ສະຫະພັນແມ່ຍິງກະຊວງ ຍທຂ ປາຖະກະຖາມູນເຊື້ອວັນແມ່ຍິງສາກົນ, ຜັນຂະຫຍາຍມະຕິກອງປະຊຸມຄົບຄະນະບໍລິຫານງານສະຫະພັນແມ່ຍິງລາວ ຄັ້ງທີ 2 ສະໄໝທີ VII ແລະ ການເຄື່ອນໄຫວຂອງສະຫະພັນແມ່ຍິງ.

ໃນ​ວັນ​ທີ 24 ມີນາ 2017 ສະຫະພັນແມ່ຍິງ​ກະຊວງ ​ໂຍທາ​ທິການ ​ແລະ ຂົນ​ສົ່ງ ​ໄດ້​ຈັດ ປາຖະກະຖາມູນເຊື້ອວັນແມ່ຍິງສາກົນ, ຜັນຂະຫຍາຍມະຕິກອງປະຊຸມຄົບ​ຄະນະ​ບໍລິຫານ​ງານ​ສະຫະພັນແມ່ຍິງລາວ ຄັ້ງ​ທີ 2 ສະ​ໄໝທີ VII ແລະ ຂໍ້​ຕົກລົງ ວ່າ​ດ້ວຍການ​ເຄື່ອນ​ໄຫວ​ຂອງ​ສະຫະພັນ​ແມ່ຍິງກະຊວງ-ອົງການ​ຂັ້ນ​ສູນ​ກາງ ຢູ່​ທີ່​ຫ້ອງ​ປະຊຸມ​​​ໃຫຍ່​ກະຊວງ ຍທຂ ​ໂດຍ​​ກຽດເປັນ​ເຂົ້າ​ຮ່ວມ​ຂອງ​ທ່ານ ລັນ ​ແສງອາພອນ ຄະນະ​ປະຈຳ​ພັກ​ກະຊວງ, ຫົວໜ້າ​ກົມ​ຈັດ​ຕັ້ງ​ ​ແລະ ພະນັກງານ; ທ່ານ ນາງ ພອນສະຫວັນ ແພງສີດາ ປະທານຄະນະບໍລິຫານງານ ສະຫະພັນແມ່ຍິງກະຊວງ,​ ຫົວໜ້າ​ສະ​ຖາ​ບັນ​ໂຍທາ ​ແລະ ຂົນ​ສົ່ງ; ມີ​ຫົວໜ້າກົມ, ຮອງ​ຫົວໜ້າຫ້ອງການ, ຮອງ​ຫົວໜ້າກົມ, ກອງ, ສະ​ຖາ​ບັນ​, ມີຄະນະບໍລິຫານງານ ສະຫະພັນແມ່ຍິງກະຊວງ, ມີ​ຫົວໜ້າ, ຮອງ​ຫົວໜ້າ​ໜ່ວຍ​ສະຫະພັນ​ແມ່ຍິງ​ຂັ້ນ​ກົມ, ກອງ, ສະຖານ​ບັນ ​ແລະ ​ໜ່ວຍ​ສະຫະພັນ​ແມ່ຍິງລັດ​ວິ​ສາ​ຫະກິດ​ອ້ອມ​ຂ້າງ​ກະຊວງ​ເຂົ້າ​ຮ່ວມ​ຢ່າງ​ພ້ອມພຽງ.

      ກອງ​ປະຊຸ​ມ​ໃນ​ຄັ້ງ​ນີ້ທ່ານ ນາງ ພອນສະຫວັນ ແພງສີດາ ປະທານຄະນະບໍລິຫານງານ ສະຫະພັນແມ່ຍິງກະຊວງ,​ ຫົວໜ້າ​ສະ​ຖາ​ບັນ​ໂຍທາ ​ແລະ ຂົນ​ສົ່ງ ກໍ່ໄດ້​​ໃຫ້​ກຽດ​​ເຜີຍ​ແຜ່ມະຕິກອງປະຊຸມຄົບ​ຄະນະ​ບໍລິຫານ​ງານ​ສະຫະພັນແມ່ຍິງລາວ ຄັ້ງ​ທີ 2 ສະ​ໄໝທີ VII ແລະ ຜັນ​ຂະຫຍາຍຂໍ້​ຕົກລົງ ວ່າ​ດ້ວຍການ​ເຄື່ອນ​ໄຫວ​ຂອງ​ສະຫະພັນ​ແມ່ຍິງກະຊວງ-ອົງການ​ຂັ້ນ​ສູນ​ກາງ; ນອກຈາກ​ນັ້ນ ກອງ​ປະຊຸມ​ຍັງ​ຮັບ​ຟັງ​ມູນ​ເຊື້ອ​ວັນ​ແມ່ຍິງ​ສາກົນທີ 8 ມີນາ 2017 ຄົບຮອບ 107 ປີ ​ໂດຍ​​ເປັນ​ກຽດ​ປາຖະກະຖາ​ຂອງ​ທ່ານ ນາງ ຈັນທະ​ໜອມ ສຸລິ​ໂຍ ຮອງ​ປະທານ​ສະຫະພັນ​ແມ່ຍິງ​ກະຊວງ ຊອ່ງທ່ານ​ຮອງ​ປະທານ​ແມ່​ຍິງ ​ໄດ້​ຍົກ​ໃຫ້​ເຫັນ​ມູນ​ເຊື້ອ​ຄວາມ​ເປັນ​ມາ​ຂອງ​ວັນ​ດັ່ງກ່າວ, ​ເຊຶ່ງ​ເລີມ​ແຕ່​ວັນ​ທີ 8 ມີນາ 1908 ​ແມ່ຍິງ​ຈໍານວນ 15.000 ຄົນ ​ໄດ້​ເດີນ​ຂະ​ບວນຢູ່​ເມືອງ​ນິວຢອກ ​ເພື່ອ​ທວງ​ໃຫ້​ນາຍທຶນ​ຫຼຸດຜ່ອນ​ຊົ່ວ​ໂມງ​ເຮັດ​ວຽກຢຸດ​ເຊົາ​ການ​ຂູດ​ຮີດ​ແຮງ​ງາ​ນ​ເດັກ ​ແລະທວງ​ໃຫ້​ແມ່ຍິງ​ມີ​ສິດ​ໃນ​ການ​ອອກສຽງ, ການ​ເດີນ​ຂະ​ບວນ​ໃນ​ຄັ້ງ​ນີ້ ​ ​ພາຍ​ໃຕ້​ຄໍາ​ຂັວນ “​ເຂົ້າ​ຈີ່ ​ແລະດອກ​ກຸຫລາບ“ ເຊິ່ງ​ເຂົ້າ​ຈີ່ໝາຍ​ເຖິງ: ​ເສດຖະກິດ​ດີ​ຂື້ນ​ ແລະ ດອກ​ກຸຫລາບ: ໝາຍ​ເຖິງຄຸນ​ນະພາ​ບຊີວິດ​ດີ​ຂື້ນ ມາ​ຮອດ​ເດືອນ ກຸມພາ 1909 ​ແມ່ຍິງ​ອາ​ເມ​ລິ​ກາ ​ໄດ້ຈັດ​ພິທີ​ສະຫຼອງ​ວັນ​ແມ່ຍິງ​ສາກົນ​ເປັນ​ເທື່ອ​ທໍາ​ອິດ. ​ເຊີ່ງແມ່ນແມ່ຍິງ​ໃນ​ເມືອງ​ນິວຢອກ 3.000 ຄົນ ​ໄດ້​ເຂົ້າ​ຮ່ວມ​ການ​ຕໍ່​ສູ້​ຄັດຄ້ານ​ລັດຖະບານທີ່​ບໍ່​ຍອມ​ໃຫ້​ແມ່ຍິງ​ມີ​ສິດ​ຮັບ​ເລືອກ​ຕັ້ງ, ການ​ຕໍ່ສູ້​ດັ່ງກ່າວ​ໄດ້​ເປັນ​ການ​ປຸກລະດົມ​​ນ້ຳໃຈຕໍ່ສູ້​ຂອງ​​ແມ່ຍິງທີ່​ຖືກ​ກົດ​ຂີ່​ຂູດ​ຮີດຢູ່​​ປະ​ເທດ​ຕ່າງໆໃນ​ທົ່ວ​ໂລກ. ມາ​ເຖິງປີ 1910 ຂະ​ບວນການ​ຕໍ່ສູ້​ຂອງ​ແມ່ຍິງ​ໄດ້​ແຜ່​ຂະຫຍາຍ​ກ້ວາງອອກ ​ໄປ​ສູ່​ປະ​ເທດ​ນາຍທຶນຢູ່​ທະວິບ​ເອີ​ລົບ ​ແລະ ​ໃນ​ປີ​ນີ້​ເອງກອງ​ປະຊຸມ​ສາກົນ​ກ່ຽວ​ກັບ​ບັນ​ຫາ​ແມ່ຍິງ​ຄັ້ງ​ທໍາ​ອິດ ​ໄດ້​ຈັດ​ຂື້ນ​ຢູ່ ​ໂກ​​ເປັນຮາ​ເກນ ນະຄອນຫຼວງ​ຂອງ​ປະ​ເທດ ​ເດນ​ມາກ (Copenhagen Denmark) ມີ​ຜູ້​ແທນ 100 ກວ່າ​ຄົນ​ຈາກ 17 ​ປະ​ເທດ​ ເຂົ້າ​ຮ່ວມກອງ​ປະຊຸມ​ດັ່ງກ່າວ​, ກອງ​ປະຊຸມໄດ້​ຕົກລົງ​ ​ແລະ ຮັບຮອງ​ ເອົາ​ວັນ​ທີ 8 ມີນາ ຂອງ​ທຸກໆ​ປີ​ເປັນ​ວັນ​ແມ່ຍິງ​ສາກົນ ​ເປັນ​ວັນ​ລະນຶກ​ເຖິງການ​ຕໍ່ສູ້​ຂອງ​​ແມ່ຍິງ ​ເພື່ອ​ປົດ​ປ່ອຍ​ຕົນ​ເອງ ​ແລະ ທວງ​ໃຫ້​ມີ​ສິດສະ​ເໝີ​ພາບປະຊາທິປະ​ໄຕ​ຄື​ກັນ​ກັບ​ຜູ້​ຊາຍ, ທວງ​ໃຫ້​ແກ້​ໄຂ​ຊີວິດ​ການ​ປັນ​ຢູ່​ພາຍ​ໃຕ້​ຄໍາ​ຂັວນ “ຜູ້ໜຶ່ງ​ເຮັດ​ວຽກ​ມື້​ລະ 8 ຊົ່ວ​ໂມງ ​ແມ່ຍິງ ​ແລະຜູ້​ຊາຍ​ເຮັດ​ວຽກ​ຄື​ກັນຕ້ອງ​ໄດ້​ຮັບ​ເງິ​ນ​ເດືອນ​ເທົ່າ​ກັນຕ້ອງ​ມີ​ລະບອບ​ປະ​ກັນ​ສຸຂະພາບຂອງ​ແມ່ຍິງ ​ແລະ ​ເດັກນ້ອຍຕ້ານ​ສົງ​ຄາມ​ຮຸກຮານປົກປັກ​ຮັກສາ​ສັນຕິພາບ​ຂອງ​ໂລກ“ ນັບ​ແຕ່​ນັ້ນ​ມາ​ວັນ​ທີ 8 ມີນາ​ ຈິງ​ເປັນ “ວັນ​ແມ່ຍິງ​ສາ​ກົນ“ ພາສາ​ອັງກິດ​ເອີ້ນ​ວ່າ: “International Women’s Day”.

 ໃນໂອກາດດັ່ງກ່າວ ທ່ານ ນາງ ທິບ​ພານີ ​ເພັດ​ທະ​ວົງ ຮອງປະທານສະຫະພັນແມ່ຍິງກະຊວງ ຍັງໄດ້ໃຫ້ກຽດເຜີຍແຜ່ບົດສະຫຼຸບ​ລາຍ​ງານ​ວຽກ​ງານ​ກອງ​ທຶນ​ຊ່ວຍ​ເຫຼືອ​ເຊຶ່ງ​ກັນ ​ແລະ ກັນ ຂອງ​ກະຊວງ ​ໂຍທາ​ທິການ ​ແລະ ຂົນ​ສົ່ງ ຕໍ່​ກອງ​ປະຊຸມ​ໃນ​ການຈັດ​ຕັ້ງ​ປະຕິບັດ​ຜ່ານ​ມາ ​ແລະ ​ແຜນການ​ໃນ​ຕໍ່ໜ້າ.

Additional information