ລັດຖະມົນຕີ ກະຊວງໂຍທາທິການ ແລະ ຂົນສົ່ງ ລົງຕິດຕາມການກໍ່ສ້າງເສັ້ນທາງລົດໄຟລາວ-ຈີນ ຢູ່ຫຼວງນໍ້າທາ

 ໃນວັນທີ 28 ມີນາ 2017 ຜ່ານມາ ທ່ານ ປອ ບຸນຈັນ ສິນທະວົງ ລັດຖະມົນຕີກະຊວງ ໂຍທາທິການ ແລະ ຂົນສົ່ງ ຫົວໜ້າຄະນະຊີ້ນຳໂຄງການກໍ່ສ້າງເສັ້ນທາງລົດໄຟລາວ-ຈີນ, ພ້ອມດ້ວຍຄະນະລົງຕິດຕາມ ກວດກາ ໂຄງການກໍ່ສ້າງທາງລົດໄຟລາວ-ຈີນ ຢູ່ແຂວງລວງນໍ້າທາ, ໂດຍການຕ້ອນຮັບຂອງທ່ານ ເພັດຖາວອນ ພິລາວັນ ເຈົ້າແຂວງຫຼວງນໍ້າທາ, ມີກຳມະການພັກແຂວງ ແລະ ພ້ອມດ້ວຍບັນດາຄະນະນຳຂອງແຂວງ ຕະຫຼອດຮອດພະນັກງານວິຊາການ ລົງກວດກາຊີ້ນຳໂຄງການກໍ່ສ້າງເສັ້ນທາງລົດໄຟລາວ-ຈີນການເຄື່ອນໄຫວດັ່ງກ່າວ ແມ່ນເພື່ອປະຕິບັດຕາມທິດຊີ້ນຳ ໂຄງການກໍ່ສ້າງເສັ້ນທາງລົດໄຟລາວ-ຈີນ ຕາມການແຈ້ງການຂອງກະຊວງໂຍທາທິການ ແລະ ຂົນສົ່ງ ວ່າດ້ວຍການດໍາເນີນການກໍ່ສ້າງເສັ້ນທາງເວັ້ນຢູ່ຂອບເຂດດ່ານສາກົນບໍ່ເຕັນ ແລະ ດ່ານພາສີສາກົນບໍ່ເຕັນ, ຕັ້ງປ້ອມກວດກາສະເພາະ ສໍາລັບຂົນສົ່ງວັດສະດຸ, ອຸປະກອນ ແລະ ກົນຈັກ, ເພື່ອນໍາມາໃຊ້ໂຄງການກໍ່ສ້າງທາງລົດໄຟລາວ-ຈີນ, ບໍລິສັດກໍ່ສ້າງທາງລົດໄຟ ເປັນຜູ້ຮັບຜິດຊອບງົບປະມານທັງໝົດ ແລະ ສົມທົບກັບພາກສ່ວນກ່ຽວຂ້ອງຂອງແຂວງ, ເພື່ອຈັດຕັ້ງປະຕິບັດໃຫ້ໄດ້ຮັບຜົນດີ, ໂດຍສະເພາະພື້ນທີ່ເຈາະອຸໂມງມິດຕະພາບ-ລາວຈີນ, ສະຖານີບໍ່ເຕັນ, ຈຸດຕັ້ງແຄ້ມ ແລະ ສິ່ງອຳນວຍຄວາມສະດວກອື່ນໆ, ບັນດາບ້ານ ແລະ ເຮືອນທີ່ຖືກເສັ້ນທາງລົດໄຟ ແມ່ນໃຫ້ຍ້າຍອອກໄປຕັ້ງບ່ອນໃໝ່ຊົ່ວຄາວ, ພ້ອມອຳນວຍຄວາມສະດວກດ້ານໄຟຟ້າ ແລະ ນໍ້າປະປາ. ບໍລິສັດທາງລົດໄຟເລກ 5 ສປ ຈີນ ເປັນຜູ້ຮັບຜິດຊອບໃນການໃຊ້ຈ່າຍ ແລະ ລໍຖ້າການຈັດສັນໃໝ່ຂອງລັດ, ປະຊາຊົນສ່ວນໃຫຍ່ໄດ້ເຂົ້າໃຈເຖິງແນວທາງນະໂຍບາຍຂອງພັກ-ລັດ ໃນການພັດທະນາເສດຖະກິດ-ສັງຄົມ ຂອງປະເທດ ແລະ ທຸກຄົນເຫັນດີໃນການກໍ່ສ້າງເສັ້ນທາງລົດໄຟ. ສຳລັບຄວາມຄືບໜ້າ ການຈັດຕັ້ງປະຕິບັດ ໂຄງການເສັ້ນທາງລົດໄຟລາວ-ຈີນ ໃນຊ່ວງທີໜຶ່ງເລີ່ມແຕ່ບໍ່ເຕັນຊາຍແດນລາວ-ຈີນ ຫາເມືອງນາໝໍ້ ແຂວງອຸດົມໄຊ ມີຄວາມຍາວ 52,9 ກິໂລແມັດ, ຜ່ານເມືອງຫຼວງນໍ້າທາ 16,9 ກິໂລແມັດ, ມີສອງສະຖານີຄື: ສະຖານີບໍ່ເຕັນ ເປັນສະຖານີນ້ອຍສຳລັບກວດຄົນເຂົ້າ-ອອກເມືອງ ແລະ ສະຖານີນາເຕີຍ ເປັນສະຖານີສຳລັບຄ່ຽນຖ່າຍສິນຄ້າ, ມີຂົວ 7 ແຫ່ງ ຍາວ 4.907 ແມັດ ແລະ ອຸໂມງ 3 ແຫ່ງ ຍາວ 10.054 ແມັດຄື: ອຸໂມງມິດຕະພາບ-ລາວຈີນ, ອຸໂມງບໍ່ເຕັນ ແລະ ອົງໂມງຕີນຕົກ. ການເກັບກູ້ລະເບີດຍັງບໍ່ທັນແຕກຕາມແລວທາງລົດ​​ໄຟ ແລະ ຂອບເຂດ ສະຖານີລົດໄຟ ປະຈຸບັນສຳເລັດເກືອບ 100%.

 

 ໂຄງການກໍ່ສ້າງເສັ້ນທາງລົດໄຟລາວ-ຈີນ ເປັນໂຄງການທີ່ນອນຢູ່ໃນແຜນຍຸດທະສາດຂອງ ລັດຖະບານ ແລະ ນອນໃນແຜນຍຸດທະສາດຂອງກະຊວງໂຍທາທິການ ແລະ ຂົນສົ່ງ, ເປັນການຕົກລົງຂອງສອງລັດຖະບານ ເມື່ອສ້າງສຳເລັດ ສປປ ລາວ ຈະມີການເຊື່ອມໂຍງກັບພາກພື້ນຂອງອາຊຽນ ເປັນການພັດທະນາເສດຖະກິດສັງຄົມຂອງປະເທດ ກໍຄືການຄ້າ, ການບໍລິການ, ການທ່ອງທ່ຽວ ແລະ ໂຄງການນີ້ລັດຖະບານລົງທຶນ 730 ລ້ານດອນລາສະຫະລັດ, ຖືຫຸ້ນ 40%.

 

Additional information