ພິທີມອບ-ຮັບ ແລະ ເປີດນຳໃຊ້ ໂຄງການກໍ່ສ້າງທາງລົດໄຟເຊື່ອມຕໍ່ລາວ-ໄທ ໄລຍະ II

 ພິທີ​ມອບ-ຮັບ ແລະ ເປີດນຳໃຊ້ ໂຄງການ​ກໍ່ສ້າງ​ທາງ​ລົດໄຟເຊື່ອມ​ຕໍ່​ລາວ-ໄທ ໄລຍະ II (ຕອນ​ທີ 1) ຢ່າງເປັນທາງການໃນ​ວັນ​ທີ 23 ມີນາ 2017 ທີ່​ບ້ານ​ດົງ​ໂພ​ສີ, ເມືອງຫາດຊາຍຟອງ, ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງ ທ່ານ ລັດຕະນະມະນີ ຄູນ​ນີ​ວົງ ຮອງ​ລັດຖະມົນຕີ​ກະຊວງ​ໂຍທາ​ທິການ ແລະ ຂົນສົ່ງ; ທ່ານ ນົບ​ພະດົນ ເທບ​ພິ​ທັກ ເອກ​ອັກຄະລາຊະທູດ​ໄທ ປະຈຳ​ລາວ; ທ່ານ ເນ​ວິນ ສິນ​ສິ​ຣິ ປະທານ​ອົງການ NEDA; ມີບັນດາທ່ານຫົວໜ້າ, ຮອງຫົວໜ້າກົມ, ສະຖາບັນ,​ ກອງ ພ້ອມດ້ວຍ​ພະນັກງານ-ວິຊາ​ການສອງ​ຝ່າຍ​ເຂົ້າ​ຮ່ວມ.

 ໂຄງການ​ກໍ່ສ້າງ​ທາງ​ລົດໄຟເຊື່ອມ​ຕໍ່​ລາວ-ໄທ ໄລຍະ II (ຕອນ​ທີ 1) ຕັ້ງ​ຢູ່​ບ້ານ​ດົງ​ໂພ​ສີ ເມືອງ​ຫາດ​ຊາຍ​ຟອງ ແລະ ບ້ານ​ນາ​ຄວາຍ​ໃຕ້-ບ້ານ​ຄຳ​ສະຫວາດ ເມືອງ​ໄຊ​ເສດ​ຖາ ນະຄອນຫຼວງ​ວຽງ​ຈັນ ໄດ້​ຈັດ​ຕັ້ງ​ປະຕິບັດແຕ່​ປີ 2013 ເປັນຕົ້ນ​ມາ, ໂດຍແມ່ນບໍລິສັດເສີມສະຫງວນກໍ່ສ້າງ ຈໍາກັດຂອງໄທເປັນຜູ້ຮັບເໝົາກໍ່ສ້າງ ແລະ ໄດ້ກໍ່ສ້າງສໍາເລັດໃນທ້າຍເດືອນກັນຍາ 2015 ຜ່ານມາ, ຊຶ່ງໂຄງການກໍ່ສ້າງດັ່ງກ່າວແມ່ນ​ໄດ້ຮັບ​ທຶນ​ສະໜັບສະໜູນ​ຈາກ ​ອົງການ​ຮ່ວມ​ມື​ພັດທະນາ​ເສດ​ຖະກິດ​ກັບ​ປະເທດ​ເພື່ອນ​ບ້ານ (NEDA) ປະເທດ​ໄທ ຈຳນວນ 656 ລ້ານ​ບາດ ຫຼື ປະມານ 150 ຕື້​ກີບ, ໃນ​ນັ້ນເປັນ​ເງິນ​ຊ່ວຍເຫຼືອລ້າ 30% ແລະ ເງິນ​ກູ້​ຢືມ​ດອກເບ້ຍ​ຕ່ຳ 70%.

 ສຳລັບ​ໂຄງການ​ດັ່ງກ່າວ​ ປະກອບ​ມີ 4 ໜ້າ​ວຽກ​ໃຫຍ່​ຄື: ກໍ່ສ້າງທາງລົດໄຟລະບົບລາງຫລີກ ຢູ່ສະຖານີທ່ານາແລ້ງ ລວມທັງຂະຫຍາຍລາງລົດໄຟເຖິງລານຕູ້ສິນຄ້າ 5.800 ແມັດ; ປັບປຸງຍົກລະດັບລະບົບສັນຍາຍໂທລະຄົມມະນາຄົມຢູ່ສະຖານີທ່ານາແລ້ງ ຈາກອານາລັອກ (Analog) ມາເປັນ ດີຈິຕໍ(Digital) ທີ່ຄວບຄຸມດ້ວຍລະບົບ Computer; ລະບົບລານຕູ້ສິນຄ້າລວມມີເນື້ອທີ່ 38 ພັນກວ່າຕາແມັດ ລວມທັງທາງເຂົ້າສູ່ CY ມີຄວາມຍາວທັງໝົດ 2.040 ແມັດ, ສາງເກັບມ້ຽນເຄື່ອງຂະໜາດ 68ມx78ມ ມີເນື້ອທີ່ທັງໝົດ 5 ພັນກວ່າຕາແມັດ, ອາຄານຫ້ອງການບໍລິການເປັນອາຄານ 3 ຊັ້ນ, ມີເນື້ອທີ່ 1.620 ຕາແມັດ, ປະຕູໂຂງທາງເຂົ້າເພື່ອຕິດຕັ້ງລະບົບຊັ່ງນໍ້າໜັກຂະໜາດ 20ມ x 30ມ, ສິ່ງອໍານວຍຄວາມສະດວກຕ່າງໆເຊັ່ນ: ລະບົບນໍ້າປະປາ, ໄຟຟ້າ, ລະ ບົບດັບເພິງພາຍໃນອາຄານ, ບ່ອນເກັບມ້ຽນຂີ້ເຫຍື້ອ ແລະ ສໍາເລັດວຽກກໍ່ສ້າງອາຄານຫ້ອງການກົມທາງລົດໄຟອາຄານ 2 ຊັ້ນ ມີເນື້ອທີ່ທັງໝົດ 3.700 ກວ່າຕາແມັດ, ເຮືອນພັກພະນັກງານ ແລະ ອື່ນໆ.

ສຳລັບ​ໂຄງການ​ກໍ່ສ້າງ​ທາງລົດໄຟ​ເຊື່ອມ​ຕໍ່​ລາວ-ໄທ ໄລຍະ II (ຕອນ​ທີ 2) ຄາດ​ວ່າຈະ​ໄດ້​ເລີ່ມຈັດ​ຕັ້ງ​ປະຕິບັດ ໃນ​ທ້າຍ​ປີ 2017 ນີ້ ແລະ ຊຶ່ງຈະໃຫ້ສໍາເລັດໃນໄຕມາດໜຶ່ງຂອງປີ 2020, ໃນ​ມູນ​ຄ່າ 997,4 ລ້ານ​ບາດ ເຊິ່ງ​ໜ້າ​ວຽກ​ປະກອບ​ມີ​ຂະຫຍາຍ​ທາງ​ລົດໄຟ​ຈາກ​ສະຖານີ​ທ່າ​ນາແລ້ງ​ ເຖິງ​ສະຖານີ​ວຽງ​ຈັນ​ທີ່​ຕັ້ງ​ຢູ່ບ້ານ​ຄຳ​ສະຫວາດ ມີ​ຄວາມ​ຍາວ 7,5 ກິໂລແມັດ ພ້ອມ​ດ້ວຍ​ສິ່ງ​ອຳນວຍ​ຄວາມ​ສະດວກ​ຄົບ​ຊຸດ.

 

Additional information