ຂ່າວພາຍໃນກະຊວງ

ກອງປະຊຸມເປີດກວ້າງເພື່ອປະກອບຄໍາເຫັນໃສ່ຮ່າງກົດໝາຍວ່າດ້ວຍຍານພາຫະນະທາງບົກ

 

 ກອງປະຊຸມເປີດກ້ວາງ ເພື່ອປະກອບຄຳເຫັນໃສ່ຮ່າງກົດໝາຍວ່າດ້ວຍຍານພາຫະນະທາງບົກ ໄດ້ຈັດຂື້ນໃນວັນທີ 1-3 ກໍ​ລະ​ກົດ 2020 ຢູ່ທີຫ້ອງປະຊຸມ ທະນາຄານການຄ້າ ແຂວງຫຼວງພະບາງ, ໂດຍການເປັນປະທານຂອງ ທ່ານ ສັນຕິສຸກ ສິມມາລາວົງ ຮອງລັດຖະມົນຕີກະຊວງ ຍທຂ ແລະ ທ່ານ ສຸກັນ ບຸນຍົງ ຮອງເຈົ້າແຂວງ ແຂວງຫຼວງພະບາງ; ມີບັນດາທ່ານຜູ້ຕາງໜ້າ ຫ້ອງວ່າການແຂວງ ພາກກາງ ແລະ ພາກເໜືອ, ບັນດາທ່ານຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ, ຜູ້ຕາງໜ້າຈາກກະຊວງ, ອົງການທຽບເທົ່າ, ບັນດາທ່ານ ຜູ້ຕາງໜ້າ ຈາກບັນດາພາກທຸລະກິດ ຍານພາຫະນະ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມ.

ກອງປະຊຸມເປີດກວ້າງເພື່ອປະກອບຄໍາເຫັນໃສ່ຮ່າງກົດໝາຍວ່າດ້ວຍຍານພາຫະນະທາງບົກ ແມ່ນ ໄດ້ກໍານົດຈັດຂຶ້ນຢູ່ສອງພາກ​ຄື: ສໍາລັບພາກກາງ ແລະ ພາກໃຕ້ ແມ່ນໄດ້ສໍາເລັດເປັນທີ່ຮຽບຮ້ອຍແລ້ວ ຊຶ່ງພາກສ່ວນທີ່ກ່ຽວຂ້ອງ ໄດ້ຈັດຂຶ້ນຢູ່ແຂວງ ສະຫວັນນະເຂດ ໃນລະຫວ່າງວັນທີ 24-26 ມິຖຸນາ 2020, ສຳ​ລັບແຂວງພາກເໜືອ ທາງຄະນະໄດ້ເລືອກເອົາແຂວງຫຼວງພະບາງ ເພາະວ່າເປັນແຂວງໃຈກາງຂອງພາກເໜືອ, ເຊຶ່ງກອງປະຊຸມໄດ້ດໍາເນີນເປັນເວລາ 3 ວັນ ນັບແຕ່ ວັນທີ 1-3 ກໍລະກົດ 2020.

 

 ປະຈຸບັນວຽກງານກ່ຽວກັບຍານພາຫະນະທາງບົກ ໄດ້ມີບາດກ້າວຂະຫຍາຍຕົວຢ່າງຕໍ່ເນື່ອງ ດ້ວຍທ່າກ້າວກະໂດດຂັ້ນເປັນຕົ້ນ ການນໍາເຂົ້າ, ການຜະລິດ, ການປະກອບ, ການຈໍາໜ່າຍ, ການຂຶ້ນທະບຽນ, ການນໍາໃຊ້ ແລະ ອື່ນໆ, ເນື່ອງຈາກວ່າຊີວິດການເປັນຢູ່ຂອງປະຊາຊົນລາວບັນດາເຜົ່າ ໄດ້ຮັບການປັບປຸງ, ເສດຖະກິດມີການຂະຫຍາຍຕົວ ສະນັ້ນ, ຄວາມຕ້ອງການນໍາໃຊ້ຍານພາຫະນະຈຶ່ງເພີ່ມຂຶ້ນໃນແຕ່ລະວັນ, ຈາກການເພີ່ມຂຶ້ນຂອງ ຍານພາຫະນະ ແນ່ນອນມັນຕ້ອງມີຂໍ້ດີ ແລະ ຂໍ້ເສັຍເປັນຕົ້ນການຄຸ້ມຄອງວຽກງານດັ່ງກ່າວ ຍັງເຮັດບໍ່ທັນໄດ້ດີເທົ່າທີ່ຄວນ ໂດຍສະເພາະການຄຸ້ມຄອງການນໍາເຂົ້າ, ການຂຶ້ນທະບຽນ, ການນໍາໃຊ້ ບໍ່ທັນມີຄວາມເປັນລະບຽບຮຽບຮ້ອຍ ແລະ ຮັດກຸມເທົ່າທີ່ຄວນ ເຮັດໃຫ້ມີຄວາມຫຍຸ້ງຍາກ, ເກີດມີຊ່ອງຫວ່າງຕ່າງໆ ແລະ ເຮັດໃຫ້ລັດເສຍລາຍຮັບ ເປັນຈໍານວນຫຼວງຫຼາຍ; ເນື່ອງຈາກວ່າ ຂະ​ແໜງ​ການພວກ​ເຮົາຍັງບໍ່ທັນມີກົດໝາຍ ເພື່ອຄຸ້ມຄອງວຽກງານດັ່ງກ່າວ, ມີແຕ່ລະບຽບການຈໍານວນໜຶ່ງ ທີ່ນໍາໃຊ້ເພື່ອເປັນເຄື່ອງມືເພື່ອຄຸ້ມຄອງ, ສະນັ້ນ ຈຶ່ງມີຄວາມຈໍາເປັນ ຕ້ອງໄດ້ສ້າງກົດໝາຍຂຶ້ນ ເພື່ອເປັນເຄື່ອງມືຄຸ້ມຄອງວຽກງານດັ່ງກ່າວ ໃຫ້ມີປະສິດທິພາບ, ປະສິດທິຜົນສູງ. ພາຍຫຼັງທີ່ກົດໝາຍສະບັບນີ້ໄດ້ຖຶກຮັບຮອງແລ້ວ ຈະເປັນເຄື່ອງມືອັນໜຶ່ງ ເພື່ອຄຸ້ມຄອງຫຼາຍວຽກ ກ່ຽວກັບວຽກງານຍານພາຫະນະ ເປັນຕົ້ນການຂຶ້ນທະບຽນ, ການເສຍຄ່າທໍານຽມທາງ, ການກວດກາເຕັກນິກ ແລະ ອື່ນໆ ຊຶ່ງພວກເຮົາຈະຕ້ອງໄດ້ສ້າງລະບຽບການລຸ່ມກົດໝາຍ ເພື່ອກໍານົດເປັນອັນລະອຽດ ແລະ ຈະເປັນເຄື່ອງມືເພື່ອຄຸ້ມຄອງວຽກງານ ເພື່ອປະກອບສ່ວນສ້າງລາຍຮັບເຂົ້າງົບປະມານ, ຮ່າງກົດໝາຍ ວ່າດ້ວຍຍານພາຫະນະທາງບົກ ກະຊວງ ໂຍທາທິການ ແລະ ຂົນສົ່ງ ໄດ້ແຕ່ງຕັ້ງຄະນະຮັບຜິດຊອບຊີ້ນໍາ ແລະ ອະນຸກໍາມະການເນື້ອໃນ ແລະ ໄດ້ຮ່າງສໍາເລັດໂດຍພື້ນຖານ.

 

 ກອງປະຊຸມໄດ້ ເຊີດຊູຄວາມຮັບຜິດຊອບຂອງຕົນ  ເຂົ້າໃນການຄົ້ນຄ້ວາ ປະກອບຄໍາຄິດຄໍາເຫັນໃຫ້ເລິກເຊິ່ງ, ມີເຫດມີຜົນ, ກົງໄປກົງມາ ແລະ ແທດເໝາະກັບຄວາມເປັນຈິງ ເພື່ອເຮັດໃຫ້ຮ່າງກົດໝາຍສະບັບນີ້ ອຸດົມສົມບູນໄປດ້ວຍເນື້ອໃນ ແລະ ເພື່ອເປັນພື້ນຖານ ໃຫ້ແກ່ການຄຸ້ມຄອງ, ກວດກາ ກ່ຽວກັບວຽກງານຍານພາຫະນະທາງບົກ.

 

 

ກອງປະຊຸມປຶກສາຫາລື ລາຄາຫົວໜ່ວຍການຂົນສົ່ງໂດຍສານປະຈຳທາງ

ກອງປະຊຸມ ຜ່ານລາຄາຫົວໜ່ວຍການຂົນສົ່ງໂດຍສານປະຈໍາທາງ, ໄດ້ຈັດຂື້ນໃນວັນທີ 19 ມິຖຸນາ 2020 ທີ່ຫ້ອງປະຊຸມໃຫຍ່ກະຊວງ ຍທຂ, ໂດຍການເປັນປະທານ ຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ, ມີຫົວໜ້າຫ້ອງການ, ຫົວໜ້າກົມ, ຮອງ​ຫົວ​ໜ້າກົມ; ຫົວໜ້າ ແລະ ຮອງຫົວໜ້າພະແນກ ຍທຂ ນະຄອນຫຼວງ ແລະ ແຂວງໃນທົ່ວປະເທດ, ຕາງໜ້າໃຫ້ພາກສ່ວນຕ່າງໆ ຈາກສູນກາງ, ຜູ້ຕາງໜ້າໃຫ້ຜູ້ປະກອບການຂົນສົ່ງໂດຍສານ ແລະ ສະຖານີຂົນສົ່ງໂດຍສານ ຈາກທົ່ວປະເທດ ແລະ ພາກສ່ວນທີ່ກ່ຽວຂ້ອງກັບວຽກງານຂົນສົ່ງ ໄດ້ໃຫ້ກຽດເຂົ້າຮ່ວມ.

ກອງປະຊຸມປຶກສາຫາລື ລາຄາຫົວໜ່ວຍການຂົນສົ່ງໂດຍສານປະຈຳທາງ ຊຶ່ງເປັນວຽກງານໜຶ່ງທີ່ສຳຄັນ ແລະ ຮີບດ່ວນ ຂອງກະຊວງ ຍທຂ ຊຶ່ງລັດຖະບານໄດ້ຊີ້ນຳໃຫ້ການຂົນສົ່ງຕ້ອງຂຸ້ນຂ້ຽວປັບປຸງເພື່ອສະເໜີໃຫ້ ລັດຖະບານພິຈາລະນາຮັບຮອງໂດຍໄວ, ໄລຍະຜ່ານມາຮອດປັດຈຸບັນ ພວກເຮົາໄດ້ນຳໃຊ້ລາຄາຫົວ ໜ່ວຍທີ່ໄດ້ປັບປຸງຫລ້າສຸດໃນປີ 2011 ຊຶ່ງເຫັນວ່າມີຄວາມສະຫງົບດີ, ຜູ້ປະກອບການຂົນສົ່ງ ໂດຍສານ ແລະ ຜູ້ໂດຍສານ ສາມາດຮັບໄດ້. ເຖິງແມ່ນວ່າລາຄານ້ຳມັນ, ຄ່າຄອງຊີບ ແລະ ອັດ ຕາເງິນເຟີ້ຈະຂຶ້ນ ຫລື ລົງ ເທົ່າໃດພວກເຮົາກໍບໍ່ໄດ້ເພີ່ມ ຫລື ຫລຸດ ຄ່າຂົນສົ່ງໂດຍສານແຕ່ຢ່າງໃດ. ໃນຕົວຈິງສ່ວນຫລາຍຄ່າຄອງຊີບແມ່ນມີແຕ່ຂຶ້ນເປັນສ່ວນໃຫຍ່. ເຖິງຢ່າງໃດກໍຕາມ, ຍັງມີຫາງສຽງສັງຄົມລວມທັງອົງການລັດເຮົາຈຳນວນໜຶ່ງ ທີ່ຂັດຂ້ອງ ຢາກໃຫ້ຫລຸດຄ່າໂດຍສານ ຍາມໃດທີ່ລາຄານ້ຳມັນ ຫລຸດພຽງເລັກໜ້ອຍ ແລະ ໄລຍະສັ້ນໆ. ກົງກັນຂ້າມ, ຍາມໃດທີ່ລາຄາ ນ້ຳມັນຂຶ້ນຜູ້ປະກອບການ ຂົນສົ່ງໂດຍສານບໍ່ໄດ້ຮຽກຮ້ອງໃຫ້ຂຶ້ນລາຄາແຕ່ຢ່າງໃດ, ອັນນີ້ ຂ້າພະເຈົ້າຂໍຊົມເຊີຍນ້ຳໃຈເສຍສະຫລະຂອງບັນດາຜູ້ປະກອບການ. ໃນຕົວຈິງແລ້ວ, ປັດໄຈ ແລະ ຕົວແປ ທີ່ມີຜົນກະທົບຕໍ່ການຄິດໄລ່ລາຄາຫົວ   ໜ່ວຍການຂົນສົ່ງໂດຍສານ ບໍ່ມີພຽງແຕ່ຄ່ານ້ຳມັນ ແຕ່ມີອີກຫລາຍອັນປະກອບເຂົ້າໃນໂຄງສ້າງລາຄາ. ປັດຈຸບັນ, ໃນສະພາບ ທີ່ເສດຖະກິດ, ຄ່າຄອງຊີບ, ລາຄາສິນຄ້າຕ່າງໆ ມີການເໜັງຕິງຫລາຍ ມັນຈຶ່ງຮຽກຮ້ອງໃຫ້ພວກເຮົາຈຳເປັນຕ້ອງ ໄດ້ປັບປຸງລາຄາຫົວໜ່ວຍໃຫ້ສອດຄ່ອງ ແລະ ແທດເໝາະກັບສະພາບຕົວຈິງ ເພື່ອຮັບປະກັນ ໃຫ້ມີຄວາມເປັນທຳ ແລະ ຍຸຕິທຳ ຕໍ່ທັງຜູ້ປະກອບການຂົນສົ່ງ ແລະ ຜູ້ຊົມໃຊ້.

ຈຸດປະສົງ ຂອງກອງປະຊຸມໃນມື້ນີ້ແມ່ນເພື່ອ: ປຶກສາຫາລື ຜ່ານລາຄາຫົວໜ່ວຍສະບັບປັບປຸງ ໂດຍການເອກະພາບຕໍ່ບັນດາສຳປະສິດ,​ ຕົວແປ, ປັດໄຈ ຕ່າງໆ ທີ່ຈະປ້ອນເຂົ້າສູດຄິດໄລ່ໂຄງສ້າງລາຄາ; ກຳນົດຫລັກການໃນການ ເພີ່ມ ຫລື ຫລຸດ ຄ່າຂົນສົ່ງໂດຍສານປະຈຳທາງ, ຍາມໃດຈຶ່ງ ສາມາດຂຶ້ນ ແລະ ຍາມໃດຈຶ່ງສາມາດລົງ ເອົາອັນໃດເປັນບ່ອນອີງ; ແລະ ສຸດທ້າຍແມ່ນຮັບຮອງ ເພື່ອສະເໜີຕໍ່ລັດຖະບານພິຈາລະນາຕໍ່ໄປ.

ກອງປະຊຸມໃນຄັ້ງນີ້ໄດ້ປຶກສາຫາລື ປະກອບຄຳຄິດຄຳເຫັນ ຍົກເຫດຜົນ ແລະ ສຸດທ້າຍ ສາມາດ ຕົກລົງ ເຫັນດີເປັນເອກະພາບ ໂດຍພື້ນຖານ ຕໍ່ລາຄາຫົວໜ່ວຍການຂົນສົ່ງໂດຍສານ ປະຈຳທາງ ທີ່ໄດ້ປັບປຸງຄືນໃໝ່. ສາມາດຕີລາຄາສູງຕໍ່ຄວາມພະຍາຍາມ ຂອງກອງ, ເລຂາ ແລະ ທຸກທ່ານ ທຸກສະຫາຍ ໂດຍສະເພາະບັນດາຜູ້ປະກອບການທີ່ໄດ້ປະກອບສ່ວນ ສະໜອງຂໍ້ມູນໃນພາກປະຕິບັດຕົວຈິງ ເຮັດໃຫ້ການຄິດໄລ່ລາຄາຫົວໜ່ວຍ ໃນຄັ້ງນີ້ມີຄວາມຊັດເຈນ ແລະ ແທດເໝາະກັບສະພາບຄວາມເປັນຈິງ, ສຳລັບປັດໄຈສຳຄັນຄື ການນຳໃຊ້ລົດມືສອງ ຍັງເຫັນວ່າມີຄວາມຈຳເປັນ ແລະ ເໝາະສົມກັບ ສະພາບເສດຖະກິດ ແລະ ໂຄງລ່າງເສັ້ນທາງພວກເຮົາໃນປັດຈຸບັນ. ເຖິງແມ່ນວ່າຈະໃຊ້ລົດມືສອງ ແຕ່ຂໍໃຫ້ບັນດາຜູ້ປະກອບການເພີ່ມທະວິຄວາມເຂັ້ມງວດ ແລະ ເອົາໃຈໃສ່ກວດກາເຕັກນິກລົດຂອງຕົນໃຫ້ຕາມກຳນົດຄືຢູ່ບັນດາປະເທດທີ່ພັດທະນາແລ້ວ, ເພາະຖ້າຫາກວ່າພວກເຮົາຈະບັງຄັບໃຫ້ໃຊ້ລົດໃໝ່ 100% ຈະເຮັດໃຫ້ຕົ້ນທຶນສູງຂຶ້ນ ຄ່າໂດຍສານແພງຂຶ້ນ ແນ່ນອນຕ້ອງມີຜົນກະທົບຕໍ່ຜູ້ຊົມໃຊ້ ຊຶ່ງເຫັນວ່າບໍ່ຄວນເຮັດໃນຍາມທີ່ພວກເຮົາຍັງຢູ່ໃນໄລຍະວິກິດແບບນີ້. ພາຍຫລັງທີ່ລັດຖະບານຮັບຮອງແລ້ວ ພວກເຮົາຈະນຳໃຊ້ ແລະ ຖ້າຫາກເຫັນວ່າ ບໍ່ທັນສົມບູນ ເຮົາກໍສາມາດສະເໜີປັບປຸງຄືນໃໝ່ອີກ. ສະນັ້ນ, ຈຶ່ງຂໍໃຫ້ບັນດາຜູ້ປະກອບການ ຈົ່ງທຸ່ນທ່ຽງ ແລະ ພ້ອມພຽງກັນຈັດຕັ້ງປະຕິບັດ ແລະ ເມື່ອພົບເຫັນບັນຫາ ຫລືຄວາມຫຍຸ້ງຍາກແນວໃດ ກໍຂໍໃຫ້ແຈ້ງຕໍ່ພາກສ່ວນທີ່ຮັບຜິດຊອບຄືນ ເພື່ອຮ່ວມກັນຄົ້ນຄ້ວາຕໍ່ໄປ. ເຖິງຢ່າງໃດກໍຕາມ, ພວກເຮົາຈະສູ້ຊົນ ສະເໜີໃຫ້ລັດຖະບານເຂົ້າໃຈ ແລະ ໃຫ້ນະໂຍບາຍທີ່ເໝາະສົມຕໍ່ຜູ້ປະກອບການ, ຈາກນີ້ໄປ, ພວກເຮົາຈະຮີບຮ້ອນສັງລວມ ແລະ ລາຍງານລັດຖະບານ ເພື່ອພິຈາລະນາຮັບຮອງ ແລະ ປະກາດໃຊ້ລາຄາຫົວໜ່ວຍໃໝ່ໂດຍໄວ.

ກອງປະຊຸມເປີດກວ້າງເພື່ອປະກອບຄໍາເຫັນ ໃສ່ຮ່າງກົດໝາຍ ວ່າດ້ວຍຍານພາຫະນະທາງບົກ

ກອງປະຊຸມເປີດກ້ວາງ ເພື່ອປະກອບຄຳເຫັນໃສ່ຮ່າງກົດໝາຍວ່າດ້ວຍຍານພາຫະນະທາງບົກ ໄດ້ຈັດຂື້ນໃນວັນທີ 24-26 ມິຖຸນາ 2020 ຢູ່ແຂວງສະຫວັນນະເຂດ, ໂດຍການເປັນປະທານຂອງ ທ່ານ ສັນຕິສຸກ ສິມມາລາວົງ ຮອງລັດຖະມົນຕີກະຊວງ ຍທຂ ແລະ ທ່ານ ໂພ​ໄຊ ໄຊ​ຍະ​ສອນ ຮອງເຈົ້າແຂວງແຂວງສະຫວັນນະເຂດ; ມີບັນດາທ່ານຜູ້ຕາງໜ້າ ຫ້ອງວ່າການແຂວງ ພາກກາງ ແລະ ພາກໃຕ້, ມີບັນດາທ່ານ ຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ, ຜູ້ຕາງໜ້າຈາກກະຊວງ, ອົງການທຽບເທົ່າ, ບັນດາທ່ານ ຜູ້ຕາງໜ້າ ຈາກບັນດາພາກທຸລະກິດ ຍານພາຫະນະ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມ.

ກອງປະຊຸມໃນຄັ້ງນີ້, ​ເພື່ອປະກອບຄໍາຄິດຄໍາເຫັນ ໃສ່ຮ່າງກົດ​ໝາຍວ່າດ້ວຍຍານພາຫະນະທາງບົກ, ຊຶ່ງ​ຮ່າງ​ກົດ​ໝາຍ​ສະ​ບັບ​ນີ້ ຈະເປັນກົດໝາຍສ້າງໃໝ່ ທີ່ມີຄວາມສຳຄັນຫລາຍ ທັງເປັນຄວາມຮຽກຮ້ອງຕ້ອງການຂອງ ເສດຖະກິດ ແລະ ສັງຄົມ ໃນປະຈຸບັນ ຕາມແຜນແມ່ນ ຈະເອົາເຂົ້າຜ່ານກອງປະຊຸມ ສະໄໝສາມັນ ຄັ້ງທີ 10 ຂອງສະພາແຫ່ງຊາດຊຸດທີ VIII ເດືອນ 11/2020, ໂດຍປະຕິບັດຕາມຂັ້ນຕອນ ແລະ ລະບຽບການຜ່ານຮ່າງກົດໝາຍ ກອງປະຊຸມເປີດກວ້າງ ພວກເຮົາໄດ້ກໍານົດຈັດຂຶ້ນຢູ່ສອງພາກ, ສໍາລັບພາກກາງ ແລະ ພາກໃຕ້ ແມ່ນຈັດຂຶ້ນຢູ່ແຂວງ ສະວັນນະເຂດ ໃນລະຫວ່າງວັນທີ 24-26 ມິຖຸນາ 2020 ແລະ ພາກເໜືອ ຈະຈັດຂຶ້ນ ໃນລະຫວ່າງວັນທີ 1-3 ກໍລະກົດ 2020 ທີ່ແຂວງ ຫຼວງພະບາງ.

ປະຈຸບັນ ວຽກງານກ່ຽວກັບຍານພາຫະນະໄດ້ມີບາດກ້າວຂະຫຍາຍຕົວຢ່າງກະໂດດ ເປັນຕົ້ນການນໍາເຂົ້າ, ການຜະລິດ, ການປະກອບ, ການຈໍາໜ່າຍ, ການຂຶ້ນທະບຽນ, ການນໍາໃຊ້ ແລະ ອື່ນໆ ແຕ່ການຄຸ້ມຄອງວຽກງານດັ່ງກ່າວ ຍັງບໍ່ທັນມີຄວາມເປັນລະບຽບຮຽບຮ້ອຍ ແລະ ຮັດກຸມເທົ່າທີ່ຄວນ ເຮັດໃຫ້ມີຄວາມຫຍຸ້ງຍາກ ແລະ ເຮັດໃຫ້ລັດເສຍລາຍຮັບ ເປັນຈໍານວນຫຼວງຫຼາຍ ເນື່ອງຈາກວ່າ ພວກເຮົາຍັງບໍ່ທັນມີກົດໝາຍ ເພື່ອຄຸ້ມຄອງວຽກງານດັ່ງກ່າວ, ມີແຕ່ລະບຽບການຈໍານວນໜຶ່ງ ທີ່ນໍາໃຊ້ເພື່ອເປັນເຄື່ອງມືເພື່ອຄຸ້ມຄອງ, ສະນັ້ນ ຈຶ່ງມີຄວາມຈໍາເປັນສ້າງກົດໝາຍວ່າດ້ວຍຍານພາຫະນະຂຶ້ນ ເພື່ອເປັນເຄື່ອງມືຄຸ້ມຄອງວຽກງານດັ່ງກ່າວ ໃຫ້ມີປະສິດທິພາບ, ປະສິດທິຜົນສູງ. ພາຍຫຼັງທີ່ກົດໝາຍສະບັບນີ້ໄດ້ຖືກຮັບຮອງແລ້ວ ຈະເປັນເຄື່ອງມືອັນໜຶ່ງ ເພື່ອຄຸ້ມຄອງຫຼາຍວຽກ ກ່ຽວກັບວຽກງານຍານພາຫະນະ ເປັນຕົ້ນການຂຶ້ນທະບຽນ, ການເສຍຄ່າທໍານຽມທາງ, ການກວດກາເຕັກນິກ ແລະ ອື່ນໆ ຊຶ່ງຈະເປັນການປະກອບສ່ວນສ້າງລາຍຮັບເຂົ້າງົບປະມານເປັນຈໍານວນຫຼວງຫຼາຍ, ກົດໝາຍວ່າດ້ວຍຍານພາຫະນະທາງບົກ ກະຊວງ ໂຍທາທິການ ແລະ ຂົນສົ່ງ ໄດ້ຮ່າງສໍາເລັດໂດຍພື້ນຖານເປັນທີ່ຮຽບຮ້ອຍແລ້ວ.  ກອງປະຊຸມຄັ້ງນີ້ເພື່ອເປີດກ້ວາງ ປະກອບຄໍາຄິດຄໍາເຫັນ ໃສ່ຮ່າງກົດໝາຍສະບັບນີ້ ໃຫ້ອຸດົມສົມບູນ ໄປດ້ວຍເນື້ອໃນ, ຫຼັງຈາກນັ້ນຈະໄດ້ນໍາເອົາຄໍາສະເໜີ ແລະ ການປະກອບຄໍາຄິດຄໍາເຫັນ ຈາກທຸກພາກສ່ວນ ໄປພິຈາລະນາ ເພື່ອປັບປຸງໃຫ້ເປັນອັນລະອຽດ, ຄົບຖ້ວນ ແລະ ສົມບູນ, ແທດເໝາະກັບການຂະຫຍາຍຕົວທາງດ້ານເສດຖະກິດ ໃນປະຈຸບັນ ແລະ ເຊື່ອມໂຍງກັບສາກົນ. ເພື່ອເຮັດໃຫ້ກອງປະຊຸມຄັ້ງນີ້ ປະສົບຜົນສໍາເລັດ ແລະ ເຮັດໃຫ້ຮ່າງກົດ​ໝາຍ​ສະ​ບັບດັ່ງກ່າວມີເນື້ອໃນຄົບຖ້ວນ ແລະ ສົມບູນ. ດັ່ງ​ນັ້ນ​, ຈິ່ງ​ຮຽກ​ຮ້ອງມາຍັງບັນດາທ່ານ ທີ່ເຂົ້າຮ່ວມກອງປະຊຸມໝົດທຸກທ່ານ ຈົ່ງພ້ອມກັນສຸມສະຕິປັນຍາ, ເຫື່ອແຮງ, ຄວາມຮູ້ຄວາມສາມາດ ຂອງຕົນເອງ ແລະ ຮັບຜິດຊອບສູງ ເຂົ້າໃນການຄົ້ນຄ້ວາ ປະກອບຄໍາຄິດຄໍາເຫັນໃຫ້ເລິກເຊິ່ງ, ມີເຫດມີຜົນ, ກົງໄປກົງມາ ແລະ ແທດເໝາະກັບຄວາມເປັນຈິງ ເພື່ອເຮັດໃຫ້ຮ່າງກົດ​ໝາຍສະບັບນີ້ ອຸດົມສົມບູນໄປດ້ວຍນເນື້ອໃນ ແລະ ເພື່ອເປັນພື້ນຖານ ໃຫ້ແກ່ການຄຸ້ມຄອງ, ກວດກາ ກ່ຽວກັບວຽກງານຍານພາຫະນະທາງບົກ.

ກອງປະຊຸມທົບທວນກາງສະໄໝ ຄັ້ງທີ 1 ກ່ຽວກັບ ການຈັດຕັ້ງປະຕິບັດແຜນຍຸດທະສາດຂົນສົ່ງກົວລາລໍາເປີ 2016-2025 (1st Task Force Meeting on Mid-term Review of Kuala Lumpur Transport Strategic Plan 2016-2025) ແລະ ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນ ຄັ້ງທີ 49 (49th ASEAN

ໃນລະຫວ່າງວັນທີ 16 ຫາ 17 ມິຖຸນາ 2020, ທີ່ ກະຊວງໂຍທາທິການ ແລະ ຂົນສົ່ງ, ນະຄອນຫລວງ ວຽງຈັນ, ທ່ານ ແສງດາລິດ ກັດຕິຍະສັກ, ຫົວໜ້າຄະນະເຈົ້າໜ້າທີ່ອາວຸຂົນສົ່ງອາຊຽນ ຂອງ ສປປ ລາວ, ຫົວໜ້າກົມແຜນການ ແລະ ການຮ່ວມມື, ພ້ອມດ້ວຍບັນດາຫົວໜ້າ ຫ້ອງການກະຊວງ, ກົມຂົວທາງ, ຂົນສົ່ງ, ການບິນພົນລະເຮືອນ, ທາງລົດໄຟ, ທາງນໍ້າ, ນິຕິກຳ ແລະ ເຄຫາ-ຜັງເມືອງ ໄດ້ເຂົ້າຮ່ວມກອງ ກອງປະຊຸມທົບທວນກາງສະໄໝ ຄັ້ງທີ 1 ກ່ຽວກັບ ການຈັດຕັ້ງປະຕິບັດແຜນຍຸດທະສາດຂົນສົ່ງກົວລາລໍາເປີ 2016-2025 ແລະ ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນ ຄັ້ງທີ 49 ພາຍໃຕ້ການເປັນ ປະທານປີ 2020 ຂອງ ປະເທດ ບຣູໄນດາຣຸດສະລາມ, ເຊິ່ງມີບັນດາຫົວໜ້າເຈົ້າໜ້າທີ່ອາວຸໂສຂົນສົ່ງຈາກ ປະເທດສະມາຊິກອາຊຽນ ພ້ອມຄະນະເຂົ້າຮ່ວມຢ່າງພ້ອມພຽງດ້ວຍຮູບແບບປະຊຸມທາງໄກ.

 

 ໃນວັນທີ 16 ມິຖຸນາ 2020, ກອງປະຊຸມທົບທວນກາງສະໄໝ ຄັ້ງທີ 1 ກ່ຽວກັບ ການຈັດຕັ້ງປະຕິບັດແຜນຍຸດທະສາດຂົນສົ່ງກົວລາລໍາເປີ 2016-2025 ໄດ້ມີການຜ່ານຜົນການປະເມີນຄວາມຄືບໜ້າຂອງການປະຕິບັດ 5 ຂົງເຂດເປົ້າໝາຍຍຸດທະສາດ (Strategic Areas), ປະກອບມີ: (1) ຂົນສົ່ງທາງອາ ກາດ (Air Transport), (2) ຂົນສົ່ງທາງບົກ (Land Transport), (3) ຂົນສົ່ງທາງນໍ້າ ແລະ ທາງທະ ເລ (Maritime Transport), (4) ຂົນສົ່ງແບບຍືນຍົງ (Sustainable Transport) ແລະ (5) ການອຳ ນວຍຄວາມສະດວກດ້ານການຂົນສົ່ງ, ເຊິ່ງໃນນັ້ນຍັງປະກອບດ້ວຍ 29 ເປົ້າໝາຍສະເພາະ (Specific Goals) ແລະ 128 ແຜນງານຍ່ອຍ (Milestones).

 

 ການປະເມີນໄດ້ສຸມໃສ່ຕິດຕາມຄວາມຄືບໜ້າໂດຍຜ່ານການໃຫ້ຄະແນນ ແລະ ຄາດຄະເນຜົນໄດ້ຮັບ ສຳລັບຊ່ວງໄລຍະ ແຕ່ ປີ 2016 ເຖິງ ເດືອນ ມີນາ 2020. ຂົງເຂດເປົ້າໝາຍຍຸດທະສາດທີ່ມີຄວາມຄືບ ໜ້າດີແມ່ນ ຂົງເຂດຂົນສົ່ງແບບຍືນຍົງ 3.77 ຈາກ 5 ຄະແນນ, ການຂົນສົ່ງທາງນໍ້າ ແລະ ທາງທະເລ 3.69 ຄະແນນ ແລະ ຂົນສົ່ງທາງອາກາດ 3.23 ຄະແນນ.

 

 ໃນວັນທີ 17 ມິຖຸນາ 2020, ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນ ຄັ້ງທີ 49 ໄດ້ປຶກສາຫາລືໃນ ຫລາຍຫົວຂໍ້ສຳຄັນ, ເປັນຕົ້ນແມ່ນ: (1) ການຜັນຂະຫຍາຍຜົນຂອງບັນດາກອງປະຊຸມລັດຖະມົນຕີອາຊຽນ, (2) ຜົນຂອງການປະເມີນກາງສະໄໝ ກ່ຽວກັບ ການຈັດຕັ້ງປະຕິບັດແຜນຍຸດທະສາດຂົນສົ່ງກົວລາລໍາເປີ 2016-2025 ແລະ ແຜນງານບູລິມະສິດຂອງປີ 2020, (3) ປຶກສາຫາລືມາດຕະການຮັບມື ແລະ ແຜນ ຟື້ນຟູຈາກຜົນກະທົບຈາກພະຍາດລະບາດ COVID-19, ແລະ (4) ການຮ່ວມມື ລະຫວ່າງ ອາຊຽນ ແລະ ຄູ່ເຈລະຈາສະຫະພາບເອີຣົບໃນຂົງເຂດການຂົນສົ່ງທາງອາກາດ.

 

 ໃນວາລະປຶກສາຫາລືແລກປ່ຽນ ກ່ຽວກັບ ມາດຕະການຂອງບັນດາປະເທດສະມາຊິກເພື່ອຮັບປະກັນ ໃຫ້ການເຊື່ອມຈອດຕ່ອງໂສ້ການຜະລິດສືບຕໍ່ໄດ້ໃນຊ່ວງ COVID-19 ແລະ ແນວທາງຟື້ນຟູຂອງຂະແໜງ ຂົນສົ່ງຈາກພະຍາດລະບາດ COVID-19, ສໍາມະຊິກອາຊຽນແຕ່ລະປະເທດໄດ້ແລກປ່ຽນນະໂຍບາຍ ແລະ ແຜນການເພື່ອປ້ອງການການແຜ່ລະບາດຂອງ COVID 19, ກອງເລຂາອາຊຽນໄດ້ສະເໜີຂໍ້ລິເລີ່ມໃນການແລກປ່ຽນຂໍ້ມູນຂ່າວສານຂອງບັນດາປະເທດອາຊຽນເພື່ອສະໜັບສະໜູນການຟື້ນຟູວຽກງານການຂົນ່ສົ່ງຂອງແຕ່ລະປະເທດ ແລະ ຮັກສາສະຖຽງລະພາບການເຊືືອມຈອດພາຍໃນພາກພື້ນ ແລະ ສາກົນ. ພ້ອມກັນນັ້ນກອງເລຂາອາຊຽນກໍ່ໄດ້ສະເໜີແຜນການເພື່ອຮັບມື້ກັບການແຜ່ລະບາດຂອງCOVID-19 ໃນຕໍ່ໜ້າຂອງພາກພື້ນອາຊຽນ (1).ເອົາໃຈໃສ່ຂະບວນການກັບຄືນສູ່ສະພາບປົກກະຕິ ໃຫ້ສາມາດລຸດຜ່ອນຜົນກະທົບຈາກການຕິດເຊື້ອໃນບັນດາຈຸດເຊື່ອມຕໍ່ຕ່າງໆທີ່ປາຍທາງ, ສູນກາງ ແລະ ພາຫະນະຂົນສົ່ງທັງໝົດ. (2).ມີກົນໄກປະເມີນ ແລະ ພິຈາລະນາຄືນໃຫມ່ ເພື່ອໃຫ້ຮັບປະກັນປະສິດທິພາບ ແລະ ປະສິດທິຜົນຂອງການດໍາເນີນຂະບວນການກັບຄືນສູ່ສະພາບປົກກະຕິ. (3).ແລກປ່ຽນບົດຮຽນທີ່ປະສົບຜົນສໍາເລັດຮ່ວມກັນລະຫວ່າງບັນດາປະເທດອາຊຽນ. (4).ນໍາໃຊ້ລະບົບທີ່ທັນສະໄໝເຂົ້າໃນການພັດທະນາການຄົມມະນາຄົມໃນພາກພື້ນຜ່ານທາງມືຖື. (5).ຍົກສູງຄວາມຮັບຜິດຊອບຂອງບັນປະເທດອາຊຽນໃນການອໍານວຍຄວາມສະດວກໃຫ້ແກ່ການຄົມມະນາຄົມ ແລະ ການເຊື່ອມໂຍງເຊື່ອມຈອດ.

 

ທ່ານ ແສງດາລິດ ກັດຕິຍະສັກ, ໄດ້ມີຄໍາເຫັນຕໍ່ກອງປະຊຸມ, ໂດຍໄດ້ກ່າວໃນບາງຕອນສຳຄັນວ່າ: “ໃນສະຖານະການທີ່ບັນດາປະເທດສະມາຊິກອາຊຽນ, ໂດຍສະເພາະ ຂະແໜງການຂົນສົ່ງຂອງພວກເຮົາ ພົບບັນຫາສິ່ທ້າທາຍຈາກພະຍາດລະບາດ COVID-19, ຖ້າບັນດາ ປະເທດສະມາຊິກ ແລະ ຄູ່ເຈລະຈາຮ່ວມມືເປັນຈິດໜຶ່ງໃຈດຽວກັນ ມັນກໍ່ມີກາລະໂອກາດ ແລະ ທ່າແຮງ ບົ່ມຊ້ອນສໍາລັບຂະແໜງຂົນສົ່ງ, ເປັນຕົ້ນແມ່ນ (1) ການຈັດສັນກອງທຶນພິເສດເພື່ອໃຫ້ປະເທດສະມາຊິກ ເຂົ້າເຖິງດອກເບ້ຍຜ່ອນຜັນ ສຳລັບ ໂຄງການປັບປຸງ, ສ້ອມແປງ ແລະ ພັດທະນາພື້ນຖານໂຄງລ່າງເພື່ອ ຊ່ວຍຫລຸດຜ່ອນພາລະງົບປະມານຂອງລັດຖະບານທີ່ຖືກຈໍາກັດອັນເປັນຜົນມາຈາກ ພະຍາດລະບາດ COVID-19, ແລະ (2) ພັດທະນາໂຄງການພື້ນຖານໂຄງລ່າງຂົນສົ່ງແບບລວມສູນ ແລະ ມີສ່ວນຮ່ວມ ສົ່ງເສີມ ຂະແໜງການເສດຖະກິດປິ່ນອ້ອມ, ເຊັ່ນ: ທ່ອງທ່ຽວ, ການຄ້າ ແລະ ກະຊິກຳ ໃນຮູບແບບແລວ ທາງເສດຖະກິດ, ເຊິ່ງປັດຈຸບັນ ກະຊວງໂຍທາທິການ ແລະ ຂົນສົ່ງ ກຳລັງເຮັດວຽກກັບທະນາຄານໂລກ ແລະ ທະນາຄານການລົງທຶນໂຄງລ່າງພື້ນຖານອາຊີ ໃນການຍາດແຍ່ງເອົາກາລະໂອກາດດັ່ງກ່າວ”

ໃນຕອນບ່າຍຂອງວັນທີ 17 ມິຖຸນາ 2020, ກອງປະຊຸມຮອບພິເສດຂອງເຈົ້າໜ້າທີ່ອາວຸໂສຂົນສົ່ງອາຊຽນ ແລະ ສປ ຈີນ, ໄດ້ປຶກສາຫາລືສິ່ງທ້າທາຍຈາກການແຜ່ລະບາດຂອງພະຍາດ COVID-19 ແລະ ແລກ ປ່ຽນບົດຮຽນມາດຕະການຂອງຂະແໜງການຂົນສົ່ງ ສປ ຈີນ ໃນການຕອບໂຕ້ ແລະ ຮັບມືກັບການແຜ່ ລະບາດດັ່ງກ່າວ.

Additional information