ທ່ານລັດຖະມົນຕີ ກະຊວງ ຍທຂ ພ້ອມດ້ວຍຄະນະ ເດີນທາງໄປທັດສະນະສຶກສາກ່ຽວກັບວຽກງານໂລຈິດສະຕິກ, ການບໍລິການທ່າເຮືອນ້ຳເລິກ ແລະການຂົນສົ່ງໃນຕົວເມືອງ ທີ່ປະເທດສິງກະໂປ

  ເພື່ອຈັດຕັ້ງຜັນຂະຫຍາຍ ຜົນການຢ້ຽມຢາມປະເທດສິງກະໂປຢ່າງເປັນທາງການ ຂອງທ່ານນາຍົກລັດຖະມົນຕີ ໃນວັນທີ 2/5/2017, ໂດຍສະເພາະແມ່ນການພົວພັນຮ່ວມມື ໃນຂະແໜງໂຍທາທິການ ແລະຂົນສົ່ງ. ໃນລະຫວ່າງວັນທີ 24-27/5/2017 ທີ່ຜ່ານມາ, ທ່ານ ປອ. ບຸນຈັນ ສິນທະວົງ, ລັດຖະມົນຕີ ກະຊວງໂຍທາທິການ ແລະຂົນສົ່ງ ພ້ອມດ້ວຍຄະນະ, ຊຶ່ງປະກອບດ້ວຍທ່ານຫົວໜ້າຫ້ອງການກະຊວງ, ຫົວໜ້າກົມການບິນພົນລະເຮືອນ, ຜູ້ອຳນວຍການລັດວິສາຫະກິດ ແລະບັນດາຫົວໜ້າບໍລິສັດທີ່ກ້ຽວຂ້ອງ ທັງໝົດ 18 ທ່ານ,  ໄດ້ເດີນທາງໄປທັດສະນະສຶກສາກ່ຽວກັບວຽກງານໂລຈິດສະຕິກ, ການບໍລິການທ່າເຮືອນ້ຳເລິກ ແລະການຂົນສົ່ງໃນຕົວເມືອງ ທີ່ປະເທດສິງກະໂປ. ໃນການໄປເຮັດວຽກດັ່ງກ່າວ ຄະນະຜູ້ແທນໄດ້ພົບປະເຮັດວຽກ ປຶກສາຫາລືແລກປ່ຽນບົດຮຽນ ກັບບັນດາພາກສ່ວນທີ່ກ່ຽວຂ້ອງ ແລະທັດສະນະສະຖານທີ່ສຳຄັນຕ່າງໆ ດັ່ງນີ້: ພົບປະ ແລະເຮັດວຽກກັບທ່ານ Khaw Boon Wan ລັດຖະມົນຕີ ກະຊວງຂົນສົ່ງ ສິງກະໂປ; ກອງຄຸ້ມຄອງການຂົນສົ່ງທາງບົກ (Land Transport Authority); ກອງຄຸ້ມຄອງທ່າເຮຶອ (Maritime Port Authority (MPA)); ວິສາຫະກິດຄຸ້ມຄອງສະໜາມບິນສາກົນ (Changi Airport Group); ວິສາຫະກິດຂົນສົ່ງຍສານໂດສາທາລະນະ (Singapore Mass Rapid Transit (SMRT) Corporation Ltd); ບໍລິສັດ YCH Supply Chain and Logistics Academy ​ແລະ ບໍລິສັດ Kerry Logistics Co.

 ຜ່ານການໄປທັດສະນະສຶກສາ ແລະແລກປ່ຽນບົດຮຽນດັ່ງກ່າວ ເຫັນວ່າເປັນການແລກປ່ຽນບົດຮຽນ ແລະປະສົບການ ທີ່ມີປະໂຫຍດ ເພື່ອນຳມາໝູນໃຊ້ເຂົ້າໃນການພັດທະນາ ວຽກງານໂລຈິດສະຕິກ, ການບໍລິການທ່າເຮືອນ້ຳເລິກ ແລະການຂົນສົ່ງໃນຕົວເມືອງ ຂອງປະເທດເຮົາ. ນອກຈາກນັ້ນ, ຄະນະຜູ້ແທນ ໄດ້ສະເໜີກ່ຽວກັບແຜນການລົງທຶນ ແລະພັດທະນາທ່າເຮືອຫວຸງອາງ (ທ່າທຽບເຮືອທີ່ 1, 2 ແລະ 3) ເປັນທ່າເຮືອສາກົນ ລາວ-ຫວຽດນາມ ຕາມການຕົກລົງລະຫວ່າງລັດຖະບານ ສປປ ລາວ ແລະລັດຖະບານ ສສ ຫວຽດນາມ ໃຫ້ແກ່ບັນດາບໍລິສັດໂລຈິດສະຕິກ ຂອງປະເທດສິງປະໂປ ເພື່ອເປັນຂໍ້ມູນໃຫ້ບໍລິສັດທີ່ມີຄວາມສົນໃຈ ຈະນຳໃຊ້ການບໍລິການຂອງທ່າເຮືອດັ່ງກ່າວໃນຕໍ່ໜ້າ.

Additional information