ກະຊວງ ຍທຂ ຈັດປາຖະກະຖາ 61 ປິ ແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ.

  ເພື່ອເປັນການ ສະເຫຼີມສະຫຼອງ 61 ປີ ແຫ່ງການເຕີບໃຫຍ່ຂະຫຍາຍຕົວ ຂອງອົງການຈັດຕັ້ງກຳມະບານລາວ, ໃຫ້ມີເນື້ອໃນ ມີຄວາມໝາຍສຳຄັນຢ່າງເລີກເຊິ່ງ, ກ້ວາງຂວາງ ທົ່ວສະມາຊິກກຳມະບານ, ຊົນຊັ້ນກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ. ຍ້ອນເຫັນໄດ້ເຖິງວັນສໍາຄັນດັ່ງກ່າວ, ໃນຕອນເຊົ້າຂອງວັນທີ 16 ມີນາ 2016, ຢູ່ທີ່ຫ້ອງປະຊຸມໃຫຍ່ກະຊວງ ຍທຂ ໄດ້ຈັດປາຖະກະຖາວັນສ້າງຕັ້ງອົງການກຳມະບານລາວ ຄົບຮອບ 61 ປິ ຂຶ້ນ, ໃຫ້ກຽດປາຖະກະຖາໂດຍ ສະຫາຍ ​ແສງ​ດາວ​ວີ ກັດຕິ​ຍະ​ສັກ, ຄະນະ​ບໍລິຫານ​ງານ​ສູນ​ກາງສະຫະພັນກຳມະບານລາວ, ປະທານສະຫະພັນກຳມະບານກະຊວງ, ຮອງ​ຫົວໜ້າ​ກົມ​ຈັດ​ຕັ້ງ ​ແລະ ພະນັກງານ; ເປັນກຽດເຂົ້າຮ່ວມມີບັນດາທ່ານຮອງຫົວໜ້າກົມ, ສະຖາບັນ, ກອງ, ຄະນະ​ກຳມະບານ​ກະຊວງ, ບັນດາ​ຄະນະລັດວິສາຫະກິດອ້ອມ​ຂ້າງກະຊວງ ຍທຂ ແລະ ສະມາຊິກກຳມະບານ.

      ໃນການປາຖະກະຖາຄັ້ງນີ້ ສະຫາຍ ແສງ​ດາວ​ວີ ກັດຕິ​ຍະ​ສັກ ໄດ້ຍົກໃຫ້ເຫັນເຖິງປະວັດ ການກຳເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ(1 ກຸມພາ 1956 - 1 ກຸມພາ 2016), ການເຄື່ອນໄຫວຂອງສະຫະພັນກຳມະບານລາວ ໃນແຕ່ລະໄລຍະທີ່ຜ່ານມາ, ໂດຍສະເພາະແມ່ນຜົນງານ​ຂອງ​ສູນ​ກາງສະຫະພັນກຳມະບານລາວ ທີ່​ຍາດ​ມາ​ໄດ້​ໃນ​ແຕ່ລະ​ໄລຍະ ​ເຊິ່ງ​ເຫັນ​ວ່າ ຊົນ​ຊັ້ນ​ກຳມະກອນ ​ແລະ ຊາວ​ຜູ້​ອອກ​ແຮງ​ງານ​ລາວ​ໄດ້​ເຕີບ​ໃຫຍ່​ຂະຫຍາຍຕົວ​ ແລະ ​ເປັນ​ກຳລັງ​ແຮງ​ຫຼັກ​ແຫຼ່ງຕົ້ນຕໍ​ແຫ່ງ​ການ​ຜະລິດ​ຂອງ​ລະບອບ​ໃໝ່, ສະຫະພັນ​ກຳມະບານ​ລາວ​ທົ່ວ​ປະ​ເທດ​, ໄດ້​ເຄື່ອນໄຫວ​ປະກອບສ່ວນ​ໃນ​ການຈັດ​ຕັ້ງ​ຜັນ​ຂະຫຍາຍ​ມະຕິ​ກອງ​ປະ​ຊຸມ​ໃຫຍ່ ຄັ້ງ​ທີ IX  ​ແລະ X  ຂອງ​ພັກ ​ແລະ ​ແຜນ​ພັດທະນາ​ເສດຖະກິດ-ສັງຄົມ 5 ປີ ​ແຫ່ງ​ລັດ ຄັ້ງ​ທີ VII  ​ແລະ ຄັ້ງ​ທີ VIII ​ໂດຍ​ມີ​ໝາກຜົນ​ທີ່​ປະຈັກ​ຕາ​ໃນ​ຫຼາຍ​ດ້ານ​ເຊັ່ນ: ກົງຈັກ​ການຈັດ​ຕັ້ງ​ສະຫະພັນ​ກຳມະບານ​ລາວ​ທົ່ວ​ປະ​ເທດ​ໄດ້​ມີ​ການ​ຂະຫຍາຍຕົວຢ່າງ​ຕໍ່​ເນື່ອງ ​ແລະ ນັບ​ມື້​ເພີ່ມ​ຂື້ນ​ທາງ​ດ້ານ​ປະລິມານ ​ແລະ ຄຸນ​ນະພາ​ບ, ຊຶ່ງ​ມາ​ເຖີງປະຈຸ​ບັນ​ທົ່ວ​ປະ​ເທດ, ສະຫະພັນ​ກຳມະບານ​ແຕ່ລະ​ຂັ້ນ​ກໍ່​ໄດ້​ສຸມ​ໃສ່​ປັບປຸງ​ລະບົບ​ການຈັດ​ຕັ້ງ​ຂອງ​ຕົນ ຕິດ​ພັນ​ກັບ​ວຽກ​ງານ 3 ສ້າງ​, ຕິດ​ພັນ​ກັບ​ການ​ຂະຫຍາຍຕົວ​ຂອງ​ອົງການ​ຈັດ​ຕັ້ງ​ພັກ-ລັດ ​ແລະ ກັບ​ໜ່ວຍ​ແຮງ​ງານ​ຕ່າງໆ​ນັບ​ທັງ​ພາກ​ລັດ ​ແລະ ​ເອກະ​ຊົນ, ​ໄດ້​ເຮັດ​ໃຫ້​ລະບົບ​ການ​ຈັ້ດ​ຕັ້ງ ​ແລະ ການ​ຄຸ້ມ​ຄອງ​ວຽກ​ງານ​ກຳມະບານ​ເຂົ້າ​ສູ່​ລະບົບ​ດີ​ຂື້ນ​ເປັນ​ກ້າວໆ. ປະຈຸ​ບັນ​​ໃນທົ່ວປະ​ເທດມີ​ແຮ​ງງານ​ທີ່​ມີ​ວຽກ​ເຮັດ​ງານ​ທຳ(​ແຮງ​ງານ​ໃນລະບົບ) 551,254 ຄົນ. ​ໃນ​ນັ້ນ​ເປັນ​ລັດ​ຖະ​ກອນ 161,527 ຄົນ. ​ເປັນ​ແຮງ​ງານ​ພາກ​ວິ​ສາ​ຫະກິດ 389,727 ຄົນ. ຍິງ 170,756 ຄົນ. ມີ​ຫົວໜ່ວຍ​ແຮງ​ງານທັງ​ໝົດ 45,274 ​ແຫ່ງ​ໃນ​ທົ່ວ​ປະ​ເທດ. ພ້ອມ​ດຽວ​ກັນ​ນັ້ນ ທ່ານ ປະທານ​ສະຫະພັນ​ກຳມະບານກະຊວງ​ ຍັງ​ໄດ້​ຍົກ​ໃຫ້​ເຫັນ ຜົນສຳ​ເລັດ​ຂອງ​ກອງ​ປະຊຸມ​ໃຫຍ່ ຜູ້​ແທນ​ສະຫະພັນ​ກຳມະບານ​ລາວ​ທົ່ວ​ປະ​ເທດ ຄັ້ງ​ທີ VII, ມະຕິ​ກອງ​ປະຊຸມ​ໃຫຍ່ ຜູ້​ແທນ​ສະຫະພັນ​ກຳມະບານ​ລາວ​ທົ່ວ​ປະ​ເທດ ຄັ້ງ​ທີ VII ວັນ​ທີ 14-16 ຕຸລາ 2015, ທິດ​ທາງ​ໜ້າ​ທີ່​ຂອງ​ສະຫະພັນ​ກຳມະບານ​ ກະຊວງ​ໂຍທາ​ທິການ ​ແລະ ຂົນ​ສົ່ງ ​ໃນ 5ປີ ຕໍ່ໜ້າ ​ແຕ່​ປີ 2016-2020, ​ແຜນ​ຍຸດ​ທະ​ສາດ​ພັດ​ທະ​ນາ​ວຽກ​ງານ​ກຳ​ມະ​ບານ​ລາວ 10ປີ 2016-2025 ​ແລະ ວິ​ໄສ​ທັດ ຮອດປີ 2030 ​ແລະ ​ແຜນ​ຍຸດ​ທະ​ສາດ​ພັດທະນາ​ວຽກ​ງານ​ກຳມະ​ບານ​ລາວ 5ປີ ຄັ້ງ​ທີ III ປີ 2016-2020.

Additional information