ທ່ານລັດຖະມົນຕີ ກະຊວງ ຍທຂ ພ້ອມດ້ວຍຄະນະ ເດີນທາງໄປເຄື່ອນໄຫວວຽກງານລັດຖະການ ທີ່ປະເທດຍີ່ປຸ່ນ

  ໂດຍອີງການເຊື້ອເຊີນຂອງອົງການໄຈກາ (JICA) ແຫ່ງປະເທດຍີ່ປຸ່ນ, ສະບັບລົງວັນທີ 15/6/2017, ໂດຍສະເພາະແມ່ນການພົວພັນຮ່ວມມື ໃນຂະແໜງໂຍທາທິການ ແລະຂົນສົ່ງ ລະຫວ່າງກະຊວງ ຍທຂ ແຫ່ງ ສປປ ລາວ ແລະກະຊວງທີ່ດິນ ພື້ນຖານໂຄງລ່າງ ຂົນສົ່ງ ແລະທ່ອງທ່ຽວ (MLIT) ແຫ່ງປະເທດຍີ່ປຸ່ນ.

  ໃນລະຫວ່າງວັນທີ 25-30/7/2017 ທີ່ຜ່ານມາ, ທ່ານ ປອ. ບຸນຈັນ ສິນທະວົງ, ລັດຖະມົນຕີ ກະຊວງໂຍທາທິການ ແລະຂົນສົ່ງ ພ້ອມດ້ວຍຄະນະ, ຊຶ່ງປະກອບດ້ວຍທ່ານ ວຽງສະຫວັດ ສີພັນດອນ ຮອງລັດຖະມົນຕີ, ທ່ານຫົວໜ້າຫ້ອງການກະຊວງ, ຫົວໜ້າກົມການບິນພົນລະເຮືອນ, ຜູ້ອຳນວຍການລັດວິສາຫະກິດ, ທ່ານຮອງຫົວໜ້າກົມຂົນສົ່ງ ແລະຜູ້ຕາງໜ້າຈາກລັດວິສາຫະກິດທີ່ກ້ຽວຂ້ອງທັງໝົດ 11 ທ່ານ  ໄດ້ເດີນທາງໄປເຄື່ອນໄຫວວຽກງານລັດຖະການ ທີ່ປະເທດຍີ່ປຸ່ນຢ່າງເປັນທາງການ.

 ຈຸດປະສົງຫລັກ ຂອງການມາຢ້ຽມຢາມ ແລະເຮັດວຽກຢູ່ປະເທດຍີ່ປຸ່ນ ຂອງຂ້າພະເຈົ້າພ້ອມດ້ວຍຄະນະໃນຄັ້ງນີ້ ແມ່ນເພື່ອທົບທວນຄືນ ການຈັດຕັ້ງປະຕິບັດບົດບັນທຶກຊ່ວຍຈຳ ລະຫວ່າງກະຊວງ ຍທຂ ສປປ ລາວ ແລະກະຊວງ MLIT ແຫ່ງປະເທດຍີ່ປຸ່ນ ທີ່ໄດ້ເຊັນກັນໃນວັນທີ 21/10/2014 ແລະເພື່ອຈັດຕັ້ງຜັນຂະຫຍາຍ ຜົນການເຂົ້າຮ່ວມກອງປະຊຸມສາກົນ ກ່ຽວກັບອະນາຄົດຂອງອາຊີ ຄັ້ງທີ 23 ແລະຜົນການຢ້ຽມຢາມປະເທດຍີ່ປຸ່ນ ຢ່າງເປັນທາງການຂອງພະນະທ່ານນາຍົກ ລັດຖະມົນຕີ ລະຫວ່າງວັນທີ      4-7/6/2017 ທີ່ຜ່ານມາ.

 ໃນການໄປເຮັດວຽກດັ່ງກ່າວ ຄະນະຜູ້ແທນໄດ້ພົບປະເຮັດວຽກ ປຶກສາຫາລືແລກປ່ຽນ ກັບບັນດາພາກສ່ວນທີ່ກ່ຽວຂ້ອງຕ່າງໆທີ່ສຳຄັນ ດັ່ງນີ້:

  1. ທ່ານ ເຄ່ອິຈິ ອິຊິອິ (Keiichi Ishii), ລັດຖະມົນຕີກະຊວງທີ່ດິນ ພື້ນຖານໂຄງລ່າງ ຂົນສົ່ງ ແລະທ່ອງທ່ຽວ (MLIT) ແຫ່ງປະເທດຍີ່ປຸ່ນ ພ້ອມດ້ວຍບັນດາທ່ານຮອງລັດຖະມົນຕີ ແລະຄະນະ.
  2. ທ່ານ ເອະຈິມະ ຊິນຢະ (Ejima Shinya), ຮອງປະທານອົງການ JICA ແຫ່ງປະເທດຍີ່ປຸ່ນ ແລະຄະນະ.
  3. ບັນດາຜູ້ອຳນວຍການຈາກພາກສ່ວນວິສາຫະກິດທີ່ລົງທຶນຢູ່ ສປປ ລາວ ເຊັ່ນ: ອົງການມູນນິທິ Sagawa Global Holdings, ບໍລິສັດ Nippon Epress, Katahira, Toyota Tsusho, Jalux, Oriental Consultants Clobal ແລະ Nikken.

ເພື່ອເປັນການສືບຕໍ່ການຮ່ວມມື ຂອງສອງກະຊວງໃນຕໍ່ໜ້າ, ກະຊວງ ຍທຂ ແຫ່ງ ສປປ ລາວ ແລະກະຊວງ MLIT ແຫ່ງປະເທດຍີ່ປຸ່ນ ໃນລະດັບສູງ, ທ່ານລັດຖະມົນຕີ ຂອງທັງສອງກະຊວງ ໄດ້ລົງເລິກປຶກສາຫາລື ແລະແລກປ່ຽນ ກ່ຽວກັບບັນດາໂຄງການຮ່ວມມື ທີເປັນບູລິມະສິດ ດັ່ງນີ້:

  1. ການເປີດຖ້ຽວບິນຕົງ ແຕ່ສະໜາມບິນສາກົນວັດໄຕ ນະຄອນຫລວງວຽງຈັນ ຫາ   ສະໜາມບິນນາຣິຕະ ນະຄອນຫລວງໂຕກຽວ.
  2. ໂດຍອີງຕາມການຕົກລົງເປັນເອກະພາບລະຫວ່າງລັດຖະບານ ສປປ ລາວ ແລະລັດຖະບານ ສສ ຫວຽດນາມ ເພື່ອພ້ອມກັນສະເໜີການຊ່ວຍເຫລືອຈາກລັດຖະບານຍີ່ປຸ່ນ ໃນການສຶກສາຄວາມເປັນໄປໄດ້ ສຳລັບໂຄງການກໍ່ສ້າງທາງດ່ວນວຽງຈັນ-  ຮ່າໂນ້ຍ.
  3. ໂຄງການປັບປຸງ ແລະຂະຫຍາຍສະໜາມບິນສາກົນວັດໄຕ ເພື່ອໃຫ້ສາມາດນຳໃຊ້ໄດ້ເຖິງປິ 2040 ແລະໂຄງການກໍ່ສ້າງສະໜາມບິນສາກົນແຫ່ງໃໝ່ ໃນນະຄອນຫລວງວຽງຈັນ.
  4. ໂຄງການປັບປຸງແຜນຜັງລວມ (Master plan) ຂອງນະຄອນຫລວງວຽງຈັນ ຕິດພັນກັບການແກ້ໄຂບັນຫາການຈາລະຈອນແອອັດ ໃນນະຄອນຫລວງວຽງຈັນ.
  5. ໂຄງການ​ກໍ່ສ້າງ​ເຂດໂລ​ຈິດ​ສະຕິ​ກ (Vientiane Logistics Park) ນະ​ຄອນ​ຫລວງ​ວຽງ​ຈັນ.
  6. ແລະການພັດທະນາຊັບພະຍາກອນມະນຸດ ຂອງຂະແໜງ ຍທຂ.

Additional information