ພິທີເປີດການກໍ່ສ້າງຂົວເຊກຸມກາມ ແລະ ຂົວເຊທ່າມວກ

  ພິທີ​ເປີດການກໍ່ສ້າງ ຂົວເຊກຸມກາມ ແລະ ຂົວເຊທ່າມວກ ຕາມທາງຫລວງແຫ່ງຊາດເລກ 9 ຢ່າງເປັນທາງການ​ ໃນ​ວັນທີ 3 ສິງຫາ 2017 ທີ່​ເມືອງພະລານໄຊ ແຂວງສະຫວັນນະເຂດ, ​ໂດຍ​ການ​ເຂົ້າ​ຮ່ວມ​ຂອງທ່ານ ປອ. ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ ​ໂຍທາ​ທິການ ​ແລະ ຂົນ​ສົ່ງ; ທ່ານ ປອ. ສຸພັນ ແກ້ວມີໄຊ, ລັດຖະມົນຕີກະຊວງແຜນການ ແລະການລົງທຶນ; ທ່ານ ສັນຕິພາບ ພົມວິຫານ ເຈົ້າແຂວງ ແຂວງສະຫວັນນະເຂດ; ທ່ານ ຮີຄິຮາຣະ, ເອກອັກຄະລັດຖະທູດຍີ່ປຸ່ນ ປະຈຳ ສປປ ລາວ; ທ່ານ ໂຢຊິຮາຣຸ ໂຢເນຢາມະ, ຫົວໜ້າອົງການໄຈກາ ປະຈຳ ສປປ ລາວ; ທ່ານຮອງລັດຖະມົນຕີ​, ທ່ານຮອງ​ເຈົ້າ​​ແຂວງ, ທ່ານ​ເຈົ້າ​ເມືອງ, ຮອງເຈົ້າເມືອງ, ແຂກ​ທີ່​ມີ​ກຽດ, ເຖົ້າ​ແກ່​ແນວ​ໂຮມ ​ແລະ ພໍ່​ແມ່​ປະຊາຊົນ ​ເມືອງພະລານໄຊ ແຂວງສະຫວັນນະເຂດ​ເຂົ້າ​ຮ່ວມ.

 ​ໂຄງການ​ກໍ່ສ້າງຂົວເຊກຸມກາມ ແລະ ຂົວເຊທ່າມວກ ແມ່ນໂຄງການທີ່ມີຄວາມໝາຍສຳຄັນຢ່າງຍິ່ງທາງດ້ານຄົມມະນາຄົມ-ຂົນສົ່ງ, ເນື່ອງຈາກວ່າເປັນເສັ້ນທາງອະນຸພາກພື້ນ ທີ່ເປັນແລວເສດຖະກິດ ຕາເວັນອອກ-ຕາເວັນຕົກ, ຊຶ່ງປະກອບສ່ວນອັນສຳຄັນ ຕໍ່ການພັດທະນາເສດຖະກິດ-ສັງຄົມຂອງ ສປປ ລາວ, ເຮັດໃຫ້ການໄປມາຫາສູ່ ຂອງປະຊາຊົນສະດວກສະບາຍຂຶ້ນກວ່າເກົ່າ  ເຮັດປະຊາຊົນບັນດາເຜົ່າໃນຂົງເຂດນີ້ ມີຊີວິດການເປັນຢູ່ທີ່ດີຂຶ້ນ, ທັງເປັນການສົ່ງເສີມການຄ້າ, ການລົງທຶນ ແລະການທ່ອງທ່ຽວ ໃຫ້ຂະຫຍາຍຕົວຂຶ້ນອີກດ້ວຍ.

ໂດຍເຫັນໄດ້ຄວາມສຳຄັນຄືດັ່ງກ່າວນັ້ນ ລັດຖະບານຍີ່ປຸ່ນຈຶ່ງໄດ້ຕອບສະໜອງຕາມການ ສະເໜີຂອງລັດຖະບານ ສປປ ລາວ ແລະໄດ້ອະນຸມັດໃຫ້ການຊ່ວຍເຫລືອລ້າ ແກ່ໂຄງການກໍ່ສ້າງ ຂົວທັງ 2 ແຫ່ງນີ້ ໂດຍຜ່ານອົງການໄຈກາ ໃນມູນຄ່າ 2,52 ຕື້ເຢັນ, ສ່ວນລັດຖະບານ ສປປ ລາວ ແມ່ນປະຕິບັດຕາມພັນທະຂອງຕົນ ຕາມລະບຽບການຂອງຜູ້ໃຫ້ທຶນ ຄືດັ່ງບັນດາໂຄງການຮ່ວມມືລາວ-ຍີ່ປຸ່ນ ທີ່ເຄີຍໄດ້ປະຕິບັດຜ່ານມາ ເພື່ອເຮັດໃຫ້ໂຄງການນີ້ສຳເລັດຜົນຕາມຄາດໝາຍ.

  ການຊ່ວຍເຫລືອຂອງລັດຖະບານ ແລະປະຊາຊົນຍີ່ປຸ່ນ ໃຫ້ແກ່ໂຄງການກໍ່ສ້າງຂົວ 2 ແຫ່ງນີ້ ແມ່ນສຸດທີ່ລ້ຳຄ່າ ແລະ ມີຄວາມໝາຍສຳຄັນຫລາຍ, ຊຶ່ງເປັນການເສີມຂະຫຍາຍສາຍພົວພັນລາວ-ຍີ່ປຸ່ນ ໃຫ້ແຕກດອກອອກຜົນຂຶ້ນໄປເລື້ອຍໆ ປະກອບສ່ວນເຂົ້າໃນການພັດທະເສດຖະກິດ-ສັງຄົມຂອງແຂວງສະຫວັນນະເຂດ ກໍ່ຄືຂອງ ສປປ ລາວ ໃຫ້ເຕີບໃຫຍ່ຂະຫຍາຍຕົວຂຶ້ນ.​ໂດຍຕາງໜ້າໃຫ້ລັດຖະບານ ສປປ ລາວ ຂໍສະແດງຄວາມຂອບໃຈຢ່າງຈິງໃຈ ແລະເລິກເຊິ່ງ ມາຍັງລັດຖະບານ ແລະປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍແກ່ລັດຖະບານ ແລະປະຊາຊົນລາວໃນໄລຍະຜ່ານມາ ກໍ່ຄືປະຈຸບັນ, ພິເສດ ແມ່ນໂຄງການກໍ່ສ້າງຂົວ 2 ແຫ່ງນີ້. ພ້ອມກັນນີ້, ຂ້າພະເຈົ້າຫວັງເປັນຢ່າງຍິ່ງວ່າ ຈະໄດ້ຮັບການ  ສະໜັບສະໜູນ ແລະຊ່ວຍເຫລືອຫລາຍຂຶ້ນຕື່ມ ຈາກລັດຖະບານ ແລະປະຊາຊົນຍີ່ປຸ່ນ ໃນຕໍ່ໜ້າ.

Additional information