ກອງປະຊຸມເຜີຍແຜ່ຜັນຂະຫຍາຍເນື້ອໃນກອງປະຊຸມ ວຽກງານຈັດຕັ້ງທົ່ວປະເທດ ຄັ້ງທີ X ຂອງກະຊວງ ໂຍທາທິການ ແລະ ຂົນສົ່ງ

  ກອງປະຊຸມເຜີຍແຜ່ຜັນຂະຫຍາຍເນື້ອໃນກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ X ຂອງກະຊວງ ໂຍທາທິການ ແລະ ຂົນສົ່ງ ຈະ​ໄດ້​ດຳ​ເນີນ​ເປັນ​ເວລາ 2 ວັນ ຄື: ວັນ​ທີ 27-28 ກຸມພາ 2017 ​ໂດຍ​ການ​ເປັນ​ປະ​ທານ ຂອງ​ສະຫາຍ ລັດຕະນະ​ມະນີ ຄູນ​ນີວົງ ຮອງ​ເລຂາ​ຄະນະ​ພັກ​ກະຊວງ, ຮອງ​ລັດຖະມົນຕີ ກະຊວງ ​ໂຍທາ​ທິການ ​ແລະ ຂົນ​ສົ່ງ; ມີ​ບັນດາ ສະຫາຍຄະນະປະຈໍາພັກ, ກໍາມະການຄະນະພັກກະຊວງ, ບັນດາສະຫາຍຜູ້ຊ່ວຍລັດຖະມົນຕີ, ທີ່ປຶກສາລັດຖະມົນຕີ, ບັນດາສະຫາຍເລຂາ, ຮອງເລຂາ, ກຳມະການຄະນະພັກບັນດາຮາກຖານ, ຫົວໜ້າກົມ, ຮອງກົມ, ສະຖາບັນ, ກອງວິຊາ​ການ,      ຜູ້ນວຍການ, ຮອງ​ອໍານວຍ​ການ ລັດວິສາຫະກິດ, ພະນັກ​ງານຂັ້ນ​ຫົວໜ້າ​ພະ​ແນ​ກ ​ແລະ ປະທານ, ຮອງ​ປະທານ, ​ເລຂາ, ຮອງ​ເລຂາ ຂອງສາມອົງການຈັດຕັ້ງມະຫາຊົນຂັ້ນກະຊວງ ​ເຂົ້າ​ຮ່ວມ.

 ​ໃນ​ວາລະ​ຂອງກອງ​ປະຊຸມ​ໃນ​ຄັ້ງ​ນີ້ຈະ​ໄດ້ເພື່ອເຜີຍແຜ່ບົດລາຍງານຂອງຄະນະຈັດຕັ້ງສູນກາງພັກ ກ່ຽວກັບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໃນໄລຍະ 5 ປີ ຜ່ານມາ ແລະ ທິດທາງໜ້າທີ່ 5 ປີ  ຕໍ່ໜ້າ; ເຜີຍແຜ່ບົດໂອ້ລົມ ຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ   ຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ X ແລະ ຜ່ານ​ບົດສະຫຼຸບຕີລາຄາສະພາບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ການປັບປຸງກົງຈັກການຈັດຕັ້ງ ຂອງຂະແໜງ ຍທຂ ໃນ 5 ປີ ຜ່ານມາ ແລະ ວາງທິດທາງໃນຕໍ່ໜ້າ ແຕ່ປີ 2016-2020. ກອງ​ປະຊຸມ​ຈະ​ໄດ້​ຮັບ​ຟັງ​ການ​ປະກອບ​ຄຳ​ເຫັນຂອງບັນດາ​ຮາກ​ຖານ​ພັກ​ທີ່​ຂື້ກັບ​ອົງຄະ​ນະ​ພັກ​ກະຊວງ ຍທຂ ​ແລ​ະ ການປະກອບ​ຄໍາ​ຄິດຄໍາ​ເຫັນຂອງ​ຜູ້​ເຂົ້າ​ຮ່ວມ​ກອງ​ປະຊຸມ ​ແນ່​ໃສ່​ຕີ​ລາຄາ​ວຽກ​ງານ​ຈັດ​ຕັ້ງ, ກໍ່ສ້າງ​ພັກ-ພະນັກງານ ​ແລະ ວຽກ​ງານ​ປັບປຸງ​ກົງ​ຈັກ​ການຈັດ​ຕັ້ງ​ຂອງ​ກະຊວງ ຍທຂ ​ແລະ ທິດ​ທາງ​ວຽກ​ງານ​ໃນ 5 ປີ ຕໍ່ໜ້າ​ ເພື່ອຜັນ​ຂະຫຍາຍ​ເນື້ອ​ໃນ​ມະຕິ​ກອງ​ປະຊຸມ​ໃຫຍ່​ຄັ້ງທີ X ຂອງ​ພັກ, ມະຕິ​ກອງ​ປະຊຸມ​ໃຫຍ່​ ຄັ້ງ​ທີ IV ຂອງ​ອົງຄະ​ນະ​ພັກ​ກະຊວງ ຍທຂ ​ແລະ ມະຕິ​ກອງ​ປະຊຸມ​ໃຫຍ່​ຂອງ​ບັນດາ​ຮາກ​ຖານ​ພັກ, ໜ່ວຍ​ພັກ ​ໃຫ້​ປະກົດ​ຜົນ​ເປັນ​ຈິງ.​

      ​ແຕ່​ປີ 2011-2015 ຜານ​ມາການ​ເຄື່ອນ​ໄຫວ​ວຽກ​ງານ​ຈັດ​ຕັ້ງ, ກໍ່ສ້າງ​ພັກ-ພະນັກງານ ​ແລະ ວຽກ​ງານ​ປັບປຸງ​ກົງຈັກ​ການຈັດ​ຕັ້ງ​ຂອງ​ກະຊວງ​ ​ໂຍທາ​ທິການ ​ແລະ ຂົນ​ສົ່ງ ​​ໂດຍ​ພາຍ​ໃຕ້​ການ​ນຳພາ​-ຊີ້​ນຳຂອງຄະນະ​ພັກ​ກະຊວງ ​ໄດ້​ມີ​ຄວາມ​​ເຕີບ​ໃຫຍ່​ເຂັ້ມ​ແຂງ​ ຊຶ່ງ​ສະ​ແດງ​ອອກ​ໃນວຽກ​ງານ​ກໍ່ສ້າງ​ພັກ​ທາງ​ດ້ານ​ການ​ເມືອງ, ​ແນວ​ຄິດ, ດ້ານ​ການຈັດ​ຕັ້ງ, ດ້ານ​ແຜນ​ນຳພາ ​ແລະ ​ແບບ​ແຜນ​ວິທີ​ເຮັດ​ວຽກ, ວຽກ​ງານ​ພະນັກງານ ຄະນພັກ​ກະຊວງ, ຄະນະ​ພັກບັນດາ​ຮາກຖານ ​ໄດ້​ເອົາ​ໃຈ​ໃສ່ ການ​ຂື້ນ​ແຜນ​ກຳນົດ​ພະນັກງານ, ການ​ບຳລຸງ​ກໍ່ສ້າງ​ພະນັກງານ, ການ​ຄຸ້ມ​ຄອງ​, ປ້ອງ​ກັນ, ຈັດ​ວາງຊັບ​ຊ້ອນ​ພະນັກງານ​ ​ແລະ ການ​ປະຕິບັດ​ນະ​ໂຍບາຍພະນັກງານ​ໄດ້​ດີ​ສົມຄວນ, ວຽກ​ງານ​ການ​ປັບປຸງ​ກົງຈັກ​ການຈັດ​ຕັ້ງຂອງ​ກະຊວງ​ໄດ້​ດຳ​ເນີນ​ໄປຕາມ​ທິດ​ ກະທັດ​ຮັດສົມ​ເຫ​ດສົມ​ຜົນ, ມີ​ປະສິດທິ​ຜົນ. ​ແນ່​ໃສ່​ປະຕິບັດ​ໜ້າ​ທີ​ການ​ເມືອງຂອງ​ປະ​ຊວງ​ໃຫ້​ສຳ​ເລັດ​ຜົນ, ​ໄປ​ຄຽງຄູ່​ກັບ​ຜົນສຳ​ເລັດ​ກໍ່​ຍັງ​ມີ​ຈັດ​ອ່ອນ, ຂໍ້​ຄົງ​ຄ້າງ​ທີຄະ​ນະ​ພັກ, ສາມະ​ຊິກ​ພັກ, ພະນັກງານ ຕ້ອງ​ໄດ້​ຕັ້ງໜ້າ​ປັບປຸງ​ແກ້​ໄຂ​ໃຫ້​ດີ​ຂື້ນ.

      ພິ​ເສດກອງ​ປະຊຸມ​ຈະ​ໄດ້​ຕ້ອນຮັບ​ການ​ເຂົ້າ​ຮ່ວມ ​ຂອງ ສະຫາຍ ວັນ​ໄຊ ທອງ​ສະຫັວນ ຮອງ​ຫົວໜ້າ​ຄະນະ​ຈັດ​ຕັ້ງ​ສູນ​ກາງ​ພັກ ຊຶ່ງ​ຄຳ​ເຫັນ​​ໂອ້​ລົມດັ່ງກ່າວຈະ​ເປັນ​ເຂັມຊີ້​ທິດ​ເຍື່ອງ​ທາງ​ໃຫ້​ຄະນະ​ພັກ-ຄະນະ​ນຳ​ກະຊວງ, ຄະນະ​ພັກ​ບັນດາ​ຮາກ​ຖນ​ຕະຫຼອດ​ສາມະ​ຊິກ​ພັກ-ພະນັກງານ​ເພື່ອ​ເປັນ​ເຈົ້າ​ການ​ໃນ​ການ​ເຄື່ອນ​ໄຫວ​ວຽກ​ງານ​ຈັດ​ຕັ້ງ, ກໍ່ສ້າງ​ພັກ-ພະນັກງານ ​ແລະ ວຽກ​ງານ​ປັບປຸງ​ກົງຈັກ​ການຈັດ​ຕັ້ງ​ຂອງ​ກະຊວງ ​ແລະ ບັນດາ​ຮາກ​ຖານ ​ໃຫ້​ມີ​ຄວາມ​ໜັກ​ແໜ້ນ​ເຂັມ​ແຂງ.

      ກອງ​ປະຊຸ​ມ​ເຜີຍ​ແຜ່​ຜັນ​ຂະຫຍາ​ຍ​ເນື້ອ​ໃນ​ກອງ​ປະຊຸມວຽກ​ງານ​ຈັດ​ຕັ້ງ​ທົ່ວ​ປະ​ເທດ ຄັ້ງ​ທີ X ຂອງ​ກະຊວງ ​ໂຍທາ​ທິການ ​ແລະ ຂົນ​ສົ່ງ​ ຊຶ່ງ​ໄດ້​ດຳ​ເນີນ​ມາ​ເປັນ​ເວລາ 2 ວັນ​ເຕັມ​ໄດ້​ສຳ​ເລັດ​ຜົນຢ່າງ​ຈົບງາມ.

 

 

 

 

 

 

Additional information