ກອງປະຊຸມລິເລີ່ມການກະກຽມໂຄງການພັດທະນາຕົວເມືອງຕາມແລວທາງອະນຸພາກພຶ້ນແມ່ນ້ຳຂອງ 4

 ກອງປະຊຸມລິເລີ່ມການກະກຽມໂຄງການພັດທະນາຕົວເມືອງຕາມແລວທາງອະນຸພາກພຶ້ນແມ່ນ້ຳຂອງ 4 ​ໄດ້​ຈັດຂື້ນ​ໃນ​ວັນ​ທີ 27 ມີ​ຖຸນາ 2017 ທີ​ໂຮງ​ແຮມ​ເມືອງ​ແທງ, ນະຄອນຫຼວງ​ວຽງ​ຈັນ, ​ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ນາງ ວິ​ໄລ​ຄຳ ​ໂພ​ສາລາ​ດ, ຮອ​ງລັດ​ທະ​ມົນຕີ ກະຊວງ ​ໂຍທາ​ທິການ ​ແລະ ຂົນ​ສົ່ງ; ທ່ານ ບຸນ​​ເສັງ ປະ​ທຳ​ມະ​ວົງ, ຮອງ​​ເຈົ້າ​ແຂວງ ​ແຂວງ ບໍລິ​ຄຳ​ໄຊ; ທ່ານ ບຸນ​ມີ ພິມ​ມະ​ສອນ, ຮອງ​ເຈົ້າ​ແຂວງ ​ແຂວງ ຄຳ​ມ່ວນ; ທ່ານ ຄຳ​ທະວີ ​ໄທ​ພະຈັນ, ຫົວໜ້າ​ກົມ​ເຄຫາ ​ແລະ ຜັງ​ເມືອງ ​ແລະ ທ່ານ ຊະ​ໂຈະ​ຊິ ອິຊິ​ອິ ຜູ້​ຕ່າງ​ໜ້າ​ຈາກ​ທະນາຄານ​ພັດທະນາ​ອາຊີ(ADB); ມີ​ບັນດາ​ທ່ານ​ຫົວໜ້າ​ກົມ, ຮອງ​ຫົວໜ້າ​ກົມ, ຂອງ​ກະຊວງ ​ໂຍທາ​ທິການ ​ແລະ ຂົນ​ສົ່ງ, ຜູ້ຕາງໜ້າ​ຈາກ​ກະຊວງ​ການ​ເງິນ, ກະຊວງ​ແຜນການ ​ແລະ ການ​ລົງ​ທຶນ, ກະຊວງ ຊັບພະຍາກອນ​ທຳ​ຊາດ ​ແລະ ສິ່ງ​ແວດ​ລ້ອມ, ສະ​ຖາ​ບັນ​ຄົ້ນ​ຄ້ວາ​ເສດຖະກິດ​ແຫ່ງ​ຊາດ ​ແລະ ຮອງ​ປະທານ​ອົງການ​ພັດທະນາ ​ແລະ ບໍ​ລິ​ຫານ​ຕົວ​ເມືອງ ປາກ​ຊັນ ​ແລະ ທ່າ​ແຂກ; ມີ​ບັນດາ​ຫົວໜ້າ​ພະ​ແນ​ກ, ຮອງ​ຫົວໜ້າ​ພະ​ແນ​ກ ຈາກ​ສູນ​ກາງ ​ແລະ ທ້ອງ​ຖິ່ນ, ຜູ້​ຮັບຜິດຊອບ​ໂຄງການ​ຂອງ​ທະນາຄານ​ພັດທະນາ​ອາຊີ ປະຈຳ ສປປ ລາວ, ຜູ້ຕາງໜ້າ​ຂອງ​ບໍລິ​ສັດ​ທີ​ປືກສາ ​ແລະ ບັນດາ​ພານ​ສ່ວນ​ທີ​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້​ ເພື່ອກະກຽມໃຫ້ແກ່ໂຄງການພັດທະນາຕົວເມືອງຕາມແລວທາງອະນຸພາກພຶ້ນ ແມ່ນ້ຳຂອງ 4 ຊຶ່ງຈະສະໜັບສະໜູນລັດຖະບານ ສປປ ລາວ ໃນການສົ່ງເສີມການແຂ່ງຂັນ ຂອງບັນດາຕົວເມືອງທີ່ມີທີ່ຕັ້ງລຽບຕາມແລວທາງອະນຸພາກພຶ້ນແມ່ນ້ຳຂອງ. ໂຄງການດັ່ງກ່າວ ຈະຊ່ວຍປັບປຸງການບໍລິການຕົວເມືອງ ແລະ ຄວາມສາມາດແຂ່ງຂັນ ຂອງຕົວເມືອງທີ່ເຂົ້າຮ່ວມໂຄງການສິ່ງຕ່າງໆເລົ່ານີ້ ຈະສາມາດບັນລຸໄດ້ໂດຍຜ່ານການປັບປຸງ ການວາງແຜນແບບປະສົມປະສານ ໃນລະດັບທ້ອງຖິ່ນ, ລະດັບພູມິພາກ ແລະ ການລົງທຶນໃສ່ໂຄງລ່າງຕົວເມືອງຕ່າງໆ ເຊັ່ນ: ລະບົບລະບາຍນ້ຳ,​ ສຸຂາພິບານ, ລະບົບຄຸ້ມຄອງຂີ້ເຫຍື້ອ, ເສັ້ນທາງໃນຕົວເມືອງ, ລະບົບປ້ອງກັນຕາ​ຝັ່ງເຈື່ອນແຄມ​ແມ່ນ້ຳ ແລະ ສວນສາທາລະນະ.

 ແລວທາງໃຈກາງ ແມ່ນການເນັ້ນໃສ່ຕົວເມືອງທີ່ເຂົ້າຮ່ວມໂຄງການ ຊຶ່ງມີທີ່ຕັ້ງລຽບແຄມນ້ຳຂອງ, ເຖິງວ່າສ່ວນຫຼາຍ ຍັງບໍ່ຖືກຂຸດຄົ້ນກໍ່ຕາມ ຍ້ອນການມີທີ່ຕັ້ງເປັນຍຸດທະສາດ ຕົວເມືອງລຽບຕາມແລວທາງ ແມ່ນສາມາດກະຕຸກຊຸກຍູ້ການຄ້າ ແລະ ການລົງທຶນ ທີ່ນັບມື້ນັບເພີ່ມຂຶ້ນໃນພູມີພາກ ແລະ ການສ້າງແນວຄວາມຄິດລິເລີ່ມ ສຳລັບເສດຖະກິດທ້ອງຖິ່ນໃນຕົວເມືອງຫຼັງຝັ່ງທະເລ, ໂດຍການໃຫ້ກາລະໂອກາດທາງດ້ານການພັດທະນາ ແລະ ການຫັນເປັນຕົວເມືອງຢ່າງໄວວາ ຂອງຕົວເມືອງທີ່ເຂົ້າຮ່ວມໂຄງການ ຈະປະສົບບັນຫາຄວາມຕ້ອງການ ທາງດ້ານໂຄງລ່າງ ແລະ ການບໍລິການຕົວເມືອງ ທີ່ຈຳເປັນ ເພື່ອເຮັດໃຫ້ຕົວເມືອງດັ່ງກ່າວມີຄວາມເຂັ້ມແຂງ, ສາມາດແຂ່ງຂັນໄດ້ ແລະ ສະໜັບສະໜູນໃຫ້ແກ່ການເຕີບໂຕທາງດ້ານເສດຖະກິດໃນພູມີພາກ. ເຖິງຢ່າງໃດກໍ່ຕາມ ການພັດທະນາແມ່ນຕ້ອງການໃຫ້ມີການສົ່ງເສີມການເຕີບໂຕສີຂຽວ ແລະ ມີຄວາມທົນທານຕໍ່ສະພາບອາກາດເຊິ່ງຄວາມຕ້ອງການເລົ່ານີ້ ຕ້ອງສະທ້ອນໃຫ້ເຫັນ ໃນການວາງແຜນ ແລະ ການຈັດຕັ້ງປະຕິບັດ ໂດຍຜ່ານການຄັດເລືອກເອົາອົງປະກອບ ແລະ ການອອກແບບໂຄງລ່າງທາງສັງຄົມ ແລະ ເສດຖະກິດ ທີ່ຈະໄດ້ເຮັດສຳລັບແຕ່ລະຕົວເມືອງ. ຕົວເມືອງທີ່ເຂົ້າຮ່ວມໂຄງການ ຢູ່ ສປປ ລາວ ມີ 2 ຕົວເມືອງຄື: ຕົວເມືອງປາກຊັນ ແຂວງບໍລິຄຳໄຊ ​ແລະ ຕົວເມືອງທ່າແຂກ ແຂວງຄຳມ່ວນ.

ຊຶ່ງການກະທົບທາງບວກໂດຍລວມ ຂອງໂຄງການຈະຖືກຊີ້ນຳ ແລະ ສະໜັບສະໜູນໂດຍຂອບວຽກຍຸດທະສາດ ສຳລັບການພັດທະນາຕົວເມືອງໃນອະນຸພາກພື້ນແມ່ນ້ຳຂອງ ແຕ່ປີ 2015-2022 ພ້ອມດ້ວຍວິໄສທັດລວມ ຂອງການພັດທະນາຕົວເມືອງແບບຍືນຍົງ ໃນອະນຸພາກພື້ນແມ່ນນ້ຳຂອງ ແລະ ເສົາຄ້ຳເສີມຕ່າງໆ ລວມມີ: ການວາງແຜນຜັງເມືອງ ແລະ ການພັດທະນາສູນກາງຕົວເມືອງຫຼັກ ແລະ ການພັດທະນາຂີດຄວາມສາມາດໃນການວາງແຜນຜັງເມືອງ ແລະ ການຄຸ້ມຄອງຕົວເມືອງ. ສຳລັບ​ປະ​ເທດ ສປປ ລາວ ການ​ກະທົບ​ທາງ​ບວກ​ຕ່າງໆ ​ແມ່ນ​ສອດ​ຄອງ​ກັບ​ແຜນ​ພັດທະນາ​ເສດຖະກິດ​ສັງຄົມ 5 ປີ ຄັ້ງ​ທີ VIII ​ແຕ່​ປີ 2016-2020 ຊຶ່ງ​ມີ​ເປົ້າ​ໝາຍ ​ເພື່ອ​ດຸ່ນດ່ຽງການ​ພັດທະນາ​ທ້ອງ​ຖິ່ນ ​ແລະ ​ພູມີ​ພາກ​.

 ການປັບປຸງການບໍລິການຕົວເມືອງ ໃນບັນດາຕົວເມືອງທີ່ເຂົ້າຮ່ວມໂຄງການ ຊຶ່ງຜົນໄດ້ຮັບຫຼັກ ຂອງໂຄງການລ່ວມມີ: ພັດທະນາ ຫຼື ປັບປຸງໃຫ້ທັນສະໄໜ ແລະ ຮັບຮອງແຜນຍຸດທະສາດການພັດທະນາເສດຖະກິດທ້ອງຖິ່ນ; ຈັດຕັ້ງປະຕິບັດການລົງທຶນໃສ່ໂຄງລ່າງຕົວເມືອງ ທີ່ເປັນບຸລິມະສິດ ​ແລະ ສ້າງຂີດຄວາມສາມາດໃຫ້ແກ່ອົງການຈັດຕັ້ງ, ພະນັກງານ ເພື່ອຄວາມຍືນຍົງທາງດ້ານການເງິນ, ປັບປຸງສະມັດຖະພາບ ຂອງການບໍລິການຕົວເມືອງ, ການຄຸ້ມຄອງຄວາມສ່ຽງຕໍ່ໄພພິບັດໃນການວາງແຜນຜັງເມືອງ ແລະ ການຄຸ້ມຄອງການລົງທຶນຂອງພາກລັດ. ​ຊຶ່ງມູນ​ຄ່າ​ການ​ລົງ​ທຶນ​ຂອງໂຄງການ​ດັ່ງກ່າວ​ແມ່ນ 60 ລ້ານ​ໂດ​ລາ​ສະຫະລັດ ​ຊຶ່ງ​ທະນາຄານພັດ​ທະນາ​ອາຊີ​ຈະ​ສະໜອງ​ທຶນ​ໃຫ້ 45 ລ້ານ​ໂດ​ລາ, ກອງ​ທຶນ​ໂຄງລ່າງອາ​ຊຽນ 10 ລ້ານ​ໂດ​ລາ ​ແລະ ລັດ​ຖະບານ ສປປ ລາວ 5 ລ້ານ​ໂດ​ລາ. ນອກຈາກ​ນັ້ນ, ຍັງຈະ​​ໄດ້​ສ້າງ​ຕັ້ງຄະນະ​ກຳມະການ​ຊີ້​ນຳ​ໂຄງການ ​ໃນ​ລະດັບ​ສູນ​ກາງ ​ແລະ ​ໃນ​ລະດັບ​ແຂວງ​ຂື້ນ ​ເພື່ຊີ້​ນຳ​ການຈັດ​ຕັ້ງ​ປະຕິບັດ​ໂຄງການ. ບໍລິສັດ​ທີ​ປຶກສາ ຊ່ວຍ​ອົງ​ການ​ຄຸ້ມ​ຄອງ ​ແລະ ອົງການ​ຈັດ​ຕັ້ງ​ປະຕິບັດ​ໂຄງການ ພ້ອມ​ດຽວ​ກັນ​ນັ້ນ ​ໂຄງການ​ຍັງ​ຈະ​ໄດ້​ສ້າງ​ຂີດ​ຄວາມ​ສາມາດ ​ແລະ ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ອົງການ​ຈັດ​ຕັ້ງ​ທີ​ກ່ຽວຂ້ອງ.

Additional information