ທ່ານ ປອ. ບຸນຈັນ ສິນທະວົງ ລັດຖະມົນຕີກະຊວງ ຍທຂ ຕ້ອນຮັບການເຂົ້າຢ້ຽມຂ່ຳນັບ ເພື່ອອຳລາຂອງ ທ່ານ ຢູຊຸເກະ ມຸຣະກະມິ ຫົວໜ້າຜູ້ຕາງໜ້າອົງການຮ່ວມມືສາກົນຍີ່ປຸ່ນປະຈໍາລາວ (JICA)

  ໃນວັນ​ທີ 3 ມີນາ 2017 ຢູ່​ທີ່​ຫ້ອງ​ຮັບ​ແຂກ ກະຊວງ ​ໂຍທາ​ທິການ ​ແລະ ຂົນ​ສົ່ງທ່ານ ປອ. ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ ​ໂຍທາ​ທິການ ​ແລະ ຂົນ​ສົ່ງ ​ໄດ້ຕ້ອນ​ຮັບ​ການ​ເຂົ້າ​ຢ້ຽມ​​ຂ່ຳນັບເພື່ອ​ອຳ​ລາຂອງ  ທ່ານ ຢູຊຸເກະ ມຸຣະກະມິ ຫົວໜ້າຜູ້ຕາງໜ້າອົງການຮ່ວມມືສາກົນຍີ່ປຸ່ນປະຈໍາລາວ (JICA) ໃນໂອກາດທີ່ໄດ້ສໍາເລັດວຽກງານຢູ່ ສປປ ລາວ ເປັນເວລາ 2 ປີ. ​​ໃນ​ໂອ​ກາດ ດັ່ງກ່າວ ທ່ານ ປອ. ບຸນ​ຈັນ ສິນ​ທະ​ວົງ ໄດ້ສະແດງຄວາມຊົມເຊີຍໃນການປະກອບສ່ວນເພີ່ມພູນຄູນສ້າງໃຫ້ແກ່ການພົວພັນລາວ-ຍີ່ປຸ່ນ, ໂດຍສະເພາະແມ່ນການຊຸກຍູ້ຊ່ວຍເຫລືອຂອງລັດຖະບານ ແລະ ປະຊາຊົນຍີ່ປຸ່ນ ແລະ ຕີລາຄາສູງຕໍ່ການປະຕິບັດໜ້າທີ່ຂອງທ່ານ ຢູຊຸເກະ ມຸຣະກະມິ ຢູ່ລາວເປັນເວລາ 2 ປີ, ເຊິ່ງເປັນການປະກອບສ່ວນອັນສໍາຄັນໃຫ້ແກ່ການພັດທະນາເສດຖະກິດ-ສັງຄົມຂອງລາວ. ພ້ອມດຽວກັນນີ້, ທ່ານ ລັດຖະມົນ​ຕີ ຍັງເຫັນວ່າບົດບາດຂອງອົງການຮ່ວມມືສາກົນຍີ່ປຸ່ນປະຈໍາລາວ ທີ່ເປັນຕົວແທນຂອງລັດຖະບານຍີ່ປຸ່ນທີ່ໄດ້ຈັດຕັ້ງປະຕິບັດບັນດາໂຄງການຮ່ວມມືຕ່າງໆ ລະຫວ່າງລາວ ແລະ ຍີ່ປຸ່ນ ແມ່ນມີປະສິດທິຜົນໄດ້ປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມືລະຫວ່າງສອງຊາດລາວ-ຍີ່ປຸ່ນໃຫ້ນັບມື້ແໜ້ນແຟ້ນຍິ່ງຂຶ້ນ.

     ທ່ານ ຢູຊຸເກະ ມຸຣະກະມິ ໄດ້ສະແດງຄວາມຂອບອົກຂອບໃຈຕໍ່ທ່ານ ລັດຖະມົນຕີ ກໍຄືລັດຖະບານລາວທີ່ໄດ້ເອົາໃຈໃສ່ຊຸກຍູ້ຊ່ວຍເຫລືອປະກອບສ່ວນຮ່ວມມື ແລະ ອໍານວຍຄວາມສະ ດວກໃຫ້ແກ່ການປະຕິບັດໜ້າທີ່ຂອງທ່ານ ຢູຊຸເກະ ມຸຣະກະມິ  ກໍຄືອົງການຮ່ວມມືສາກົນຍີ່ປຸ່ນຢູ່ລາວ ເປັນຢ່າງດີ ແລະ ຫວັງຢ່າງຍິ່ງວ່າຈະໄດ້ຮັບການຮ່ວມມືທີ່ດີຈາກລັດຖະບານລາວຕໍ່ໄປ.

Additional information