ກອງປະຊຸມວຽກງານໂຍທາທິການ ແລະ ຂົນສົ່ງ ປະຈຳປີ 2016.

  ກອງປະຊຸມວຽກງານໂຍທາທິການ ແລະ ຂົນສົ່ງ ປີ 2016 ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 21/2/207 ທີ່ຫໍປະຊຸມແຫ່ງຊາດ ຫລັກ 6, ນະຄອນຫລວງວຽງຈັນ. ໂດຍການເປັນປະທານຂອງທ່ານ ປອ ບັນຈັນ ສິນທະວົງ ລັດຖະມົນຕີ ກະຊວງ ຍທຂ, ມີບັນດາທ່ານຮອງລັດຖະມົນຕີ, ຜູ້ຊ່ວຍລັດຖະມົນຕີ, ທີ່ປຶກສາລັດຖະມົນຕີ, ພະນັກງານອາວຸດໂສບຳນານ, ມີບັນດາທ່ານຮອງເຈົ້າແຂວງ, ທ່ານ​ຮອງ​ເຈົ້າ​ຄອງ​ນະຄອນຫລວງ​ວຽງ​ຈັນ, ບັນດາທ່ານຫົວໜ້າພະແນກ ຍທຂ ປະຈຳແຂວງ, ນະຄອນຫຼວງວຽງຈັນ ແລະ  ທ່ານຮອງເຈົ້າເມືອງ ໃນຂອບເຂດທົ່ວປະເທດ​, ມີບັນດາຫົວໜ່ວຍທຸລະກິດ, ບັນດາບໍລິສັດ, ລັດວິສາຫະກິດທັງພາກລັດ ແລະ ເອກະຊົນເຂົ້າຮ່ວມ. ນອກນີ້, ຍັງ​ມີບັນດາທ່ານຮອງ ລັດຖະມົນຕີ ຈາກ​​ບັນດາ​ກະຊວງຕາງ​ໆ​ເຂົ້າ​ຮ່ວມ.

  ກອງປະຊຸມ​ໃນ​ຄັ້ງ​ນີ້ ແມ່ນເພື່ອສະຫລຸບຕີລາຄາປະເມີນຜົນການຈັດຕັ້ງປະຕິບັດວຽກງານຂະແໜງ ຍທຂ ທົ່ວປະເທດ ປີ 2015 ແລະ 2016 ແລະ ວາງທິດທາງ​ແຜນພັດທະນາປະຈຳ​ປີ 2017 ຂອງຂະແໜງການໂຍທາທິການ ແລະຂົນສົ່ງ ແລະ ສັງລວມຄວາມຄືບໜ້າການແກ້ໄຂບັນຫາຄົງຄ້າງພົ້ນເດັ່ນ (18 ບັນຫາ) ຂອງຂະແໜງການ ຍທຂ. ນອກຈາກນັ້ນ, ກອງປະຊຸມຍັງຈະໄດ້ພ້ອມກັນຄົ້ນຄວ້າ ແລະ ປຶກສາຫາລື ປະກອບຄຳຄິດຄຳເຫັນໃສ່ບັນດາເອກະສານທີ່ສຳຄັນ ຈຳນວນໜຶ່ງຄື:

  1. ຮ່າງວິໄສທັດຮອດປີ 2030, ຍຸດທະສາດພັດທະນາຂະແໜງການ ຍທຂ 10 ປີ 2016- 2025 ແລະແຜນພັດ ທະນາຂະແໜງການ ຍທຂ 5 ປີ 2016-2020;
  2. ສະຫລຸບສັງລວມ ປະເມີນຜົນການຈັດຕັ້ງແກ້ໄຂບັນຫາຄົງຄ້າງທີ່ພົ້ນເດັ່ນ ທີ່ເກີດຂຶ້ນຢູ່  ຂະແໜງ ຍທຂ ຕາມກອງປະຊຸມປະຈຳປີ 2014 ສະຫລຸບຕີລາຄາທັງໝົດມີ 18 ບັນຫາ ມີ 36 ມາດຕະການແກ້ໄຂ.
  3. ຮ່າງຄໍາສັ່ງ ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງໂຄງການລົງທຶນຂອງລັດ ສໍາລັບການກໍ່ສ້າງ ແລະສ້ອມແປງພື້ນຖານໂຄງລ່າງ ຂອງຂະແໜງການໂຍທາທິການ ແລະຂົນສົ່ງ.

 ກອງປະຊຸມໂຍທາທິການ ແລະ ຂົນສົ່ງ ທົ່ວປະເທດຄັ້ງນີ້ ຈະດຳເນີນພາຍໃນ 2 ວັນເທົ່ານັ້ນ, ແຕ່ພັດມີຫລາຍ ເອກະສານສຳຄັນ ທີ່ຈະຕ້ອງພ້ອມກັນຄົ້ນຄວ້າ, ປຶກສາຫາລື ແລະ ປະກອບຄຳເຫັນ, ທ່ານ ປອ ບັນຈັນ ສິນທະວົງ, ລັດຖະມົນຕີ ກະຊວງ ຍທຂ ປະທານ​ກອງ​ປະຊຸມ ​ໄດ້ຮຽກຮ້ອງ​ໃຫ້ບັນດາທ່ານ ທີ່ເຂົ້າຮ່ວມກອງປະຊຸມທັງໝົດ ຈົ່ງພ້ອມ ກັນສຸມເຮື່ອແຮງ ສະຕິປັນຍາເຂົ້າໃນການຄົ້ນຄວ້າແຕ່ລະບັນຫາ ເພື່ອປະກອບຄໍາຄິດຄໍາເຫັນໃຫ້ເລິກເຊິ່ງ ມີເຫດມີຜົນ ແລະ ກົງໄປກົງມາ ເພື່ອເຮັດໃຫ້ກອງປະຊຸມ ຍທຂ ທົ່ວປະເທດ ປະຈຳປີ 2016 ຄັ້ງນີ້ ມີຜົນສຳເລັດຢ່າງຈົບງາມ ເປັນພື້ນຖານອັນໜັກ   ແໜ້ນໃຫ້ແກ່ຂະແໜງການ ຍທຂ ເພື່ອສາມາດນຳໄປຈັດຕັ້ງປະຕິບັດສອດຄ່ອງກັບສະພາບ ຕົວຈິງ ແລະບັນລຸຕາມຄາດໝາຍທີ່ວາງໄວ້ທຸກປະການ.

 ພິເສດ, ກອງປະຊຸມໃນຄັ້ງນີ້ ຍັງຈະໄດ້ຮັບກຽດອັນສູງຈາກທ່ານ ທອງລຸນ  ສີສຸລິດ, ກຳມະການກົມການເມືອງສູນກາງ ພັກ, ນາຍົກລັດຖະມົນຕີ, ທີ່ໄດ້ສະຫລະເວລາອັນມີຄຸນຄ່າເປັນກຽດມາໂອ້ລົມ ແລະ ໃຫ້ການຊີ້ນຳກອງປະຊຸມ ຍທຂ ທົ່ວປະເທດ ປະຈຳປີ 2016 ອີກດ້ວຍ.

 

Additional information