ກະຊວງ ຍທຂ ໄດ້ຮັບປື້ມ”ຍ່າງເຂົ້າ 50 ປີແຫ່ງການພົວພັນລະຫວ່າງລາວ-ຈີນ”

 ໃນ​ວັນ​ທີ 6 ມີນາ 2017 ທີ​ຫ້ອງ​ຮັບ​ແຂກ ກະຊວງ ​ໂຍທາ​ທິການ ​ແລະ ຂົນ​ສົ່ງ ​ໄດ້ຈັດ​ພິທີ​ມອບ-​ຮັບປື້​ມ”ຍ່າງເຂົ້າ 50 ປີແຫ່ງການພົວພັນລະຫວ່າງລາວ-ຈີນ” ​ເນື່ອງໃນໂອກາດທີ ສປປ ລາວ ແລະ ສປ ຈີນໄດ້ສ້າງຕັ້ງສາວຍພົວພັນການທູດນຳກັນຄົບຮອບ 56 ປີ (25/4/1961-25/4/2017), ທີ່ກະຊວງໂຍທາທິການ ແລະ ຂົນສົ່ງ; ທ່ານ ZHANG RUIKUN , ປະທານສະມາຄົມຄົ້ນຄ້ວາບັນຫາ ອາຊີ - ອາຄະເນ ຂອງ ແຂວງ ຢຸນນານ ສປ ຈີນ, ອະດີດທີ່ປືກສາ ດ້ານເສດຖະກິດ - ການຄ້າ ສະຖານເອກອັກຄະລັກຖະທູດ ແຫ່ງ ສປ ຈີນ ປະຈໍາ ສປປ ລາວ ໄດ້ຈັດພິມປຶ້ມ << ຍ່າງເຂົ້າ 50 ປີ ແຫ່ງການພົວພັນລະຫວ່າງ ຈີນ - ລາວ >> ແລະ ໄດ້ນຳມາມອບໃຫ້ສະມາຄົມ ມິດຕະພາບ ລາວ -ຈີນ ຂັ້ນສູນກາງໃນເບື້ອງຕົ້ນຈຳນວນ 56 ຫົວ, ເປັນມູນຄ່າ 6.720.000 ກີບ ໂດຍ ທ່ານ ລັດຕະມະນີ ຄຸນນິວົງ, ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ, ຮອງປະທານສະມາຄົມ ມິດຕະພາບ ລາວ -ຈີນ ຂັ້ນສູນກາງໃຫ້ກຽດຮັບ ແລະ ທ່ານ Zhang Jie ຕາງໜ້າທ່ານ ZHANG RUIKUN, ປະທານສະມາຄົມຄົ້ນຄ້ວາບັນຫາ ອາຊີ - ອາຄະເນ ຂອງ ແຂວງ ຢູນນານ ສປ ຈີນ ເປັນຜູ້ມອບ ແລະ ຈະສືບຕໍ່ສົ່ງມາມອບໃຫ້ອີກຕໍ່ຕາມຄວາມຕ້ອງການ.

      ພ້ອມນີ້, ສະມາຄົມມິດຕະພາບ ລາວ - ຈີນ ຂັ້ນສູນກາງ ກໍ່ໄດ້ມອບໃບຍ້ອງຍໍ ແກ່ທ່ານ ZHANG RUIKUN ແລະ ທ່ານ  XU YINGXI (ໄດ້ມອບຮູບແຕ້ມທີ່ພັນລະນາເຖິງສາຍພົວພັນມິດຕະພາບ ລາວ - ຈີນ) ເພື່ອເປັນການສັນລະເສີນຜົນງານ ແລະ ຄຸນງາມຄວາມດີ ທີ່ມີຕໍ່ສະມາຄົມມິດຕະພາບ ລາວ - ຈີນ ຂັ້ນສູນກາງ ກໍ່ຄື ສປປ ລາວ.

      ໃນໂອກາດນີ້ ທ່ານ ຮອງປະທານ ສະມາຄົມ ມິດຕະພາບ ລາວ - ຈີນ ຂັ້ນສູນກາງ ໄດ້ກ່າວວ່າ : ປຶ້ມທີ່ນໍາມາມອບໃຫ້ແກ່ສະມາຄົມ ມິດຕະພາບລາວ - ຈີນ ຂັ້ນສູນກາງ ໃນຄັ້ງນີ້ມີຄຸນຄ່າ ແລະ ມີຄວາມສໍາຄັນຫຼາຍຕໍ່ສະມາຄົມມິດຕະພາບລາວ - ຈີນ ຂັ້ນສູນກາງ, ເປັນການປະກອບສ່ວນເຂົ້າໃນຄັງສາງແຫ່ງສະຕິປັນຍາດ້ານຂໍ້ມູນການພົວພັນລາວ ແລະ ຈີນ; ຊຶ່ງບັນດາພະນັກງານ, ນັກຮຽນ, ນັກສຶກສາ ທັງລາວ ແລະ ຈີນ ຈະໄດ້ນຳໃຊ້ເປັນຂໍ້ມູນໃນການຄົ້ນຄ້ວາໃນອະນາຄົດ.

      ສະມາຄົມມິດຕະພາບ ລາວ - ຈີນ ຂັ້ນສູນກາງ ຂໍສະແດງຄວາມຂອບໃຈຢ່າງຈິງໃຈ ແລະ ຫັວງຢ່າງຍິ່ງວ່າຈະໄດ້ຮັບການປະກອບສ່ວນດ້ານອື່ນໆຕື່ມອີກຈາກ ທ່ານ ZHANG RUIKUN ໃນຕໍ່ໜ້າ ເພື່ອປະກອບສ່ວນເສີມສ້າງ ແລະ ພັດທະນາສາຍພົວພັນມິດຕະພາບ ແລະ ການຮ່ວມມືຍຸດທະສາດຮອບດ້ານໝັ້ນຄົງຍາວນານລະຫວ່າງສອງພັກສອງລັດ ແລະ ປະຊາຊົນສອງຊາດລາວ ແລະ ຈີນ ໃຫ້ຈະເລີນງອກງາມຂຶ້ນໄປຢ່າງບໍ່ຢຸດຢັ້ງ.

Additional information