ການສ້າງຕັ້ງລະບົບບູລະນະຮັກສາເສັ້ນທາງ ແບບມີສ່ວນຮ່ວມຈາກປະຊາຊົນ

  ສະ​ຖາ​ບັນ​ຝຶກ​ອົບ​ຮົມ ໂຍ​ທາ​ທິ​ການ ແລະ ຂົນ​ສົ່ງ ແລະ ໂຄງ​ການ​ພັດ​ທ​ະ​ນາ​ພື້ນຖານໂຄງ​ລ່າງ​ຊົນ​ນະ​ບົດ ໄລ​ຍະ 6 (RIP 6 Project-KfW)  ທີ່​ນອນ​ຢູ່​ໃນ ​ກົມ​ຂົວ​ທາງ ກະ​ຊວງ ຍ​ທ​ຂ ໄດ້​ຮ່ວມ​ກັນຈັດ​ຝຶກ​ອົບ​ຮົມ​​ຫົວ​ຂໍ້: ການສ້າງ​ຕັ້ງ​ລະ​ບົບ​ບູ​ລະ​ນະ​ຮັກ​ສາ​ເສັ້ນ​ທາງ ແບບ​ມີ​ສ່ວນ​ຮ່ວມ​ຈາກ​ປະ​ຊາ​ຊົນ ທີ່​​ເມືອງ​ຕະ​ໂອ້ຍ ແຂວງສາ​ລະ​ວັນ ຂື້ນ, ເພື່ອ​ແນ່​ໃສ່​ເຮັດ​ໃຫ້ ການ​ຈັດ​ຕັ້ງ​ທຸກ​ຂັ້ນ​ຕະຫຼອດ​ຮອດ​ບ້ານ ຮັບ​ຮູ້ ແລະ ເຂົ້າ​ໃຈ ໃນ​ຄວາມ​ຈຳ​ເປັນ​ໃນ​ການ​ສ້າງ​ຕັ້ງ​ລະ​ບົບ​ບູ​ລະ​ນະ​ຮັກ​ສາ​ເສັ້ນ​ທາງ ແບບ​ມີ​ສ່ວນ​ຮ່ວມ​ຈາກ​ປະ​ຊາ​ຊົນ. ເຊີ່ງ​ໃນ​ການ​ຝຶກ​ອົບ​ຮົມ​ຄັ້ງ​ນີ້ ແນ່​ໃສ​ຍົກ​ລະ​ດັບ​ຄວາມ​ຮູ້ໃຫ້​ແກ່​ບັນ​ດາ ​ຄະ​ນະ​ກຳ​ມະ​ການບູ​ລະ​ນະ​ຮັກ​ສາ​ເສັ້ນ​ທາງຂັ້ນ​ເມືອງ, ບ້ານ ແລະ ພາກ​ສ່ວນ​ກ່ຽວ​ຂ້ອງ​ອື່ນໆ ໃຫ້​ໄດ້​ຮຽນ​ຮູ້ ກ່ຽວ​ກັບ ສາຍ​ເຫດ ​ທີ່​ເຮັດ​ໃຫ້​ເສັ້ນ​ທາງ​ເປ່​ເພ​ ເສຍ​ຫາຍ, ເຕັກ​ນິກ​ໃນ​ການ​ສ້ອມ​ແປງ ແລະ ບູ​ລະ​ນະ​ຮັກ​ສາ​ເສັ້ນ​ທາງ, ສົນ​ທະ​ນາ​ແລກ​ປ່ຽນ​ສະ​ພາບ​ເສັ້ນ​ທາງ ແລະ ຄວາມ​ຕ້ອງ​ການ​ໃນ​ການ​ສ້ອມ​ແປງ, ແລະ ລົງ​ສາ​ທິດ​ຈັດ​ຕັ້ງ​ການ​ສ້ອມ​ແປງ​ທາງ​ຕົວ​ຈິງ. ​ການຝຶກ​ອົບຮົມຄັ້ງ​ນີ້​ແມ່ນ​ມີ​ຜູ້​ເຂົ້າ​ຮ່ວມຈາກ ພະ​ແນ​ກ ຍທຂ ​ແຂວງ, ຫ້ອງ​ວ່າການ​ປົກຄອງ​ເມືອງ, ຍທຂ​ ເມືອງ, ຄະນະບ້ານ ​ແລະ ຍທຂ ບ້ານ​ ທັງ​ໝົດ 52 ທ່ານ, ​ເຊີ່ງ​ມີ​ຄະນະ​ນໍາ​ຂັ້ນ​ເມືອງ, ສະ​ຖາ​ບັນ​ຝຶກ​ອົບຮົມ ຍທຂ, ຄະນະ​ນໍາ​ຂັ້ນ​ແຂວງ ​ເປັນ​ຄະນະ​ປະທານຮ່ວມ. ນອກ​ນີ້ ຍັງ​ໄດ້​ຮັບ​ກຽດ​ຈາກ ທ່ານ ສີ​ສຸ​ວັນ ວົງ​ຈອມ​ສີ ​ເຈົ້າ​ແຂວງ ​ແຂວງ​ສາລະ​ວັນ ເປັນ​ປະທານ, ມີຄໍາ​ເຫັນ​ຊີ້​ນໍາ​ ​ແລະ ​ເປັນ​ສັກຂີ​ພະຍານ​ໃນ​ການ​ມອບ​ອຸປະກອນ ​ໃນ​ການ​ບູລະນະ​ຮັກສາ​ທາງ​ຫຼວງ​ໃຫ້​ແກ່​ເມືອງ​ຕະ​ໂອ້​ຍ. ບັນດາ​ອຸປະກອນ​ດັ່ງກ່າວ ​ແມ່ນ​ຈະ​ນໍາ​ໃຊ້​​ເຂົ້າເພື່ອ​ບູລະນະ​ຮັກສາ​ເສັ້ນທາງ​ທີ່​ເມືອງ​ຕະ​ໂອ້ຍທີ່ໄດ້​ຮັບ​ການ​ຊ່ວຍ​ເຫຼືອ​ໃນ​ການກໍ່​ສ້າງ​ເສັ້ນ​ທາງ​ຈາກ​ລັດ​ຖະ​ບານ​ເຢຍ​ລະ​ມັນ ທັງ​ໝົດ 4 ເສັ້ນ​ຄື: (1) ຈາກ​ທາງ 15 ເບ ຫາ ບ້ານ​ຕຸ້ມ​ລີ​ຂາວ  ຍາວ 16.7 ກມ, (2)  ຈາກ​ທາງ 15 ເບ ຫາ ບ້ານໂຈ​ລະ​ວຽງ  ຍາວ 16.7 ກມ (3) ຈາກ​ ກມ 6 ຫາ ບ້ານຊັນ​ເຕີ​ມ່ອງ  ຍາວ 2.8 ກມ (4)ຈາກ​ທາງ 15 ເບ ຫາ ບ້ານ​ລາ​ຮາບ  ຍາວ 9.5 ກມ. ເພື່ອ​ເຮັດ​ໃຫ້​ເສັ້ນ​ທາງ​ດັ່ງ​ກ່າວ ​ສາ​ມາດ​ນຳ​ໃຊ້​ຢ່າງ​ມີ​ປະ​ສິດ​ຕິ​ຜົນ ແລະ ຍືນ​ຍາວ ແມ່ນ​ຈຳ​ເປັນ​ຕ້ອງ​ໄດ້​ມີ​ການ​ບູ​ລະ​ນະ​ຮັກ​ສາ ແລະ ສ້ອມ​ແປງ ຢ່າງ​ເປັນ​ປົກ​ກະ​ຕິ ໂດຍ​ການ​ຮ່ວມມື​ທັງ​ໝົດ​ຈາກ​ ທັງ​ການ​ຈັດ​ຕັ້ງ​ພາກ​ລັດ​ໂດຍ​ສະ​ເພາະແມ່ນ​ພະ​ແນກ ຍ​ທ​ຂ ​ແຂວງ, ຍ​ທ​ຂ ເມືອງ, ຫ້ອງ​ການ​ເມືອງ ແລະ ທີ່​ສຳ​ຄັນ​ທີ່​ສຸດ ແມ່ນ​ບັນ​ດາ​ບ້ານ​ທີ່​ປະ​ຊາ​ຊົນ​ທີ່​ອາ​ໃສ​ຢູ່​ຕາມ​ເສັ້ນ​ທາງ​ດັ່ງ​ກ່າວນີ້. ດັ່ງ​ນັ້ນ, ການ​ຝຶກ​ອົບ​ຮົມ​ໃນ​ຄັ້ງ​ນີ້ຈື່ງມີ​ຄວາມ​ໝາຍ​ສຳ​ຄັນ ແລະ ຈຳ​ເປັນ ເພາະ​ວ່າ ການ​ບູ​ລະ​ນະ​ຮັກ​ສາ​ເສັ້ນ​ທາງ ແບບ​ມີ​ສ່ວນ​ຮ່ວມ​ຈາກ​ປະ​ຊາ​ຊົນ ແມ່ນວຽກທີ່ຈະຕ້ອງໄດ້ເອົາໃຈໃສ່ເປັນ​ບູ​ລິ​ມະ​ສິດ​ສູງ ເພື່ອ​ເຮັດ​ໃຫ້​ເສັ້ນ​ທາງ​ສາ​ມາດ​ນຳ​ໃຊ້​ໄດ້​ເປັນ​ປົກ​ກະ​ຕິ ແລະ ຍາວ​ນານ.

 

Additional information