ກະຊວງ ຍທຂ ປາຖະກະຖາວັນການທູດ ຄົບຮອບ 71 ປິ

  ກະຊວງ ​ໂຍທາ​ທິການ ​ແລະ ຂົນ​ສົ່ງ ​ໄດ້​ຈັດ​ຕັ້ງ​ບັ້ນ ປາຖະກະຖາ ຂື້ນ​ເພື່ອ​ລະນຶກ​ວັນ​ການ​ທູດ​ລາວ ຄົບຮອບ 71 ປີ  ​ແລະ ພ້ອມ​ກັນ​ນີ້​ກໍ່​ໄດ້​ຮັບ​ຟັງ​ການ​ເຜີ​ຍ​ແຜ່​ເອກະສານ​ສານ​ສຳຄັນ​ດ້ານ​ການ​ຕ່າງປະ​ເທດ ຄື: ​ເອກະສານ​ການພົວພັນຮ່ວມ​ມື​ລະຫວ່າງ​ ສປປ ລາວ ​ແລະ ສ. ອາ​ເມ​ລິ​ກາ ​ໃນ​ໄລຍະ​ໃໝ່. ​ໂດຍການ​ໃຫ້​ກຽດ​ປາຖະກະຖາ​ຂອງ​ທ່ານ ສະ​ເຫຼີ​ມ​ໄຊ ກົມມະ​ສິດ ລັດຖະມົນຕີ​ກະຊວງ ​ການ​ຕ່າງປະ​ເທດ, ຊຶ່ງ​ມີ​​ທ່ານ ລັດຕະນະມະ​ນີ ຄູນ​ນີວົງ ຮອງ​ລັດຖະມົນ​ຕີກະຊວງ ຍທຂ, ທ່ານ ປອ ສັນຕິ​ສຸກ ສິມ​ມາລາ​ວົງ ຮອງ​ລັດຖະມົນຕີ ກະຊວງ ຍທຂ, ມີ​ບັນດາ​ທ່ານ, ບັນດາ​ສະຫາຍ​ຄະນະ​ປະຈຳ​ພັກ, ຄະນະ​ພັກ​ກະຊວງ, ຜູ້​ຊ່ວຍ-​ທີ່ປຶກສາ​ທ່ານ​ລັດຖະມົນຕີ, ຫົວໜ້າ​ກົມ, ຮອງ​ກົມ ​ແລະ ທຽບ​ເທົ່າ ຕະຫຼອດ​ຮອດ​ພະນັກງານ​ຫຼັກ​ແຫຼ່ງ ອ້ອມ​ຂ້າງ​ກະຊວງ​ເຂົ້າ​ຮ່ວມ.

      ການຈັດ​ຕັ້ງ​ປາຖະກະຖາ​ໃນ​ຄັ້ງ​ນີ້, ກໍ່​ເພື່ອ​ເປັນ​ການ​ໂຄສະ​ນາສຶກສາ​ອົບຮົມ​ໃຫ້​ແກ່​ພະນັກງານ-ລັດຖະກອນ​ໃນ​ທົ່ວ​ກະຊວງ ​ໂຍທາ​ທິກ​ານ ​ແລະ ຂົນ​ສົ່ງ ​ໃຫ້​ຮັບ​ຮູ້, ​ເຂົ້າ​ໃຈ​ກ່ຽວ​ກັບ​ປະ​ຫວັດ​ຄວາມ​ເປັນ​ມາ​ຂອງ​ວັນ​ການ​ທູດ​ລາວ, ການ​ເຄື່ອນ​ໄຫວ​ວຽກການ​ຕ່າງປະ​ເທດພາຍ​ໃຕ້​ການນຳພາ​​ຂອງ​ພັກ​, ​ແນວທາງ​ການ​ຕ່າງປະ​ເທດ​ຂອງ​ພັກເຮົາ​ແຕ່ລະ​ໄລຍະ ​ແລະ ຜົນສຳເລັດວຽກ​ງານ​ການ​ຕ່າງປະ​ເທດ; ພ້ອມ​ກັນ​ນີ້​ຍັງ​ເປັນ​ການ​ໂຄສະນາ​ສຶກສາ​ອົມ​ຮົມ, ປຸກລະດົມ ​ແລະ ​ເສີມ​ຂະຫຍາຍ​ມູນ​ເຊື້ອ​ອັນ​ດີງາມ​ຂອງ​ວັນ​ການ​ທູດ​ລາວ ​ເຂົ້າ​ໃນ​ການ​ປົກ​ປັກ​ຮັກສາ ​ແລະ ສ້າງສາ​ພັດທະ​ນາ​ປະ​ເທດຊາດ​ໃນ​ໄລຍະ​ໃໝ່, ​ໂດຍສືບ​ຕໍ່​ປະຕິບັດ​ແນວທາງ​ການ​ຕ່າງ​ປະ​ເທດ ສັນຕິພາບ, ​ເອກະລາດ, ມິດຕະພາບ ​ແລະ ການ​ຮ່ວມ​ມື ຢ່າງ​ສະ​ເໝີຕົ້ນ​ສະ​ເໝີ​ປາຍ, ຕັ້ງໜ້າ​ເປັນ​ເຈົ້າ​ການ​ ສົ່ງ​ເສີມການ​ພົວພັນ​ຮ່ວມ​ມື​ກັບ​ຕ່າງປະ​ເທດ ​ແບບ​ຫຼາຍ​ທິດ​ຫຼາຍ​ຝ່າຍ, ຫຼາຍ​ລະດັບ, ຫຼາຍ​ຮູບ, ຫຼາຍ​ແບບ ບົນ​ພື້ນຖານ​ເຄົາລົບ​ເຊິ່ງ​ກັນ ​ແລະ ກັນ, ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ ​​​ເສີມ​ສ້າງ​ໄມຕີ​ຈິດ, ມິດຕະພາບ​ ແລະ ຄວາມ​ໄວ້​ເນື້ອ​ເຊື້​ອໃຈກັບ​ນາໆ​ຊາດ​ ໃຫ້​ນັບມື້​ກ້ວາງ​ຂວາງ, ສ້າງ​ສະພາບ​ແວດ​ລ້ອມ​ທີ່​ເອື້ອ​ອຳນວຍ​ໃຫ້​ແກ່​ການ​ຍາດ​ແຍ່ງ​ເອົາ​ກຳ​ແຮງ​ຈາກ​ພາຍ​ນອກ ​ເພື່ອ​ປະ​ກອບສ່ວນ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ ​ແລະ ປົກ​ປັກ​ຮັກສາ​ປະ​ເທດຊາດ. ​ເພີ້​ມທະວີ​ການ​ພົວພັນ​ມິດຕະພາບ, ຄວາມ​ສາມັກຄີ ​ແລະ ການ​ຮ່ວມ​ມື​ກັບ​ບັນດາ​ປະ​ເທດ​ສັງຄົມ​ນິຍົມ, ​ໃນ​ນັ້ນ ​ໃຫ້​ສືບ​ຕໍ່​ປົກ​ປັກ​ຮັກສາ ​ແລະ ​ເສີມ​ຂະຫຍາຍ​ມູນ​ເຊື້ອ​ແຫ່ງ​ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບ​ດ້ານ ກັບ ສ.ສ ຫວຽດນາມ ​ເສີມ​ຂະຫຍາຍ​ສາຍ​ພົວພັນ​ທີ່​ເປັນ​ມູນ​ເຊື້ອ​ກັບ ສປ ຈີນ ບົນ​ຈິດ​ໃຈ​ເປັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ ​ແລະ ຍາວ​ນານ;  ​ເສີມ​ຂະຫຍາຍ​ສາຍ​ພົວພັນອັນ​ດີ​ກັບ​​ປະ​ເທດ​ອ້າ​ຍນ້ອງອື່ນໆ​ເວົ້າ​ລວມ, ​ເວົ້າ​ສະ​ເພາະ ​ແມ່ນ​ການຈັດ​ຕັ້ງ​ປະຕິບັດ ​ແນວທາງ​ການ​ຕ່າງປະ​ເທດ, ການພົວພັນຮ່ວມ​ມື​ກັບປະ​ເທດ​ເພື່ອນ​ມິດຍຸດ​ທະ​ສາດ​ກ້າວ​ເຂົ້າ​ສູ່​ລວງ​ເລີກ​ ​ແລະ ​ເປັນ​ຮູບ​ປະ​ທຳ. ການ​ພົວພັນ​ກັບດາ​ປະ​ເທດ​ມະຫາ​ອຳນາດ ມີ​ຄວາມ​ໜັ້ນທ່ຽງ ​ແລ​ະ ​ໄດ້​ເປີດ​ກ້ວາງ​ການ​ພົວພັນ​ກັບ​ປະ​ເທດ​ເພື່ອນ​ມິດ​ອື່ນໆ ຢ່າງ​ມີ​ຈຸດ​ສຸມ. ​ເປັນ​ເຈົ້າ​ການ​ໃນ​ການ​ຕອບ​ໂຕ້​ຖ້ອຍ​ທຳນອງ​ໃສ່ຮ້າຍ​ປ້າຍ​ສີ​ຂອງ​ອິດ​ທິກຳລັງ​ປໍ​ລະ​ປັກ ​ແລະ ກຸ່ມ​ຄົນ​ບໍ່​ດີ, ສາມາດ​ຊີ້​ແຈງ​ອະທິບາຍ, ຍາດ​ແຍງ​ຄວາມ​ເປັນ​ໃຈ ​ແລະ ການ​ສະໜັບສະໜູນ​ຂອງ​ເພື່ອນ​ມິດສາ​ກົນ​ໃຫ້​ນັບ​ມື້​ນັບ​ຫຼາຍ​ຂື້ນ, ບັນຫາ​ສຳຄັນ​ໜື່ງການ​ເຄື່ອນ​ໄຫວ​ຕ່າງະ​ເທດ​ຂອງ ສປປ ລາວ ​ໄດ້​ຕິດ​ແໜ້ນກັບ​ການ​ຍາດ​ແຍງ​ການ​ຊ່ວຍ​ເຫຼື່ອ  ​ເພື່ອ​ການ​ພັດທະ​ນາ ​ແລະ ການ​ຮ່ວມ​ມື​ດ້ານ​ເສດຖະກິດ, ການ​ເຊື່ອມ​ໂຍງ​ເສດຖະກິດ​ສາກົນ ​ແລະ ການ​ຕິດ​ຈອດ​ພາກ​ພື້ນ​ໃຫ້​ສືບຕໍ່ມີ​ບາດກ້າວ​ທີ່​ໜັກ​ແໜ້ນ ​ແລະ ມີ​ຜົນສຳ​ເລັດ​ທີ່​ເປັນ​ຮູບ​ປະ​ທຳ​ຢ່າງ​ຈະ​ແຈ້ງ.

Additional information