ກອງປະຊຸມ ວຽກງານໂຍທາທິການ ແລະ ຂົນສົ່ງ ທົ່ວປະເທດ ປະຈຳປີ 2016 ໄດ້ປິດລົງຢ່າງຈົບງາມ.

  ກອງປະຊຸມ ໂຍທາທິການ ແລະ ຂົນສົ່ງ ທົ່ວປະເທດ ປະຈຳປີ 2016 ໄດ້ດຳເນີນມາແຕ່ວັນທີ 21-22 ກຸມພາ 2017 ກຳນົດເວລາ 2 ວັນ ແລະ ໄດ້ປິດລົງໃນຕອນບ່າຍ ຂອງວັນທີ 22 ກຸມພາ 2017 ນີ້ທີ່ຫໍ ປະຊຸມແຫ່ງຊາດ, ນະຄອນຫລວງວຽງຈັນ. ​ທ່ານ ປອ ບຸນຈັນ ສິນທະວົງ, ລັດຖະມົນຕີກະຊວງ ຍທຂ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ລາຍງາຍໂດຍຫຍໍ້ ກ່ຽວກັບຜົນສຳເລັດ ກໍຄືບັນຫາສຳຄັນ ຕ່າງໆ ທີ່ກອງປະຊຸມໄດ້ປຶກສາຫາລືກັນຕໍ່ ທ່ານ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດ ຖະມົນຕີ ແຫ່ງ ສປປ ລາວ ຊາບກ່ຽວກັບການຈັດຕັ້ງປະຕິບັດວຽກງານຂອງຂະແໜງ ຍທຂ, ພາຍໃຕ້ຫົວຂໍ້ “ ບຸກທະລຸການແກ້ໄຂບັນຫາຫຍໍ້ທໍ້ຂອງ ຂະແໜງການ ຍທຂ ຢ່າງເປັນລະບົບ”. ໂດຍສະເພາະແມ່ນ ການສະຫລຸບຕີລາຄາການຈັດຕັ້ງປະຕິບັດ ວຽກງານ ຍທຂ ທົ່ວປະເທດ ປີ 2015 ແລະ 2016 ຜ່ານມາ, ຕິດພັນກັບການສະຫລຸບລາຄາການ ຈັດຕັ້ງປະຕິບັດ ແກ້ໄຂບັນ ຫາຫຍໍ້ທໍ້ ຂອງຂະແໜງ ຍທຂ ມີທັງໝົດ 18 ບັນຫາ ແລະ ຄົ້ນຄ້ວາປະຕິ ບັດແຜນການປີ 2017.  ວິໃສທັດຮອດປີ 2030, ຍຸດທະສາດພັດ ທະນາຂະແໜງການ ຍທຂ 10 ປີ( 2016-2025) ແລະ ແຜນພັດທະນາຂະແໜງການ ຍທຂ 5 ປີ ( 2016-2020). ຜ່ານຮ່າງຄໍາສັ່ງວ່າ ດ້ວຍການຄຸ້ມຄອງຄຸນນະພາບ ແລະ ລາຄາກໍ່ສ້າງ-ສ້ອມແປງ ດ້ານໂຍທາທິການ ແລະ ຂົນສົ່ງ.

 ຜ່ານການຈັດຕັ້ງປະຕິບັດການແກ້ໄຂ 18 ບັນຫາຫຍໍ້ທໍ້ທີ່ພົ້ນເດັ່ນ ໃນໄລຍະ 2 ປີຜ່ານມາສາ ມາດສະ ຫລູບດ້ານພົ້ນເດັ່ນດັ່ງນີ້: ການກວດກາຄຸ້ມຄອງລາຄາຫົວໜ່ວຍການກໍ່ສ້າງ,  ໄດ້ກວດ ກາບັນດາໂຄງການ ກໍ່ສ້າງທາງ ແລະ ຂົວ, ເຊິ່ງສາມາດປະຍັດງົບປະມານໄດ້ ຫລາຍພັນຕື້ກີບ. ວຽກຄຸ້ມຄອງການຂົນສົ່ງ ໄດ້ແກ້ໄຂບັນຫາຄົງຄ້າງການພິມໃບທະບຽນ ແລະ ໃບຂັບຂີ່ ໃນທົ່ວ ປະເທດ ທີ່ຄ້າງມາແຕ່ປີ 2007 ຈຳນວນ 209.000 ໃບສຳເລັດ, ປະຈຸບັນສາມາດພິມໃບທະບຽນ ຖາວອນໄດ້ພາຍໃນ 2 ຊົ່ວໂມງ. ດ້ານ ການບິນພົນລະເຮືອນໄດ້ຮັບໃບຢັ້ງຢືນຈາກເລຂາທິການ ອົງການການບິນສາກົນໃນປີ 2016. ການແກ້ໄຂ ຄວາມແອອັດໃນນະຄອນຫລວງວຽງຈັນ, ໄດ້ມີຊ່ຽວຊານມາປະຈຳການແຕ່ເດືອນ 10/2016 ກຳລັງດຳ ເນີນການປະມູນເອົາທີ່ປຶກສາ ແລະ ບໍລິສັດຮັບເໝົາ, ເຊິ່ງຄາດວ່າຈະເລີ້ມຈັດຕັ້ງປະຕິບັດການກໍ່ສ້າງ ໂຄງການໃນເດືອນ 4/2018 ນີ້. ສຳລັບການແກ້ໄຂລົດຂົນສົ່ງບັນທຸກນ້ຳໜັກເກີນ ລັດຖະບານກໍໄດ້ ອະນຸມັດໃຫ້ຈັດຕັ້ງກວດການ້ຳໜັກເກີນ ຢູ່ 3 ຈຸດ ເພື່ອສ້າງຕັ້ງສະຖານີຕິດຊັ່ງນ້ຳໜັກແບບຖາວອນ ແລະ ທັນສະໄໝ.

  ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ກໍໄດ້ໃຫ້ກຽດໂອ້ລົມຕໍ່ກອງປະຊຸມ, ທ່ານໄດ້ສະແດງຄວາມຊົມເຊີຍຕໍ່ຜົນງານ ແລະ ຜົນສຳເລັດທີ່ຂະແໜງ ການ ຍທຂ ຍາດມາໄດ້ໃນໄລຍະຜ່ານມາ. ທ່ານໄດ້ຍົກໃຫ້ເຫັນເຖິ່ງສະພາບການພັດທະນາ ຂອງຂະແໜງການໂຍທາທິການ ແລະ ຂົນສົ່ງ ທັງໃນອາດີດ ແລະ ປະຈຸບັນ. ທ່ານກ່າວວ່າ ຂະແໜງການໂຍທາທິການ ແລະ ຂົນສົ່ງ ຍັງແມ່ນຂະແໜງການທີ່ເປັນປາຍແຫລມໃນການພັດທະນາ ປະເທດຊາດຂອງພວກເຮົາ. ການພັດທະນາຂະແໜງການໂຍທາທິການ ແລະ ຂົນສົ່ງ ຕ້ອງໃຫ້ມີບາດ ກ້າວໃໝ່ ໂດຍສະເພາະແມ່ນການຂົນສົ່ງທາງບົກເຊັ່ນວ່າທາງລົດໄຟ ແລະ ທາງລົດໂອໂຕ, ເພື່ອສ້າງໃຫ້ ປະເທດເຮົາກາຍເປັນປະເທດເຊື່ອມຈອດໃນພາກພື້ນ ແລະ ສາກົນ. ການສ້າງເສັ້ນທາງຢູ່ພາຍໃນກໍຕ້ອງ ໃຫ້ມີຈຸດສຸມ, ຕ້ອງເຮັດໃຫ້ມັນດີ, ໃຫ້ມີຄຸນນະພາບ, ເບິ່ງໃຫ້ມັນຄັກ, ຄິດໄລ່ໃຫ້ມັນຄັກ ໃຫ້ເປັນປະໂຫຍດ ຕໍ່ສວນລວມແທ້ໆ, ໂດຍສະເພາະແມ່ນການເຮັດເສັ້ນທາງແບບ BoT ນັ້ນໃຫ້ເບິ່ງຄັກໆ ຢ່າໃຫ້ມັນກະທົບໃສ່ການດຳລົງຊີວິດການເປັນຢູ່ຂອງປະຊາຊົນ, ບາງເທື່ອຄວນເຮັດໃຫ້ປະຊາຊົນມີທາງເລືອກເພື່ອຊົມໃຊ້ຕາມຄວາມອາດສາມາດຂອງເຂົາເຈົ້າ . ສຳລັບການຂົນສົ່ງທາງນ້ຳ ພວກເຮົາຄວນປົກປັກຮັກສາຄວາມເປັນທຳມະຊາດຂອງແມ່ ນ້ຳລຳຄອງໄວ້ ໂດຍສະເພາະແມ່ນແມ່ນ້ຳຂອງ ແລະ ແມ່ນ້ຳສາຂາ. ລະດູຝົນນ້ຳຫລາຍກໍມີຂອນໄມ້ ລະດູແລ້ງນ້ຳແຫ້ງກໍມີແກ້ງມີຕາດ ຖ້າບໍ່ເໝາະສົມໃນການຂົນສົ່ງທາງນ້ຳກໍບໍ່ຄວນຂະຫຍາຍ, ແຕ່ພວກເຮົາ ຄວນໄປພັດທະນາທ່າກຳປັນ ຢູ່ປະເທດເພື່ອບ້ານໃຫ້ເປັນທ່າກຳປັນຂອງລາວແທນ. ສຳລັບການຂົນສົ່ງ ທາງອາກາດນັ້ນ ທ່ານ ໄດ້ຍົກໃຫ້ເຫັນວ່າ ລາວເຮົາຍັງເປັນປະເທດທີ່ມີລະບົບການຂົນສົ່ງທາງອາກາດ ທີ່ອອ່ນນ້ອຍທີ່ສຸດໃນກຸ່ມປະເທດອາຊຽນ. ພວກເຮົາຈະຕ້ອງໄດ້ພ້ອມກັນສູ້ຊົນພັດທະນາຕົນເອງໃຫ້ຫລາຍ ຂຶ້ນຕຶ່ມອີກ ແລະ ສຳລັບດ້ານເຄຫາ ແລະ ຜັງເມືອງນັ້ນ ທ່ານກໍໄດ້ຮຽກຮ້ອງໃຫ້ພະນັກງານອາວຸດ ໂສບຳນານ, ຜູ້ເປັນອ້າຍເປັນລຸງທີ່ມີບົດຮຽນ ແລະ ມີປະສົບການຢູ່ທັງພາຍໃນ ແລະ ຕ່າງປະເທດ, ຖອດຖອນບົດຮຽນ ແລກປ່ຽນຄຳຄິດເຫັນໃຫ້ລຸ້ນນ້ອງ, ລຸ້ນລູກຫລາຍ ເພື່ອເຮັດແນວໃດໃຫ້ການວາງແຜນ, ການພັດທະນາດ້ານເຄຫາຜັງເມືອງຢູ່ປະເທດລາວເຮົາໃຫ້ມີທັງອັນເກົ່າທີ່ເປັນເອກະລັກຂອງລາວເຮົາ ປະສົມປະສານສອດຫອ້ຍກັບຍຸກສະໄໜ.

Additional information