ກອງປະຊຸມຜັນຂະຫຍາຍເນື້ອໃນຈິດໃຈຂອງກອງປະຊຸມວຽກງານກວດກາທົ່ວປະເທດ ປະຈຳປີ 2016

 ກອງປະຊຸມຜັນຂະຫຍາຍເນື້ອໃນຈິດໃຈຂອງກອງປະຊຸມວຽກງານກວດກາ ປະຈຳປີ 2016 ໄດ້ເປີດຂຶ້ນໃນຕອນເຊົ້າຂອງວັນທີ 28 ມີນາ 2017 ໂດຍການເປັນປະທານຂອງ ສະຫາຍ ນາງ ວິໄລຄຳ ໂພສາລາດ ປະທານກວດກາພັກກະຊວງ, ຮອງລັດຖະມົນຕີກະຊວງ ຍທຂ, ບັນດາສະຫາຍຄະນະພັກກະຊວງ, ທີ່​ປຶກສາ​ລັດຖະມົນຕີ, ຄະນະກວດກາພັກກະຊວງ, ບັນດາສະຫາຍເລຂາ, ຮອງ​ເລຂາ, ກຳມະການ​ຄະນະ​ພັກຮາກຖານ ​ແລະ ​ເລຂາ, ຮອງ​ເລຂາ ໜ່ວຍ​ພັກ​ທີ່​ຂື້ນ​ກັບ​ຄະນະ​ພັກ​ຮາກ​ຖານ; ບັນດາສະຫາຍເລຂາ, ຮອງ​ເລຂາ, ກຳມະການ​ໜ່ວຍພັກຮາກຖານ, ບັນດາ​ຄະນະ​ອຳນວຍ​ການ​ລັດ​ວິ​ສາ​ຫະກິດ​ອ້ອມ​ຂ້າງ​ກະຊວງ; ປະທານ, ຮອງ​ປະທານ, ​ເລຂາ, ຮອງ​ເລຂາ ພ້ອມ​ດ້ວຍ​ຄະນະຂອງ​ສາມ​ອົງການ​ຈັດ​ຕັ້ງ​ມະຫາຊົນ​ຂັ້ນ​ກະຊວງ ທີຮັບຜິດຊອບວຽກກວດກາ ກໍ່ໃຫ້ກຽດເຂົ້າຮ່ວມ.

 

 ກອງປະຊຸມຜັນຂະຫຍາຍເນື້ອໃນຈິດໃຈຂອງກອງປະຊຸມວຽກງານກວດກາ ປະຈຳປີ 2016 ໃນຄັ້ງນີ້ແມ່ນເພື່ອຕີລາຄາຄືນການເຄື່ອນໄຫວວຽກງານກວດກາ, ການຈັດ​ຕັ້ງ​ປະ​ຕິ​ບັດ​ວຽກ​ງານ​ຕິດຕາມ​ກວດກາ ໃນໄລຍະ 1 ປີຜ່ານມາ ​ແລະ ​ທິດ​ທາງ​​ແຜນການ​ເຄື່ອນ​ໄຫວວຽກ​ງານ​ກວດກາ ​ປີ 2017, ຊຶ່ງຄະນະພັກ-ຄະນະນຳກະຊວງ ຍທຂ ໄດ້ສືບຕໍ່ຊີ້ນຳໆພາໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກທີ່ກຳນົດໄວ້ໃນມະຕິກອງປະຊຸມໃຫຍ່ຄັ້ງທີ X ຂອງ​ພັກ ກໍ່​ຄື​ມະຕິ​ກອງ​ປະຊຸມ​ໃຫຍ່​ຄັ້ງ​ທີ IV ຂອງ​ອົງຄະ​ນະ​ພັກ​ກະຊວງ  ​ແລະ ​ແຜ​ນ​ພັດທະນາ​ເສດ​ທະ​ກິດ-ສັງຄົມ ຂະ​ແໜງ ​ໂຍທາ​ທິການ ​ແລະ ຂົນ​ສົ່ງ, ຊຶ່ງ​ສະ​ແດງອອກການ​ກໍ່ສ້າງພື້ນຖານ​ໂຄງ​ລ່າງ, ການ​ຄຸ້ມ​ຄອງ ​ແລະ ການບໍລິຫານ​ທາງ​ດ້ານ ​ໂຍທາ​ທິການ ​ແລະ ຂົນ​ສົ່ງ ​ໄດ້​ຮັບ​ການ​ປັບປຸງ​ດີ​ຂື້ນ ​ແລະ ກ້າ​ວ​​ສູ່​ຄວາມທັນ​ໄໝ​ສະດວກ​ວ່ອງ​ໄວ​ເປັນ​ກ້າວໆ,​ ປະຊາຊົນ​ໄດ້​ຊົມ​ໃຊ້​ຢ່າງ​ກ້ວາງ​ຂວາງ, ຖັນ​ແຖວ​ພະນັກງານ-ສະມາຊິກ​ພັກ​ກໍ່​ໄດ້​ຮັບ​ການ​ບຳລຸງ ​ແລ​ະ ກໍ່ສ້າງ​ທາງ​ດ້ານ​ແນວ​ຄິດ​-ການ​ເມືອງ, ການຈັດ​ຕັ້ງ ​ແລະ ທາງ​ດ້ານ​ແບບ​ແຜນ​ວິທີ​ເຮັດ​ວຽກ.

 

 ຄືດັ່ງທີ່ໄດ້ຮູ້ນຳກັນແລ້ວວ່າ: ຖ້າບໍ່ມີການກວດກາກໍ່ໝາຍຄວາມວ່າບໍ່ມີການນຳພາ ສະນັ້ນວຽກງານກວດກາແມ່ນຫຼັກການສຳຄັນເປັນສ່ວນປະກອບທີ່ບໍ່ສາມາດຕັດແຍກອອກຈາກການນຳພາໄດ້ເພາະມັນເປັນພາລະບົດບາດຕົ້ນຕໍແຫ່ງການນຳພາຂອງພັກ ໃນເງື່ອນໄຂປະຈຸບັນ ການກວດກາຍິ່ງມີບົດບາດສຳຄັນ ຊ່ວຍໃຫ້ຮູ້ໄດ້ປະກົດການຫຍໍ້ທໍ້ຕ່າງໆທີ່ເກີດ ແລະ ຊອກເຫັນມາດຕະການເພື່ອປັບປຸງແກ້ໄຂ ໃຫ້ທັນສະພາບການ ແລະ ແກ້ໄຂໄດ້ແຕ່ຫົວທີ. ກອງປະຊຸມຜັນຂະຫຍາຍເນື້ອໃນຈິດໃຈຂອງກອງປະຊຸມວຽກງານກວດກາ ປະຈຳປີ 2016 ເພື່ອພ້ອມກັນສັງເກດຕີລາຄາ ສະພາບການຈັດຕັ້ງປະຕິບັດວຽກງານກວດກາພັກ-ລັດ ໃນຕະຫຼອດໄລຍະປີ 1 ຜ່ານມາ ແລະ ທິດທາງແຜນການໃນສົກປີ 2017 ເພື່ອຊອກເຫັນດ້ານດີດ້ານອ່ອນເພື່ອປັບປຸງແກ້ໄຂ ແລະ ຖອດຖອນບົດຮຽນກ່ຽວກັບທິດທາງ ຄາດໝາຍສູ້ຊົນ ມາດຕະການແກ້ໄຂ ແນ່ໃສ່ສົ່ງເສີມວຽກງານຕິດຕາມກວດກາໃນໄລຍະໃໝ່ຂອງ ກະຊວງ ໂຍທາທິການ ແລະຂົນສົ່ງ ໃຫ້ເປັນໜ້າທີ່ຮັບຜິດຊອບຂອງຄະນະພັກ, ຄະນະນຳ, ຕະນະກວດກາແຕ່ລະຂັ້ນ ແລະ ກາຍເປັນໜ້າທີ່ຮັບຜິດຊອບສະເພາະຂອງ ສະມາຊິກພັກ, ພະນັກງານ-ລັດຖະກອນ, ພ້ອມກັນນັ້ນກອງ​ປະຊຸມ ຍັງຈະໄດ້ຮັບຟັງການ​ເລົ່າ​ມູນ​ເຊື້ອ​ວັນ​ສ້າງ​ຕັ້ງ​ອົງການ​ກວດກາ​ພັກ-​ລັດ ຄົບຮອບ 35 ປີ, ບົດ​ສະຫຼຸບ​ການ​ເຄື່ອນ​ໄຫວ​ວຽກ​ງານ​ກວດກາ ປີ 2016 ​ແລະ ທິດ​ທາງ​ແຜນການ​ຂອງ​ຄະນະ​ກວດກາ​ສູນ​ກາງ​ພັກ ປີ 2017 ແລະ ເຊື່ອມຊຶມບົດໂອ້ລົມຂອງ ສະຫາຍ ປອ ບຸນທອງ ຈິດມະນີ ກໍາມະການກົມການເມືອງສູນກາງພັກ,​ ເລຂາທິການສູນກາງພັກ, ຮອງ​ນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານ​ອົງການ​ກວດກາ​ລັດຖະບານ, ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ຕໍ່ກອງປະຊຸມວຽກງານກວດກາ ທົ່ວ​ປະ​ເທດ ປະຈຳປີ 2016; ມະຕິ ວ່າ​ດ້ວຍ​ການ​ແກ້​ໄຂ​ພະຍາດ​ອາດຍາ​ສິດ, ສະກັດ​ກັ້ນ ​ແລະ ການ​ສໍ້​ລາ​ບັງ​ຫຼວງ ສະບັບ​ເລກທີ 022/ຄບສພ, ລົງ​ວັນ​ທີ 13 ມັງກອນ 2016 ແລະ ມະຕິ​ຕົກ​ລົງ​ຂອງ​ກົມ​ການ​ເມືອງ​ສູນ​ກາງ​ພັກ ວ່າ​ດ້ວຍ​ການຈັດ​ຕັ້ງ ​ແລະ ການ​ເຄື່ອນ​ໄຫວ ຂອງ​ຄະນະ​ກວດກາ​ສູນ​ກາງ​ພັກ ສະບັບ​ເລກທີ 021/ກມສພ, ລົງ​ວັນ​ທີ 27 ທັນວາ 2016.

 

 

Additional information