ຍທຂ ຝຶກອົບຮົມ ດ້ານໂລຊິດສະຕິກ ໃຫ້ແກ່ ພະນັກງານພາກລັດ ແລະ ພາກເອກະຊົນ

  ກະຊວງ ໂຍທາທິການ ແລະ ຂົນສົ່ງ ​ໄດ້​​ເປີດ​ການຝຶກອົບຮົມ ດ້ານໂລຊິດສະຕິກ ໃຫ້ແກ່ພະນັກງານພາກລັດ ແລະ ພາກເອກະຊົນ  ​ໃນ​ວັນ​ທີ 9 ມີນາ 2017 ທີ່ ສະຖາບັນຝຶກອົບຮົມ ໂຍທາທິການ ​ແລະ ຂົນ​ສົ່ງ ການ​ຝຶກ​ອົບຮົມ​ຈະ​ດຳ​ເນີນເປັນ​ເວລາ 2 ວັນ, ການ​ຝຶກ​ອົບຮົມ​ໃນ​ຄັ້ງ​ນີ້ ​ໂດຍການ​ເຂົ້າ​ຮ່ວ​ມຂອງ​ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ; ມີ​ບັນດາທ່ານ ຄະນະກົມ, ຄະນະສະຖາບັນ ທີ່ມາຈາກກະຊວງ ໂຍທາທິການ ແລະ ຂົນສົ່ງ; ບັນດາທ່ານ ຄູ​ຝຶກດ້ານໂລຊິດສະຕິກ ຈາກຍີ່ປະເທດປຸ່ນ; ບັນດານັກ​ສຳ​ມະ​ນາກ​ອນຝຶກ​ອົບຮົມ ທັງພາກລັດ ແລະ ພາກເອກະຊົນ ​ເຂົ້າ​ຮ່ວມ.

 ການຈັດຝຶກອົບຮົມດ້ານໂລຊິດສະຕິກຄັ້ງນີ້ ແມ່ນຜົນຮັບມາຈາກ ການຮ່ວມມືໃນຂະແໜງ ຂົນສົ່ງ ລະຫວ່າງ ກະຊວງໂຍທາທິການ ແລະ ຂົນສົ່ງ, ​ສປປ ລາວ ແລະ ກະຊວງທີ່ດິນ, ໂຄງລ່າງ, ຂົນສົ່ງ ແລະ ທ່ອງທ່ຽວ ປະເທດຍີ່ປຸ່ນ ທີ່ນະຄອນຫຼວງໂຕກຽວ ປະເທດຍີ່ປຸ່ນ ຄັ້ງວັນທີ 21 ຕຸລາ 2014, ແລະ ຜົນຮັບມາຈາກ ການຕົກລົງຂອງກອງປະຊຸມ ເຈົ້າໜ້າທີ່ອາວຸໂສຂົນສົ່ງ ອາຊຽນ-ຍີ່ປຸ່ນ ປະຈຳປີ 2016 ທີ່ປະເທດຍີ່ປຸ່ນ. ສະນັ້ນ, ຜ່ານການຮ່ວມມື ທີ່ໄດ້ກ່າວມາຂ້າງເທິງນັ້ນ ຈຶ່ງກໍໃຫ້ເກີດມີການ ຊ່ວຍເຫຼືອຂອງຍີ່ປຸ່ນໃນການພັດທະນາບຸກຄະລາກອນໃນດ້ານໂລຊິດສະຕິກ ໃຫ້ແກ່ບັນດາ ປະເທດສະມາຊິກອາຊຽນ ເຊິ່ງປີຜ່ານມາ ຍີ່ປຸ່ນກໍໄດ້ແຈ້ງໃຫ້ຊາບວ່າ ໄດ້ໄປຈັດຝຶກອົບຮົມ ຢູ່ ສສ ຫວຽດນາມແລ້ວ. ສ່ວນປີນີ້ ຈຶ່ງມາຈັດຢູ່ ສປປ ລາວ ເຮົາ ເຊິ່ງການຝຶກອົບຮົມ ດ້ານໂລຊິດສະຕິກ ຈະຈັດຂຶ້ນເປັນ 2 ຊຸດ ຄື: ຊຸດທີ 1 ແມ່ນຝຶກອົບຮົມດ້ານໂລຊິດສະຕິກ ໃຫ້ແກ່ ພະນັກງານພາກລັດ ແລະ ພາກເອກະຊົນ ລະຫວ່າງ​ວັນ​ທີ 9-10 ມິນາ 2017 ທີ່ ສະຖາບັນຝຶກອົບຮົມ ໂຍທາທິການ ແລະ ຂົນສົ່ງ ແຫ່ງນີ້, ແລະ ຊຸດທີ 2 ແມ່ນຝຶກອົບຮົມດ້ານໂລຊິດສະຕິກ ໃຫ້ແກ່ນັກສຶກສາ ແລະ ຄູອາຈານ ຄະນະວິສະວະກໍາສາດ ມະຫາວິທະຍາໄລແຫ່ງຊາດ ລະຫວ່າງ​ວັນ​ທີ 13-17 ມິນາ 2017 ທີ່ ຄະນະວິສະວະກໍາສາດ.

 ສຳລັບ ຫົວຂໍ້ການຝຶກອົບຮົມ ດ້ານໂລຊິດສະຕິກ ໃຫ້ແກ່ ພະນັກງານພາກລັດ ແລະ ພາກເອກະຊົນ ຄັ້ງນີ້ ແມ່ນຈະລົງເລິກບາງຫົວຂໍ້ທີ່ສຳຄັນ ເປັນຕົ້ນ ສະພາບການ ແລະ ແນວໂນ້ມຂອງໂລຊິດສະຕິກ, ພື້ນຖານຂອງໂລຊິດສະຕິກສາກົນ, ການຄຸ້ມຄອງລະບົບສາງ, ຕົ້ນທຶນແລະ ປະສິດທິພາບຂອງໂລຊິດສະຕິກ ລວມທັງ ການນໍາໃຊ້ລະບົບ IT ເຂົ້າໃນວຽກງານໂລຊິດສະຕິກ. ພ້ອມ​ດຽວ​ກັນ​ນີ້ ທ່ານ​ປະ​ທານ​ຍັງຮຽກຮ້ອງມາຍັງໝົດທຸກທ່ານ ຈົ່ງຫ້າວຫັນເອົາໃຈໃສ່ ໃນການຮໍ່າຮຽນເອົາຄວາມຮູ້ຕ່າງໆ ນຳບັນດາຄູອາຈານ ທີ່ມີປະສົບການຈາກ ປະເທດຍີ່ປຸ່ນ ເພື່ອຍົກລະດັບຕົນເອງ ໃຫ້ເປັນຄົນທີ່ມີຄວາມຮູ້ຄວາມສາມາດ ດ້ານໂລຊິດສະຕິກທີ່ແທ້ຈິງ ເພື່ອໃຫ້ສາມາດນໍາເຂົ້າໄປພັດທະນາ ແລະ ຈັດຕັ້ງປະຕິບັດວຽກງານ ທັງພາກລັດ ແລະ ພາກເອກະຊົນ ໃຫ້ມີປະສິດທິພາບ ແລະ ປະສິດທິຜົນ ຂຶ້ນຕື່ມໃນອະນາຄົດ.

 

Additional information