ກອງປະຊຸມ ດຳເນີນຊີວິດການເມືອງ ປັບປຸງປົວແປງ ຂັ້ນຮາກຖານ(ຊຸດທີ 2) ທົ່ວອົງຄະນະພັກ ກະຊວງໂຍທາທິການ ແລະ ຂົນສົ່ງ

  ກອງປະຊຸມດຳເນີນຊີວິດການເມືອງປັບປຸງປົວແປງພັກ ຂັ້ນ​ຮາກ​ຖານ(ຊຸດ​ທີ 2) ທົ່ວອົງຄະນະພັກ ກະຊວງໂຍທາທິການ ແລະ ຂົນສົ່ງ ຂຶ້ນ​ໃນວັນທີ 26 ມິຖຸນາ 2017 ທີ່ສູນ ICTC ຫລັກ 5, ໂດຍການເປັນປະທານຂອງ ສະຫາຍ ປອ ບຸນຈັນ ສິນທະວົງ, ກຳມະການ​ສູນ​ກາງ​ພັກ, ເລ​ຂາ​ຄະ​ນະ​ພັກ, ລັດຖະມົນຕີ​​ກະ​ຊວງ ໂຍທາທິການ ແລະຂົນສົ່ງ; ​ໂດຍ​ການຂົ້າຮ່ວມຂອງ​ທ່ານ ລັນ ​ແສງ​ອາພອນ ຄະນະ​ປະຈຳ​ພັກ​ກະຊວງ, ຫົວໜ້າ​ກົມ​ຈັດ​ຕັ້ງ ​ແລະ ພະນັກງານ; ມີ​ບັນດາສະມາຊິກພັກຈາກ 23 ຮາກ​ຖານ​ພັກອ້ອມຂ້າງກະຊວງ​ເຂົ້າຮ່ວມ.

  ກອງ​ປະຊຸມ​ດຳ​ເນີນ​ຊີ​ວິດ​ການ​ເມືອງ ປັບ​ປຸງ​ປົວ​ແປງພັກ ຂັ້ນ​ຮາກ​ຖານ(ຊຸດ​ທີ 2) ທົ່ວ​ອົງ​ຄະ​ນະ​ພັກກະຊວງໂຍທາທິການ ແລະ ຂົນສົ່ງ ​ໃນ​ຄັ້ງນີ້, ເພື່ອ​ເປັນ​ການ​ເສີມ​ຂະ​ຫຍາຍ​ມູນ​ເຊື້ອ ຜົນ​ງານດ້ານ​ດີຂອງ​ອົງ​ຄະ​ນະ​ພັກ​ກະຊວງ ຍທຂ, ​ເພື່ອສຸມໃສ່ແກ້​ໄຂ​ຈຸດ​ອ່ອນຂໍ້​ຄົງຄ້າງ​ຕາມມາດຕະການທີ່ໄດ້​ກຳ​ນົດ​ໄວ້ ໃນ​ມະ​ຕິ​ກອງ​ປະ​ຊຸມ​ໃຫ່​ຍ​ຄັ້ງ​ທີ IV ຂອງອົງຄະນະ​ພັກກະຊວງ ຍທຂ ໃຫ້​ມີ​ການ​ຫັນ​ປ່ຽນ​ຢ່າງ​ແທ້​ຈິງ, ຍົກ​ສູງ​ຄວາມ​ສາ​ມາດ​ນຳ​ພາ ແລະ ລັກ​ສະ​ນະ​ນຳ​ໜ້າ​ຂອງ​ຄະ​ນະ​ພັກ​ຂັ້ນຕ່າງໆ, ເພີ່ມ​ທະ​ວີ​ຄວາມ​ສາ​ມັກ​ຄີ​ເປັນ​ເອ​ກະ​ພາບ​ສູງ ​ພາຍ​ໃນອົງ​ຄະ​ນະ​ພັກກະຊວງໃຫ້ສູງຂຶ້ນ, ເດັດ​ດ່ຽວ​ສູ້​ຊົນນຳ​ພາ​ແກ້​ໄຂ 19 ບັນຫາ ທີ່ເປັນປະກົດການຫຍໍ້ທໍ້ ແລະ ເປັນສິ່ງ​ທ້າ​ທ້າຍຂອງຂະແໜງ ຍທຂ, ຕັ້ງໜ້າແກ້ໄຂ  ພະ​ຍາດ​ອາດ​ຍາ​ສິດ ແລະ ການ​ສໍ້​ລາດ​ບັງຫຼວງ​ທຸກຮູບແບບ ຢູ່ຂະແໜງ ຍທຂໃຫ້ໝົດໄປ, ​ສືບຕໍ່ຕັ້ງໜ້າຜັນຂະຫຍາຍແນວ​ທາງ​ປ່ຽນ​ແປງ​ໃໝ່​ຮອບ​ດ້ານ ແລະ ມີຫຼັກ​ການ​ຂອງ​ພັກ ໃຫ້ປະກົດຜົນເປັນຈິງ.

ເພື່ອ​ໃຫ້​ຄະ​ນະ​ພັກ​ແຕ່​ລະ​ຂັ້ນ ສະ​ມາ​ຊິກ​ພັກ​ແຕ່​ລະ​ສະ​ຫາຍ ເຊື່ອມ​ຊຶມ​ກຳ​ແໜ້ນຢ່າງ​ເລິກ​ເຊິ່ງ​ຕໍ່​ແນວ​ທາງ ແລະ ມະ​ຕິ​, ຄໍາສັ່ງຂອງ​ພັກ, ຍົກ​ສູງ​ຄວາມ​ຮັບ​ຜິດ​ຊອບ​ການເມືອງຂອງ​ຄະ​ນະ​ພັກ ແລະ ສະ​ມາ​ຊິກ​ພັກ​ແຕ່​ລະ​ສະ​ຫາຍໃຫ້ສູງຂຶ້ນ, ແນ່ໃສ່ປັບ​ປຸງ​ຄຸນ​ທາດການ​ເມືອງ​ຄຸນ​ສົມ​ບັດ​ສິນ​ທຳ​ປະ​ຕິ​ວັດ, ປັບ​ປຸງ​ແບບ​ແຜນນຳ​ພາ ແລະ ວິ​ທີ​ເຮັດ​ວຽກ​ພາຍໃນອົງຄະນະພັກກະຊວງ ຍທຂ ໃຫ້ເຂັ້ມງວດ, ກໍາ​ແໜ້ນ​ວຽກ​ງານກໍ່​ສ້າງ​ພັກ, ຫຼັກ​ການ​ຕຳ​ນິ​ຕິ​ຊົມ​ຕົນ​ເອງ ຕິ​ຊົມ​ກັນ​ພາຍ​ໃນ​ພັກ ສ້າງ​ໃຫ້​ໄດ້​ຈິດ​ໃຈຮັກຊາດ ແລະ ເສຍສະຫລະເພື່ອສ່ວນລວມ ຖື​ເອົາ​ຜົນ​ປະ​ໂຫຍດສ່ວນ​ລວມ​ເປັນ​ສິ່ງ​ຊຸກ​ຍູ້ໃຫ້​ແກ່​ການ​ສ້າງ ແລະ ຍົກ​ສູງ​ຄວາມ​ສາ​ມາດ​ນຳ​ພາ​ຂອງ​ຄະ​ນະ​ພັກ​ແຕ່​ລະ​ຂັ້ນ.

 ກອງ​ປະຊຸມ​ດຳ​ເນີນ​ຊີ​ວິດ​ການ​ເມືອງ​ຄັ້ງ​ນີ້ ຕ້ອງ​ແກ້​ໄຂບັນຫາ​ຈຸດ​ອ່ອນ​ຂໍ້​ຄົງ​ຄ້າງ ທີ່ເກີດຂຶ້ນທັງໝົດຢູ່ອົງຄະນະພັກກະຊວງ ຍທຂ, ໂດຍສືບຕໍ່ປຸກລະດົມສະມາຊິກພັກ ​ມີ​ສະ​ຕິ​ເຄົາ​ລົບ ​ແລະ ປະ​ຕິ​ບັດ​ກົດ​ລະ​ບຽບ​ພັກ, ​ກົດ ​ໝາຍຂອງ​ລັດໃຫ້ສູງຂຶ້ນກວ່າເກົ່າ, ຫຼີກ​ເວັ້ນ​ການ​ດຳ​ເນີນ​ຊີ​ວິດ​ການ​ເມືອງ​ແບບ​ໄດ້ແຕ່ຮູບ​ການ. ພາຍຫຼັງ​ດຳ​ເນີນ​ຊີ​ວິດ​ການ​ເມືອງ​ແລ້ວຄະ​ນະ​ພັກ​ທຸກ​ຂັ້ນ, ສະ​ມາ​ຊິກ​ພັກ​ທຸກ​ສະ​ຫາຍ ຕ້ອງ​ມີ​ການ​ຫັນ​ປ່ຽນ​ທີ່​ດີ​ຂຶ້ນ​ຢ່າງ​ແທ້​ຈິງ ​ພ້ອມ​ດຽວ​ກັນ​ນີ້ຄະນະພັກທຸກຂັ້ນສະມາຊິກພັກທຸກສະຫາຍ ພາຍໃນອົງຄະນະພັກກະຊວງ ຕ້ອງໄດ້ເປັນ​ເອ​ກະ​ພາບກັນດ້ານທັດສະນະ ແລະ ພ້ອມກັນຕັດສິນໃຈສູງ, ວາງ​ມາດ​ຕະ​ການແກ້​ໄຂ​ຈຸດອ່ອນ​ຄົງ​ຄ້າງທີ່ຕິດພັນກັບຄວາມຮັບຜິດຊອບຂອງຄະນະພັກ ໃຫ້ຖືກແກ້ໄຂໝົດໄປ.  ສະນັ້ນ, ເພື່ອສ້າງຄວາມຮັບຮູ້ໃຫ້ແກ່ຄະນະພັກທຸກຂັ້ນ, ສະມາຊິກພັກທຸກສະຫາຍ ຈະຕ້ອງໄດ້ສຸມໃສ່ ຄົ້ນຄວ້າເຊື່ອມຊຶມບັນດາເອກະສານດັ່ງນີ້: ​ເຊື່ອມ​ຊຶມຄຳ​ສັ່ງແນະນໍາສະບັບເລກທີ 01/ກມສພ, ລົງວັນ 1/2/2017 ຂອງ​ກົມ​ການ​ເມືອງ​ສູນ​ກາງ​ພັກ ວ່າ​ດ້ວຍ​ການ​ດຳ​ເນີນ​ຊີ​ວິດ​ການ​ເມືອງ ປັບ​ປຸງປົວ​ແປງ​ທົ່ວ​ພັກ ປີ 2017; ເຊື່ອມ​ຊຶມເອ​ກະ​ສານ​ເດັດດ່ຽວ​ປັບ​ປຸງປົວ​ແປງ​ທົ່ວ​ພັກ ໃຫ້​ປອດ​ໃສເຂັ້ມ​ແຂງ ແລະ ໜັກແໜ້ນ ໂດຍຕິດພັນກັບມະຕິວ່າດ້ວຍການແກ້ໄຂພະຍາດອາດຍາສິດ, ສະກັດກັ້ນ ແລະຕ້ານການສໍ້ລາດບັງຫຼວງ ສະບັບເລກທີ 022/ຄບສພ, ລົງວັນທີ 13/01/2017 ​ແລະ ພ້ອມກັນຄົ້ນຄ້ວາ ແລກປ່ຽນຄວາມຄິດຄວາມເຫັນ ເພື່ອໃຫ້ມີຄວາມເຂົ້າໃຈເປັນເອກະພາບນຳກັນ   ຕໍ່ 2 ເອກະສານດັ່ງກ່າວ ແລ້ວນຳໄປຈັດຕັ້ງປະຕິບັດ ໃຫ້ໄດ້ຮັບຜົນດີ.

Additional information