ພິທີເປີດນຳໃຊ້ ໂຄງການກໍ່ສ້າງນ້ຳປະປາ 5 ຕົວເມືອງ (ເມືອງຫ້ວຍຊາຍ, ເມືອງຄອບ, ເມືອງແບງ, ເມືອງໄຊບູລີ ແລະເມືອງໂຂງ) ຢູ່ແຂວງສະຫວັນນະເຂດ

ໃນວັນທີ 28 ກຸມພາ 2017 ທີ່ຜ່ານມາ, ໄດ້ຈັດພິທີເປີດນຳໃຊ້ ໂຄງການກໍ່ສ້າງນ້ຳປະປາ 5 ຕົວເມືອງ (ເມືອງ ຫ້ວຍຊາຍ, ເມືອງຄອບ, ເມືອງແບງ, ເມືອງໄຊບູລີ ແລະເມືອງໂຂງ) ຢູ່ທີ່ເມືອງໄຊບູລີ ແຂວງສະຫວັນນະເຂດ, ເປັນກຽດ ເຂົ້າຮ່ວມພິທີຄັ້ງນີ້ໂດຍແມ່ນ ທ່ານ ປອ ບຸນຈັນ ສິນທະວົງ ລັດຖະມົນຕີກະຊວງ ໂຍທາທິການ ແລະ ຂົນສົ່ງ, ທ່ານ ພອນແກ້ວ ພຸດທະໄກຍະລາດ ຮອງເຈົ້າແຂວງໆສະຫວັນນະເຂດ, ທ່ານ ເນວິນ ສິນສີຣິ ປະທານອົງການ NEDA, ພ້ອມດ້ວຍ ທ່ານຮອງລັດຖະມົນຕີ, ບັນດາທ່ານຮອງເຈົ້າແຂວງໆ ບໍ່ແກ້ວ, ອຸດົມໄຊ, ໄຊຍະບູລີ, ຈຳປາສັກ, ບັນດາທ່ານຫົວໜ້າກົມ, ຮອງກົມ, ບັນດາຫົວໜ້າ, ຮອງພະແນກ ຍທຂ ປະຈຳແຂວງ, ຜູ້ຕາງໜ້າຈາກກະຊວງ ການເງິນ, ກະຊວງແຜນການ ແລະການລົງທຶນ, ບັນດາພະນັກງານ-ລັດຖະກອນ ຈາກສູນກາງ ແລະທ້ອງຖິ່ນ, ລັດວິສາຫະກິດນ້ຳປະປາແຂວງ, ອຳນາດການປົກຄອງ ແລະ ປະຊາຊົນເມືອງໄຊບູລີ ເຂົ້າຮ່ວມ.

ໂຄງການນ້ຳປະປາ ຂອງ 05 ຕົວເມືອງທີ່ໄດ້ຮັບການສະໜັບສະໜູນທຶນກໍ່ສ້າງຈາກອົງການ NEDA ແມ່ນໂຄງການ ໜຶ່ງທີ່ສຳຄັນ ຊຶ່ງສາມາດສ້າງໂຮງງານຜະລິດນ້ຳປະປາ ທີ່ມີຄວາມສາມາດ ລວມກັນປະມານ 8,000 ແມັດກ້ອນຕໍ່ວັນ ແລະ ສາມາດສະໜອງນ້ຳປະປາໃຫ້ປະຊາຊົນ ໃນເນື້ອທີ່ບໍລິການໄດ້ ປະມານ 66,000 ຄົນ ເຊິ່ງມັນເປັນການປະກອບ ສ່ວນ ໃຫ້ແກ່ການພັດທະນາ ຂະແໜງການນ້ຳປະປາ ແລະ ສົ່ງເສີມສຸຂະພາບທີ່ດີຂອງປະຊາຊົນ ໄດ້ເປັນຢ່າງດີ.

ການຮ່ວມມືຂອງສອງລັດຖະບານ ໃນການພັດທະນາລະບົບນ້ຳປະປາ ຍັງເປັນໂອກາດອັນດີ ໃຫ້ພາກທຸລະກິດ ຂອງ ສອງປະເທດ ລາວ ແລະ ໄທ ໄດ້ມີການຮ່ວມມື ແລະ ມີຄວາມສຳພັນກັນໃນການທຳທຸລະກິດ, ການຄ້າ, ການຮັບເໝົາ ກິດຈະການການກໍ່ສ້າງຮ່ວມກັນ, ພ້ອມທັງເປັນການສົ່ງເສີມຄວາມເຂົ້າອົກເຂົ້າໃຈທີ່ດີຂອງລັດຖະບານ ແລະ ປະຊາຊົນ ຂອງສອງປະເທດ ໂດຍສະເພາະປະຊາຊົນລຽບສອງຝັ່ງແມ່ນ້ຳຂອງ. ພະນັກງານ, ນັກວິສາວະກອນ ທັງສອງປະເທດ ພາຍຫລັງສຳເລັດເສັດສິ້ນໂຄງການແລ້ວ ກໍຍັງສືບຕໍ່ຮັກແພງກັນ ແລະມີຄວາມຜູກພັນດີນຳກັນ ເຊິ່ງມັນແມ່ນສິ່ງປະເສີດ ທີ່ໄດ້ຈາກການຮ່ວມມື ຈັດຕັ້ງປະຕິບັດໂຄງການ ຄັ້ງນີ້.

ນອກຈາກນັ້ນ, ລັດຖະບານແຫ່ງ ສປປ ລາວ ຍັງເຫັນຄວາມສໍາຄັນ ກ່ຽວກັບນໍ້າສະອາດ, ປອດໄພ ແລະ ສຸຂາພິບານ ທີ່ດີ ເປັນເງື່ອນໄຂສຳຄັນໃນການລົບລ້າງຄວາມທຸກຍາກ, ເປັນການຫລຸດຜ່ອນພະຍາດຫລາຍປະການທີ່ຕິດມາກັບນ້ຳ, ເປັນການຫລຸດຜ່ອນແຮງງານແມ່ຍິງ ແລະ ເດັກນ້ອຍ. ດັ່ງນັ້ນ, ລັດຖະບານ ໄດ້ຕັ້ງຄາດໝາຍໃຫ້ຂະແໜງນ້ຳປະປາ ສູ້ຊົນໃຫ້ສາມາດບັນລຸໄດ້ໃນປີ 2030 ສາມາດສະໜອງນ້ຳປະປາ ແລະ ສຸຂາພິບານພື້ນຖານໃຫ້ປະຊາຊົນ 90% ຊຶ່ງ ເປັນຄາດໝາຍທີ່ທ້າທາຍທີ່ສຸດ ແລະ ໄດ້ສະເໜີໃຫ້ອົງການ NEDA ຈົ່ງສຶບຕໍ່ໃຫ້ການສະໜັບສະໜູນ ຂະແໜງ ນ້ຳປະປາ ກັບ ສປປ ລາວ, ບໍ່ວ່າ ດ້ານການພັດທະນາໂຄງລ້າງນ້ຳປະປາ ແລະ ດ້ານວິຊາການ ແກ່ພະນັກງານ ຂອງ ຂະແໜງນ້ຳປະປາ.

Additional information