ກະຊວງ ໂຍທາທິການ ແລະ ຂົນສົ່ງ ສະເຫຼີມສະຫຼອງບຸນປີໃໝ່ລາວ ປະຈຳປີ ພສ 2560 ແລະ ພິທີຍ້ອງຍໍຂະບວນການກິລາຂອງກະຊວງ

 

  ເນື່ອງ​ໃນ​ໂອກາດສະ​ເຫຼີ​ມສະຫຼອງບຸນປີໃໝ່ລາວ ປະຈຳປີ  ພສ 2560 ແລະ ພິທີຍ້ອງຍໍຂະບວນ ການກິລາຂອງກະຊວງ ໂຍທາທິການ ແລະ ຂົນສົ່ງ ໃຫ້ມີເນື້ອໃນຖືກຕ້ອງສອດຄ່ອງຕາມ ຮີດຄອງປະເພນີລາວ, ແນໃສ່ການອະນຸລັກຮັກສາ, ​ເສີມ​ຂະຫຍາຍ​ມູນ​ເຊື້ອ, ສົ່ງເສີມຮີດຄອງປະເພນີທີ່ດີງາມ ​ແລະ ຄວາມ​ສາມັກຄີ​ເປັນ​ປຶກ​ແຜ່ນຂອງຊາດທີ່ເຄີຍປະຕິບັດ ກັນມາແຕ່ດົນ​ນານ​ແລ້ວ. ກະຊວງ ​ໂຍທາ​ທິການ ​ແລະ ຂົນ​ສົ່ງ ​ໄດ້​ຈັດ​ພິທີທາງ​ສາສະໜາ ຕັກບາດ ຖະຫວາຍ​ສັງຄະ​ທານ ​ແດ່​ພະ​ສົ່ງ​ສຳມະ​ເນນ, ບາສີສູ່ຂັວນ ແລະ ພາເຂົ້າສາມັກຄີ ​ໃນວັນ​ອັງຄານ, ​ວັນ​ທີ 11 ​ເມສາ 2017 ທີ​ ກະຊວງ ​ໂຍທາ​ທິການ ​ແລະ ຂົນ​ສົ່ງ​ ເພື່ອ​ເປັນ​ການ​ເຕົ້າ​ໂຮມ​ຄວາມ​ສາມັກຄີ​, ພົບ​ປະກັບ​ພະນັກງານ​ອາວຸ​ໂສ ​ແລະ ສະ​ແດງ​ເຖິງ​ຄວາມ​ຮູ້​ບຸນຄຸນ​ຕໍ່​ຄະນະພັກ ຄະນະ​ນຳ ແລະ ພະນັກງານ​​ແຕ່​ອາ​ດິດຈົນ​ເຖິງ​ປະຈຸ​ບັນ ​ແລະ ຖື​ເອົາ​ໂອ​ກາດ​ນີ້​ອວຍພອນ​ໄຊ​ເຊິ່ງກັນ ​ແລະ ​ກັນ ດ້ວຍ​ບັນຍາກາດ​ເບີກບານ​ມ່ວນ​ຊື່ນ, ​​ ໃນ​ໂອກາດ​ສະ​ເຫຼີມ​ສະຫຼອງບຸນປີ​ໃໝ່​ນີ້ ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ປອ ບຸນ​ຈັນ ສິນ​ທະ​ວົງ ລັດຖະມົນ​ຕີກະຊວງ ຍທຂ; ທ່ານ​ ລັດຕະນະມະ​ນີ ຄູນ​ນີວົງ ຮອງລັດຖະມົນ​ຕີ; ທ່ານ ນາງ ວິ​ໄລ​ຄຳ ​ໂພ​ສາລາ​ດ ຮອງລັດຖະມົນ​ຕີ; ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງ ​ໂຍທາ​ທິການ ​ແລະ ຂົນ​ສົ່ງ ພ້ອມດ້ວຍ ຄະນະ​ພັກ ຄະນະ​ນຳ ກະຊວງ ຍທຂ, ມີ​ບັນດາກົມ, ກອງ, ຫ້ອງການ, ສະຖາບັນ  ​ແລະ ບັນດາ​ລັດ​ວິ​ສາ​ຫະກິດ ອ້ອມ​ຂ້າງ​ກະຊວງ ​ໂຍທາ​ທິການ ​ແລະ ຂົນ​ສົ່ງ.

​​ ໃນ​ພິທີ​ດັ່ງກ່າວ ຊຶ່ງ​ຕອນ​ເຊົ້າ​ໄດ້​ມີ​ພິທີທາງ​ສາສະໜາ ຕັກບາດ ຖະຫວາຍ​ສັງຄະ​ທານ ​ແດ່​ພະ​ສົ່ງ​ສຳມະ​ເນນ, ບາສີສູ່ຂັວນ ແລະ ພາເຂົ້າສາມັກຄີ. ນອກຈາກ​ນັ້ນ ຍັງ​ໄດ້​ຈັດພິທີອວຍພອນ​ພະນັກງານ​ອາວຸ​ໂສ​ບຳນານ ​ແລະ ພິທີຍ້ອງຍໍຂະບວນການກິລາຂອງກະຊວງ ໂຍທາທິການ ແລະ ຂົນສົ່ງ ຊຶ່ງໃນພິທີກໍ່​ໄດ້​ມອບ​​ໃບຍ້ອງຍໍໃຫ້ ບັນດາພາກສ່ວນອຸປະຖຳກອງປະຊຸມ ຍທຂ ທົ່ວປະເທດ ປະຈຳປີ 2016 ແລະ ມອບໃບຍ້ອງຍໍໃຫ້ ນັກ​ກິລາ​ດີ​ເດັ່ນ ​ແລະ ຄະນະ​ຮັບຜິດຊອບ​ກິລາ​ເປ​ຕັງຂອງກະຊວງ ​ທີ​ໄດ້ຂັນຊະນະເລີດຂອງປະທານສະພາແຫ່ງຊາດ ແລະ ຂັນຊະນະເລີດ ຂອງທ່ານ ນາຍົກລັດຖະມົນຕີ. ໃນພິທີສະເຫຼີມສະຫຼອງດັ່ງກ່າວ ແມ່ນ​ເຕັມ​ໄປ​ດ້ວຍ​ຄວາມ​ສາມັກຄີ ແລະ ​ເບີກບານ​ມ່ວນ​ຊື່ນ.

 ເພື່ອ​ປະຕິບັດ​ຕາມ​​ແຈ້ງ​ການ​ຂອງຫ້ອງ​ວ່າການສຳນັກງານນາຍົກລັດຖະມົນຕີ ​ໃນ​ການ​ປະຢັດ ມັດທະຢັດ ແລະ ​ໃຫ້​​ໄດ້ຮິດຄອງ​ປະ​ເພ​ນີ້​ອັນ​ດີງາມ​ຂອງຊາດ​ລາວ​ເຮົາ, ​ໃນ​ການຫຼິ້ນບຸນປີໃໝ່ລາວຕ້ອງໃຫ້ພໍດີພໍງາມ ຫຼີກລ່ຽງການຈັດພິທີແບບໃຫຍ່ໂຕ ຟຸມເຟືອຍ. ບໍ່​ໃຫ້​ນຳ​ໃຊ້​ງົບປະມານ ​ແລະ ພາ​ຫະນະຂອງ​ລັດ ​ໄປ​ທ່ຽວ​ຫຼີ້ນບຸນ, ຫຼີກລ່ຽງການຊື້-ຂາຍເຄື່ອງດື່ມມຶນເມົາໃນວັດວາອາຮາມ, ສະຖານທີ່ສັກກະລະບູຊາ, ການຫຼິ້ນ, ກິນ, ການດື່ມ ແລະ ມ່ວນຊື່ນໃຫ້ຢູ່ໃນຂອບເຂດ, ຕາມລະບຽບການຕ່າງໆຂອງເຈົ້າໜ້າທີ່ກ່ຽວຂ້ອງກຳນົດໄວ້ ​ແລະ ​ເພື່ອ​ຮັບປະກັນຄວາມ​ປອດຕາມ​ທ້ອງ​ຖະໜົນ, ​ໃຫ້​ເພີ່​ມທະວີ​ການ​ໂຄສະນາ ປູກ​ຈິດ​ສຳນຶກ “​ເມົາ​ແລ້ວ​ບໍ່​ຂັບ​ລົດ” ​ເພື່ຶອປ້ອງກັນ​ການ​ເກີດ​ອຸບັດ​ຕິເຫດ; ການສະ​ເຫຼີ​ມສະຫຼອງ​ຫົດ​ນ້ຳ ຕ້ອງ​ຮັບປະກັນ​ບໍ່​ສ້າງ​ຄວາມ​ເສຍ​ຫາຍ ​ແລະ ບໍ່​ເປັນ​ອັນຕະລາຍ​ຕໍ່ຊິວິດ ​ແລະ ຊັບ​ສິນ​ຂອງ​ບຸກຄົນ ​ແລະ ສະຖານ​ທີ່ສາທາ​ລະນະ.

 

Additional information