ທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງ ຍທຂ ຕ້ອນຮັບການເຂົ້າຢ້ຽມ ຂອງ ທ່ານ Frang Qiuchen ປະທານສະມາຄົມຜູ້ຮັບເໝົາກໍ່ສ້າງ ແຫ່ງ ສປ ຈີນ.

  ທ່ານ ລັດຕະນະມະນີ ຄູນ​ນີວົງ ຮອງລັດຖະມົນຕີ​, ຫົວໜ້າ​ຄະນະຄຸ້ມ​ຄອງ​​ໂຄງການ​ກໍ່ສ້າງ​ທາງ​ລົດ​ໄຟ​ລາວ-ຈີນ ​ໄດ້ຕ້ອນ​ຮັບ​ການ​ເຂົ້າ​ຢ້ຽມຂໍ່ານັບ​ ​ຂອງ ທ່ານ Frang Qiuchen ປະທານສະມາຄົມ​ຜູ້​ຮັບ  ​ເໝົາ​ກໍ່ສ້າງ ​ແຫ່ງ ສປ ຈີນ. ໃນ​ໂອກາດ​ທີ່​ທ່ານ​ມາ​ຢ້ຽມຢາມ ​ແລະ ​ເຮັດ​ວຽກ ຢູ່ ສປປ ລາວ ​ໃນ​ລະ​ຫວ່າງ ວັນ​ທີ 26-29 ກໍລະກົດ 2017. ໃນ​ໂອກາດ​ດັ່ງກ່າວ ທ່ານ​ໄດ້​ສະ​ແດງ​ທັດສະນະ​ຕໍ່​ໂຄງການ​ກໍ່ສ້າງ​ທາງ​ລົດ​ໄຟ​ລາວ-ຈີນ​ ວ່າ: ​ໂຄງການ​ກໍ່ສ້າງ​ທາງ​ລົດ​ໄຟ​ລາວ-ຈີນ ​ແມ່ນ​ມີ​ຄວາມ​ສຳຄັນ​ເປັນ​ຢ່າງ​ຍິ່ງ ​ແລະ ​ແມ່ນ​ໂຄງການ​ຮ່ວມ​ມື​ຍຸດ​ທະ​ສາດລະຫວ່າງ 2 ປະ​ເທດ,​ ເປັນ​ໂຄງການ​ທີ​ຈະ​ເຮັດ​ໃຫ້​ເກີດຜົນ​ປະ​ໂຫຍ​ດທາງ​ດ້ານ​ເສດຖະກິດ​ໃຫ້​ແກ່ ສປປ ລາວ ​ແລະ ສປ ຈີນ ທັງ​ເປັນ​ສັນຍາ​ລັກ​ແຫ່ງ​ຄວາມ​ສາມັກຄີ​ມິດຕະພາບ​ທີ່​ມີ​ລັກສະນະ​ຍຸດ​ທະ​ສາດລະຫວ່າງ ສອງ​ປະ​ເທດ. ລັດ​ທະ​ບານ​ທັງ​ສອງ​ປະ​ເທ​ດ​ໄດ້​ໃຫ້​ຄວາມ​ສຳຄັນ​ເປັນ​ຢ່າງ​ຍິ່ງ​ຕໍ່​​ໂຄງ​ການ​ກໍ່ສ້າງດັ່ງກ່າວ.

 

 ທ່ານ ລັດຕະນະມະນີ ຄູນ​ນີວົງ, ຮອງ​ລັດ​ຖະ​ມົນຕີ, ຫົວໜ້າ​ຄະນະ​ຄຸ້ມ​ຄອງ​ໂຄ​ງການ​ກໍ່ສ້າງ​ທາງລົດ​ໄຟ​ລາວ-ຈີນ ​ໄດ້​ສະ​ແດງ​ຄວາມ​ຊົມ​ເຊີຍ​ຕໍ່​ການ​ມາ​ຢ້ຽມຢາມ​ຂອງ​ສະມາຄົມ​ຜູ້​ຮັບ​ເໝົາ​ກໍ່ສ້າງ​ຂອງ ສປ ຈີນ ​ເພື່ອ​ຕິດ​ຕາມ​ການປະຕິບັດ​ໜ້າ​ທີ່ຂອງບໍລິສັດຜູ້ຮັບເໝົາຂອງຈີນ, ພ້ອມດຽວກັນນັ້ນ ທ່ານ ລັດຕະນະມະນີ ຄູນນີວົງ, ຮອງ​ລັດ​ຖະ​ມົນຕີ, ຫົວໜ້າ​ຄະນະ​ຄຸ້ມ​ຄອງ​ໂຄ​ງການ​ກໍ່ສ້າງ​ທາງລົດ​ໄຟ​ລາວ-ຈີນ ຍັງໄດ້ເປັນເອກະພາບກ່ຽວກັບການຕີລາຄາຄວາມໝາຍຄວາມສຳຄັນຂອງໂຄງການດັ່ງກ່າວ, ຊຶ່ງລັດຖະບານ ສປປ ລາວ ໄດ້ໃຫ້ຄວາມສຳຄັນເປັນພິເສດຕໍ່ໂຄງການດັ່ງກ່າວ, ໄດ້ລົງໃກ້ສິດຕິດແທດ ແລະ ໃຫ້ທິດຊີ້ນຳເປັນປະ​ຈຳ ​ເພື່ອ​ຮັບ​ປະກັນ​ໃຫ້​ແກ່​ໂຄງການ​ນີ້​ສຳ​ເລັດ​ຢ່າງ​ມີຄຸນນະພາ​ບ ​ແລະ ​ເປັນ​ໄປ​ຕາ​ມ​ແຜນການ​ທີ່​ວາງ​ໄວ້.

 

 ທ່ານ​ຍັງ​ໄດ້​ລາຍ​ງານ​ໃຫ້​ສະມາຄົມ​ຜູ້​ຮັບ​ເໝົາ​ກໍ່ສ້າງຂອງ ສປ ຈີນ ຊາບ ​ເຖິງ​ຄວາມ​ເອົາ​ໃຈ​ໃສ່ປະຕິບັດ​ໜ້າ​ທີຂອງ​ຜູ້​ຮັບ​ເໜົາ ຊຶ່ງ​ໄດ້​ເຮັດ​ໃຫ້​ໂຄງການ​ມີ​ຄວາມ​ຄືບ​ໜ້າ​ໂດຍ​ໄວ, ທ່ານ ຍັງ​ໄດ້​ແຈ້ງ​ໃຫ້​ສະມາຄົມ​ຜູ້​ຮັບ​ເໝົາ​ກໍ່ສ້າງ​ຊາບ​ອີກ​ວ່າ ທ່ານ​ເອງ​​ໄດ້​ໄປ​ຕິດຕາມ​ໂຄງການ​ນີ້​ເປັນປະຈຳ  ​ແລະ ປຸກລະດົມ​ໃຫ້​ບໍ​ລິ​ສັດ​ຜູ້ຮັບ​ເໝົາ​ເອົາ​ໃຈ​ໃສ​ຕໍ່​ການປະຕິບັດ​ໜ້າ​ທີດ້ວຍ​ຄວາມ​ຮັບຜິດຊອບ​ສູງ, ມີ​ລະບຽບວິ​ໄນ ພິ​ເສດ​ແມ່ນ​ສະ​ແດງ​ອອກ​ເຖິງ​ຄວາມ​ສາມັກຄີ​ຮັກ​ແພງ​ຂອງ​ປະຊາຊົນ​ດ້ວຍ​ການ​ສະໜັບສະໜູນ​ຊ່ວຍ​ເຫຼື​ອປະຊາຊົນ​ເຊັ່ນ: ກໍ່ສ້າງ​ທາງ​ຜ່ານ​ບ້ານ, ສ້ອມ​ແປງ​ໂຮງຮຽນ, ​ໂຮງໝໍ ຊ່ວຍ​ເຫຼືອ​ວັດ​ຖຸອຸປະກອນ​ຕ່າງໆ​ທີ່​ປະຊາຊົນ​ຂາດ​ເຂີນ.​ ໃນ​ເວລາ​ໄປ​ຢ້ຽມ​ຢາມ​ພາກ​ສະໝາ​ມນີ້ ທ່ານ​ປະທານ​ ສະມາຄົມ​ຜູ້​ຮັບ​ເໜົາກໍ່​ສ້າງຂອງ ສປ ຈີນ ຈະ​ນຳ​ເອົາ​ນະ​ໂຍບາຍ​ດັ່ງກ່າວ​ໄປ​ປຸກລະດົມ ບໍລິສັດ​ຜູ້​ຮັບ​ເໝົາ​ໃຫ້​ມີ​ຄວາມ​ຫ້າວຫັນ​ຕໍ່​ວຽກ​ງານ ​ແລະ ປະກອບສ່ວນ​ຊ່ວຍ​ເຫຼືອ​ປະຊາຊົນ​ໃຫ້​ຫຼາຍ​ຂື້ນ. ນອກຈາກ​ນັ້ນ, ທ່ານ ຍັງ​ໄດ້​ສະ​ແດງ​ຄວາມ​ເຫັນດີທີ່​ຈະ​ລະດົມ​ໃຫ້​ບໍລິ​ສັດຂອງ ສປ ​ຈີນ ມາ​ລົງທຶນພື້ນຖານ​ໂຄງ​ລ່າງດ້ານ​ຄົມມະນາຄົມ​ຂົນ​ສົ່ງ ຂອງ ​ສປປ ລາວ ​ໃຫ້​ຫຼາຍ​ຂື້ນ. ພ້ອມ​ດ່ຽວກັນ​ນັ້ນ ທ່ານ ຍັງ​ໄດ້​ເຊີນ ທ່ານ ຮອງ​ລັດຖະມົນຕີ ​ເຂົ້າ​ຮ່ວມ​ກອງ​ປະຊຸມ​ລະຫວ່າງ ສະ​ມາຄົມ​ຜູ້​ຮັບ​ເໝົາ​ກໍ່ສ້າງ​ຂອງ ສປ ຈີນ ​ແລະ ສະ​ຖາ​ບັນ​ການ​ເງິນ​ຫຼາຍ​ແຫ່ງ​ຂອງ​ໂລກ ຊຶ່ງ​ຈະ​ໄດ້​ຈັດ​ຂື້ນ​ໃນ​ເດືອນ 6 ປີ 2018 ທີ່​ຈະ​ມາ​ເຖິງ​ນີ້.

 

Additional information