ​ໂຄງ​ການ ຫຼື​ ພວມ​ທີ່​ຈະ​ເປັນ​ຫົວ​ໜ້າ​ໂຄງ​ການກໍ່​ສ້າງ​ເສັ້ນ​ທາງ  ໃຫ້​ໄດ້​ຮຽນ​ຮູ້ເຂົ້າ​ໃຈ​ແຈ້ງ​ ກ່ຽວ​ກັບ ​1.ການ​ກະ​ກຽມ​ໂຄງ​ການ, ເອ​ກະ​ສານ​ສັນ​ຍາ ແລະ ການ​ຈັດ​ຊື້-ຈັດ​ຈ້າງ​ຕ່າງໆ, ລະ​ບົບ​ການ​ລາຍ​ງານ ແລະ ການ​ເບີກ​ຈ່າຍ; 2. ສາ​ມາດ​ຄຸ້ມ​ຄອງ-ບໍ​ລິ​ຫານ ການກໍ່​ສ້າງເສັ້ນ​ທາງ​ໄດ້​ຢ່າງ​ເປັບ​ລະ​ບົບ ແລະ ຖືກ​ຕ້ອງ​ຕາມ​​ມາດ​ຕະ​ຖານ​ເຕັກ​ນິກ; 3. ຍົກ​ລະ​ດັບ​ຄວາມ​ຮູ້​ກ່ຽວ​ກັບ ເຕັກໂນໂລຢີຂອງການກໍ່ສ້າງ (ວັດສະດຸກໍ່ສ້າງ, ການປູຜິວໜ້າທາງ, ວຽກເບຕົງ, ແລະອື່ນໆ); ການຄວບຄຸມຄຸນນະພາບ ແລະ ການທົດລອງວັດສະດຸ; ການປະເມີນຜົນກະທົບດ້ານສິ່ງແວດລ້ອມ ແລະ ສັງຄົມ;  ແລະ ຄວາມປອດໄພໃນສະໜາມກໍ່ສ້າງ.

 ​      ການ​ຝຶກ​ອົບ​ຮົມ​ຫຼັກ​ສູດ: ການ​ຄຸ້ມ​ຄອງ​ໂຄງ​ການ​ສຳ​ລັບ​ການກໍ່​ສ້າງ​ເສັ້ນ​ທາງ ທີ່​ສະ​ຖາ​ບັນ​ຝຶກ​ອົບ​ຮົມ ຍ​ທ​ຂ, ໃນຄັ້ງ​ວັນ​ທີ່ 31 ກໍ​ລະ​ກົດ - 11 ສິງ​ຫາ 2017 ໄດ້​ຈັດ​ຂື້ນ​ພາຍ​ໃຕ້ການ​ເປັນ​ປະ​ທານ ຂອງ ທ່ານ ນາງ  ວິໄລຄຳ ໂພສາລາດ ຮອງ ລັດ​ຖະ​ມົນ​ຕີ ກະ​ຊວງ ຍ​ທ​ຂ, ແລະ ເປັນ​ຄະ​ນະ​ປະ​ທານ​ຮ່ວມ​ໂດຍ ທ່ານ ແພງ ດວງ​ເງີນ ຫົວ​ໜ້າ​ກົມ​ຂົວ​ທາງ; ທ່ານ ແທ່ນ​ຄຳ ທອງ​ບົນ ​ຫົວ​ໜ້າສະ​ຖາ​ບັນ ຍ​ທ​ຂ. ເຊີ່ງ​ມີ​ຜູ້​ເຂົ້າ​ຮ່ວມ​ຈາກ ກົມ​ຂົວ​ທາງ, ພະ​ແນກ ຍ​ທ​ຂ ແຂວງ ຂອງ ແຂວງ ຜົ້ງ​ສາ​ລີ, ຫົວ​ພັນ, ອຸ​ດົມ​ໄຊ, ໄຊ​ຍະ​ບູ​ລີ, ບໍ​ລິ​ຄຳ​ໄຊ ແລະ ຊຽງ​ຂວາງ ທັງ​ໝົດ 26 ຄົນ.

Additional information