ຂ່າວ

ຝຶກອົບຮົມການຮັບມືຕໍ່ການປ່ຽນແປງສະພາບດິນຟ້າອາກາດ ສຳລັບໂຄງລ່າງເສັ້ນທາງ

ໃນ​ປະ​ຈຸ​ບັນ, ບັນ​ດາ​ເສັ້ນ​ທາງ​ຊົນ​ນະ​ບົດ ແມ່ນ​ມີ​ຄວາມ​ສ່ຽງ​ສູງ ຈາກ​ໄພ​ຂົມ​ຂູ່​ຂອງ​ການ​ປ່ຽນ​ແປງ​ສະ​ພາບ​ອາ​ກາດ ເຊັ່ນ ດິນ​ເຈື່ອນ, ນ້ຳ​ສຸ​ໄຫຼ​ແຮງ, ນ້ຳ​ຖ້ວມ, ພະ​ຍຸ ແລະ ອື່ນໆ ຊື່ງ​ບັນ​ດາ​ເສັ້ນ​ທາງ​ເລົ່າ​ນັ້ນ ໄດ້​ກໍ່​ສ້າງ​ໂດຍ​ງົບ​ປະ​ມານ​ທີ່​ຈຳ​ກັດ ແລະ ນຳ​ໃຊ້​ເຕັກ​ນິກ​ທີ່ບໍ່​ສາ​ມາດ​ຕ້ານ​ທານ​ກັບ​ການ​ປ່ຽນ​ແປງ​ສະ​ພາບ​ອາ​ກາດ ໄດ້ສ້າງ​ຜົນ​ກະ​ທົບ ແລະ ຜົນ​ເສຍ​ຫາຍ​ອັນ​ໃຫ​ຍ່ຫຼວງ​ຕໍ່​ເສັ້ນ​ທາງ​ຊົນ​ນະ​ບົດ. ກະຊວງໂຍທາທິການ ແລະ ຂົນສົ່ງ (ກະຊວງ ຍທຂ)  ໃນ​ນາມ​ຜູ້​ເປັນ​ເຈົ້າ​ການ ໃນ​ການກໍ່​ສ້າງ ແລະ ບູ​ລະ​ນະ​ຮັກ​ສາ​ເສັ້ນ​ທາງ ແມ່ນ​ເຫັນ​ໄດ້​ຄວາມ​ສຳ​ຄັນ​ດັ່ງ​ກ່າວ ແລະ ຈື່ງໄດ້​ຖື​​ເອົາ​ການ​ຮັບ​ມື/ການ​ຕ້ານ​ທານ ​ຕໍ່​ການ​ປ່ຽນ​ແປງ​ສະ​ພາບ​ອາ​ກາດເປັນ​ບູ​ລິ​ມະ​ສິດ​ທີ່​ສຳ​ຄັນ.

ສະຖາບັນຝຶກອົບຮົມ ໂຍທາທິການ ແລະ ຂົນສົ່ງ (ສຝຍຂ) ແມ່ນມີໜ້າທີ່ເປັນເສນາທິການ ໃຫ້ແກ່ກະຊວງ ໂຍທາ ທິການ ແລະ ຂົນສົ່ງ (ກະຊວງ ຍທຂ) ເປັນເຈົ້າການ ໃນການຈັດຝຶກອົບຮົມ ໃຫ້ແກ່ພະນັກງານວິຊາການຂະແໜງ ຍທຂ ໃນຂອບເຂດທົ່ວປະເທດ. ສະ​ຖາ​ບັນ​ຝຶກ​ອົບ​ຮົມ ໂຍ​ທາ​ທິ​ການ ແລະ ຂົນ​ສົ່ງ ​ໄດ້​ຖືກມອບ​ໝາຍ​ຈາກກະ​ຊວງ ໂຍ​ທາ​ທິ​ການ ແລະ ຂົນ​ສົ່ງ, ທີ່​ເຫັນ​ຄວາມ​ສຳ​ຄັນ​ໃນ​ການ​ຈັດ ​ຝຶກ​ອົບ​ຮົມ​ຫົວ​ຂໍ້: ການຮັບມືຕໍ່ການປ່ຽນແປງສະພາບດິນຟ້າ ອາກາດສຳລັບໂຄງລ່າງເສັ້ນທາງ ໃຫ້​ແກ່​ພະ​ນັກ​ງານ​ວິ​ຊາ​ການ​ທີ່​ພວມ​ເຮັດ​ວຽກ​ກ່ຽວ​ກັບ​ເສັ້ນ​ທາງ. ການຝຶກອົບຮົມ ຫົວຂໍ້ດັ່ງ​ກ່າວ ແມ່ນຄວາມຕ້ອງການຕົວຈິງຂອງພະນັກງານວິຊາການໃນຂະແໜງ ຍທຂ ໂດຍສະເພາະຜູ້ທີ່ເຮັດວຽກ ກ່ຽວກັບເສັ້ນທາງ. ສຝຍຂ ໄດ້ເອົາໃຈໃສ່ຢ່າງຕັ້ງໜ້າໃນການສ້າງເນື້ອໃນຫຼັກສູດຝຶກອົບຮົມ ໃຫ້ແທດເໝາະກັບ ຄວາມຮັບຮູ້ ແລະ ຄວາມຕ້ອງການທາງດ້ານວິຊາການ ຂອງພະນັກງານ. ບັນດາບົດຮຽນທີ່ຈະນຳໃຊ້ເຂົ້າໃນການຝຶກ ອົບຮົມ ແມ່ນໄດ້ກະກຽມໂດຍຊ່ຽວຊານຕ່າງປະເທດ ພາຍໄຕ້ ໂຄງການ RIP 6 ແລະ ຈາກ​ປະ​ສົບ​ການ​ຕົວ​ຈິງ​ຂອງ​ຄູ​ຝຶກ​ພາຍ​ໃນ ກະ​ຊວງ ຍ​ທ​ຂ, ເຊີ່ງເອກະສານແມ່ນໄດ້ພັດທະນາຂື້ນໂດຍອີງໃສ່ຄວາມເໝາະສົມ ແລະ ຄວາມຕ້ອງການ ຂອງແຕ່ລະ ລະດັບວິຊາການ.  

​​ຝຶກ​ອົບ​ຮົມການຮັບມືຕໍ່ການປ່ຽນແປງສະພາບດິນຟ້າອາກາດສຳລັບໂຄງລ່າງເສັ້ນທາງ, ທີ່ສະຖາບັນຝຶກອົບຮົມ ໂຍທາ ທິການ ແລະ ຂົນສົ່ງ, ລະຫວ່າງວັນທີ 19-23 ກຸມພາ 2018 ໄດ້​ຈັດ​ຂື້ນ​ພາຍ​ໃຕ້ການ​ເປັນ​ປະ​ທານຂອງ  ທ່ານ ປອ ສັນຕິສຸກ ສິມມາລາວົງ   ຮອງລັດຖະມົນຕີ ກະຊວງ ຍທຂ ເຊີ່ງ​ມີ​ຜູ້​ເຂົ້າ​ຮ່ວມ​ຈາກ ກົມຂົວທາງ, ສະຖາບັນຝຶກອົບຮົມ ຍທຂ, ພະແນກ ຍທຂ 9 ແຂວງ ແລະ 1 ນະຄອນຫຼວງວຽງຈັນ ລວມທັງ​ໝົດ 25 ທ່ານ. ​ການ​ຝຶກ​ອົບ​ຮົມ​ໃນ​ຄັ້ງ​ນີ້ ແມ່ນ​ຈະ​ເຮັດ​ໃຫ້ຜູ້​ເຂົ້າ​ຮ່ວມ ເຂົ້າໃຈແຈ້ງກ່ຽວກັບຫລັກການໃນການຮັບມືຕໍ່ການປ່ຽນແປງສະພາບດິນຟ້າອາກາດ; ສາ​ມາດຄຸ້ມຄອງ ເຫດການຕ່າງໆ ຈາກສະພາບດິນຟ້າອາກາດ ຕໍ່ການກໍ່ສ້າງ ແລະ ສ້ອມແປງເສັ້ນທາງ; ການຕີລາຄາ ແລະ ສຶກສາເບີ່ງທາງເລືອກ: ວິທີທາງເລືອກ ໃນການປ້ອງກັນຕໍ່ການປ່ຽນແປງດິນຟ້າອາກາດສຳຫລັບການກໍ່ສ້າງ ແລະ ສ້ອມແປງເສັ້ນທາງ;ການອອກແບບທາງເລືອກໃນການຮັບມືຄວາມສ່ຽງສຳຫລັບການກໍ່ສ້າງ ແລະ ສ້ອມແປງເສັ້ນທາງ; ການກໍ່ສ້າງ ແລະ ສ້ອມແປງຈຸດທີ່ມີຄວາມສ່ຽງຈາກສະພາບດິນຟ້າອາກາດ.

ກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ແກ່ພະນັກງານທີ່ເຮັດວຽກແຜນການຂອງ ຂະແໜງ ຍທຂ ປະຈຳປີ 2017

ໃນຕອນເຊົ້າເວລາ 8:30 ໂມງ ຂອງວັນທີ 13 ກຸມພາ 2018 ຢູ່ທີ່ສູນຝຶກແນວລາວສ້າງຊາດ ໄດ້ມີພິທີເປີດຝຶກອົບຮົມ ສ້າງຄວາມເຂັ້ມແຂງໃຫ້ແກ່ພະນັກງານທີ່ເຮັດວຽກແຜນການຂອງ ຂະແໜງ ຍທຂ ປະຈຳປີ 2017 ຂຶ້ນຢ່າງເປັນ ທາງ ການ ໃຫ້ກຽດເປັນປະທານນຳໂດຍ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ ມີນັກສຳມະນາ ກອນທີ່ມາຈາກບັນດາ ກົມ, ກອງສະຖາບັນອ້ອມຂ້າງກະຊວງ ແລະ  ພະແນກ ຍທຂ ແຂວງ ທົ່ວປະເທດ ແລະ ນະຄອນຫຼວງວຽງຈັນ ເຂົ້າຮ່ວມ ທັງໝົດ 117 ທ່ານ, ຍິງ 35 ທ່ານ

ກອງປະຊຸມດັ່ງກ່າວຈະໄດ້ດຳເນີນໄປເປັນເວລາ 3 ວັນຄື ວັນທີ 13, 14, 15 ຂອງເດືອນ ກຸມພາປີ 2018 ແລະ ຈະໄດ້ຮັບຟັງການເຜີຍແຜ່ກົດໝາຍວ່າດ້ວຍການລົງທຶນຂອງລັດ, ວິໄສທັດຮອດປີ 2030 ແລະ ຍຸດທະສາດການ ພັດ ທະນາ 2016-2025, ແຜນການ 5 ປີ 2016-2020 ຂອງຂະແໜງການ ຍທຂ, ນັກສຳມະນາກອນຍັງໄດ້ຮ່າງບົດ ສະຫຼຸບການຈັດຕັ້ງປະຕິບັດແຜນການປີ 2017 ຂອງກະຊວງ ຍທຂ ພ້ອມກັນນີ້ນັກສຳມານາກອນຍັງໄດ້ເຮັດກິດຈະ ກຳຕ່າງໆ ແລະ ສົນທະນາຖາມຕອບແລກປ່ຽນບົດຮຽນເຊິ່ງກັນ ແລະ ກັນ.

ໃນໂອກາດນີ້ທ່ານ ວຽງສະຫວັດ ສີພັນດອນ, ຮອງລັດຖະມົນຕີ ກະຊວງ ຍທຂ ໄດ້ຮຽກຮ້ອງໃຫ້ນັກສຳມະນາກອນ ທັງໝົດຈົ່ງຕັ້ງໜ້າປະກອບຄຳຄິດຄຳເຫັນ ແລະ ກຳແໜ້ນວຽກງານແຜນການຢ່າງໜັກແໜ້ນ ພ້ອມກັນສ້າງຄວາມເຂັ້ມ ແຂງໃຫ້ແກ່ຂະແໜງການ ຍທຂ ໃນການຈັດຕັ້ງປະຕິບັດວຽກງານຂອງຕົນໃຫ້ມີປະສິດທິຜົນສູງສຸດ.

 

ກວດແກ້ໂດຍ ທ່ານ ແສງຈັນ ຫອມສີລາຮັກ

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

 

ກອງປະຊຸມສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ແລະ ແຜນການ 2 ປີ ( 2018-2019 ) ຂອງໜ່ວຍພັກຮາກຖານ ກົມການບິນພົນລະເຮືອນ

ໃນຕອນເຊົ້າວັນທີ 16 ກຸມພາ 2018 ຢູ່ທີ່ຫ້ອງປະຊຸມ ກົມການບິນພົນລະເຮືອນ ໄດ້ຈັດກອງປະຊຸມສະຫລຸບ ຕີລາຄາ ການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IV ຂອງກົມການບິນພົນລະເຮືອນ ຂື້ນ ກອງໃຫ້ກຽດເປັນປະທານ ໂດຍ ສະຫາຍ ປອ. ສັນຕິສຸກ ສິມມາລາວົງ ຄະນະປະຈຳພັກ, ຮອງ ລັດຖະມົນຕີ ກະຊວງ ຍທຂ, ມີສະຫາຍ ວັນເພັງ ຈັນທະພອນ, ຄະນະພັກກະຊວງ, ເລຂາໜ່ວຍພັກຮາກຖານ ກົມການບິນພົນລະເຮືອນ, ຫົວໜ້າກົມການບິນພົນລະ ເຮືອນ, ມີສະຫາຍ ປອ. ສົມພອນ ດວງດາລາ, ຄະນະພັກກະຊວງ, ເລຂາໜ່ວຍພັກລັດວິສາຫະກິດການບິນລາວ, ມີ ບັນດາຄະນະພັກຮາກຖານ, ບັນດາໜ່ວຍພັກຮາກຖານ ແລະ ພະນັກງານສະມາຊິກພັກ ເຂົ້າຮ່ວມ ຈຳນວນ 29 ສະຫາຍ ຍິງ 4 ສະຫາຍ.

ກອງປະຊຸມໄດ້ຮັບຟັງການລາຍງານບົດສະຫລຸບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ແລະ ແຜນການ 2 ປີ ( 2018-2019 ) ຈາກນັ້ນກອງປະຊຸມໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳ ຂອງສະຫາຍ ປອ. ສັນຕິສຸກ ສິມມາລາວົງ ຄະນະປະຈຳພັກ, ຮອງລັດຖະມົນຕີ ກະຊວງ ຍທຂ ໂດຍສະຫາຍໄດ້ເນັ້ນໜັກໃຫ້ ເພີ່ມທະວີເອົາໃຈໃສ່ ສຶກສາວຽກງານການເມືອງ-ແນວຄິດ ໃຫ້ພະນັກງານ-ສະມາຊິກພັກ ຂອງຕົນຢ່າງເປັນປົກກະຕິ, ໜັ້ກແໜ້ນ ແລະ ເລິກເຊິ່ງ,​ ໃຫ້ຖືເອົາວຽກງານນີ້ເປັນກົກ ເພື່ອສ້າງຄວາມເຂົ້າໃຈ ແລະ ເປັນເອກະພາບກັນໃນຖັນແຖວພະນັກງານ ສະມາຊິກພັກໃນການຊີ້ນຳ ແລະ ນຳພາຮອບດ້ານ ຕໍ່ຂະແໜງການບິນພົນລະເຮືອນ ປະຕິບັດແນວທາງນະໂຍບາຍ ຂອງພັກໄປຕາມລວງດຽວກັນ.

ສຸມໃສ່​ປັບປຸງ​ຄືນ​ບັນດາ​ຂໍ້​ຕົກຄ້າງ​ຕ່າງໆ ທັງ​ວຽກ​ງານ​ຄຸ້ມ​ຄອງ​ບໍລິຫານ ​ແລະ ວຽກ​ເຕັກ​ນີກວິຊາ​ການ,​ ​ໂດຍ​ສະ​ເພາະ​ແມ່ນ​ບັນດາ, ນິຕິ​ກຳ ​ແລະ ລະບຽບ​ການ​ຕ່າງໆ​ໃຫ້​ມີ​ຄວາມ​ສອດ​ຄ່ອງຕາມ​ມາດຕະຖານ ​ແລະ​ຂໍ້​ແນະນຳ​ຂອງ​ອົງການ​ການ​ບີນພົນລະ​ເຮືອນ​ສາກົນ, ​ເອົາ​ໃຈ​ໃສ່​ສ້າງ ​ແລະ ຍົກ​ລະ​ດັບ​ຄວາມ​ຮູ້​ຄວາມ​ສາມາດ​ໃຫ້​ແກ່​ພະນັກງານ​ວິຊາ​ການ​ດ້ານ​ຕ່າງໆ ​ໃຫ້​ໄດ້​ຕາມ​ແຜນການ, ພ້ອມ​ກັນ​ນັ້ນກໍ່​ໃຫ້​ຄົ້ນ​ຄ້ວາ-​ສ້າງ​ພະນັກງານ​ນຳພາ-​ຄຸ້ມ​ຄອງ​ລຸ້ນສືບ​ທອດໃຫ້ມີ ປະສິດທິພາບ.

ສະຫາຍ ໄດ້ຮຽກຮ້ອງໃຫ້ພະນັກງານສະມາຊິກພັກເປັນແບບຢ່າງທີ່ດີໃນການນຳພາ ປະຕິບັດໜ້າທີ່ວຽກງານເພື່ອ ​ແກ້​ໄຂ​ໃຫ້​ໄດ້​ບັນດາ​ປະກົດ​ການ​ຫຍໍ້​ທໍ້​ເດັດດ່ຽວ​ຕ້ານ​ແນວ​ຄິດ​ສວຍ​ໃຊ້​ໜ້າ​ທີ່​ຕຳ​ແໜ່​ງ ຫາ​ຜົນ​ປະ​ໂຫຍ​ດສ່ວນ​ຕົວ; ກະທຳ​ຜີ​ດລະບຽບ-​ກົດໝາຍ, ​ເຫີ​ນຫ່າງ​ມະຫາຊົນ.

ສູ້​ຊົນ​ສ້າງ​ໃຫ້​ວຽກ​ງານ​ການ​ຂົນ​ສົ່ງ​ທາງ​ອາກາດ ມີ​ຄວາມ​ເຂັ້ມ​ແຂງ ​ແລະ ​ເຊື່ອມ​ໂຍງ​ເພື່ອ​ຮອງ​ຮັບ​ການ​ຂະຫຍາຍຕົວ​ຂອງ​ອຸດສາຫະກຳ​ການ​ບີນ​ໃນ​ຍຸກ​ປະຈຸ​ບັນ ​ແລະ ສາມາດ​ຕອບ​ສະໜອງ​ໄດ້​ທຸກ​ເງື່ອນ​ໄຂ​ຂອງ​ການ​ຫັນ​ເປັນ​ຕະຫຼາດ​ການ​ບີນດຽວ​ຂອງ​ອາ​ຊຽນ.

ໃນໂອກາດນີ້ສະຫາຍ ປອ. ສັນຕິສຸກ ສິມມາລາວົງ ຄະນະປະຈຳພັກ, ຮອງ ລັດຖະມົນຕີ ກະຊວງ ຍທຂ ໄດ້ກ່າວ ຊົມເຊີຍ ຄະນະໜ່ວຍພັກຮາກຖານ ກົມການບິນພົນລະເຮືອນ ທີ່ໄດ້ເອົາໃຈໃສ່ໃນການຈັດຕັ້ງຜັນຂະຫຍາຍມະຕິ ກອງປະຊຸມໃຫຍ່ ຄັ້ງທີ IV ຂອງຕົນຢ່າງຕັ້ງໜ້າດ້ວຍຄວາມຮັບຜິດຊອບສູງ ເຊິ່ງເຮັດໃຫ້ມີຜົນສຳເລັດອັນໃຫຍ່ຫຼວງ ໄດ້ປະກອບສ່ວນເຂົ້າໃນການສ້າງສາພັດທະນາປະເທດຊາດໃຫ້ຈະເລີນຮຸ່ງເຮີນໃນອະນາຄົດ.

 

ກວດແກ້ໂດຍ ທ່ານ ແສງຈັນ ຫອມສີລາຮັກ

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

 

 

 

 

 

 

ພິທີມອບ-ຮັບ ແລະ ເປີດນຳໃຊ້ ຂົວມິດຕະພາບ ລາວ-ຍີ່ປຸ່ນ ແຂວງເຊກອງ

          ຕອນເຊົ້າ ວັນທີ 12 ກຸມພາ 2018  ໄດ້ມີ ພິທີ​ມອບ-ຮັບ ແລະ ເປີດນຳໃຊ້ ຂົວມິດຕະພາບ ລາວ-ຍີ່ປຸ່ນ ຢ່າງ ເປັນທາງການ ທີ່ແຂວງເຊກອງ ໂດຍເປັນກຽດເຂົ້າຮ່ວມ ທ່ານ ປອ. ບຸນທອງ ຈິດມະນີ, ກໍາມະການກົມການເມືອງ ສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ; ທ່ານ ປອ. ບຸນຈັນ ສິນທະວົງ, ກຳມະການສູນກາງພັກ, ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ; ທ່ານ ປອ. ສຸພັນ ແກ້ວມີໄຊ ກຳມະການສູນກາງພັກ, ລັດຖະມົນຕີ ກະຊວງ ແຜນການ-ການລົງທຶນ; ທ່ານ ທາເຄຊິ ຮິຄິຮາຮະ, ເອກອັກຄະລາຊະທູດຍີ່ປຸ່ນ ປະຈຳ ສປປ ລາວ; ທ່ານ ຄໍາເຜີຍ ບຸດດາວຽງ ເຈົ້າແຂວງ ແຂວງເຊກອງ, ບັນດາເຈົ້າແຂວງ, ບັນດາທ່ານຫົວໜ້າຫ້ອງການ, ບັນດາຫົວໜ້າ ກົມ, ຮອງກົມ, ສະຖາບັນ,​ ກອງ; ທ່ານ ໂຍຊິຮາຮຸ ໂຢເນະຮາມະ ຫົວໜ້າຫ້ອງການ ໄຈກາ ປະຈຳລາວ, ບັນດາທ່ານ ການນຳຈາກ ສູນກາງ, ການນຳຂອງແຂວງ, ເມືອງ ພ້ອມດ້ວຍ​ພະນັກງານ-ວິຊາ​ການສອງ​ຝ່າຍ​ເຂົ້າ​ຮ່ວມ.

         ໂຄງການກໍ່ສ້າງ ຂົວມິດຕະພາບ ລາວ-ຍີ່ປຸ່ນ ແຂວງເຊກອງ ຕັ້ງຕາມເສັ້ນທາງຫຼວງແຫ່ງຊາດ 16B ພາກໃຕ້ ຂອງລາວ ໄດ້ຈັດຕັ້ງປະຕິບັດມາເແຕ່ ວັນທີ 4 ພະຈິກ 2014 ຫາ 31 ມີນາ 2018, ໂດຍແມ່ນ ກົມຂົວທາງ, ກະຊວງ ໂຍທາທິການ ແລະ ຂົນສົ່ງ ສປປ ລາວ ເປັນເຈົ້າຂອງໂຄງການ, ບໍລິສັດ ເຊັນໂທຣ ເປັນທີ່ປຶກສາ, ບໍລິສັດ ໄທເຊ ຄັອບເປີເຣເຊີນ ເປັນຜູ້ຮັບເໝົາ, ໂຄງການດັ່ງກ່າວນີ້ ແມ່ນ ໄດ້ຮັບທຶນສະໜັບສະໜູນ ​ໂດຍການຊ່ວຍເຫຼືອລ້າ​ຈາກ ລັດຖະບານຍີ່ປຸ່ນ ມີມູນຄ່າທັງໝົດແມ່ນ 159,7 ຕື້ກີບ(2,2 ຕື້ເຢັນ ຫຼື 21,4 ລ້ານໂດລາສະຫະລັດ).

      ຂົວດັ່າງກ່າວ ເປັນປະເພດຂົວປະສົມ ລະຫວ່າງ ສາຍກາບ ກັບເບຕົງ ມີ 4 ຊ່ວງ, ມີຄວາມຍາວທັງໝົດ 300 ແມັດ, ໜ້າຂົວ 8 ແມັດ, ລວງກວ້າງທັງໝົດ 11,8~14,0 ແມັດ, ໂຄງສ້າງສ່ວນລຸ່ມ ເປັນຮາກຖານຕອກເສົາເຂັມ ເປັນມົນໄຂ່ ຮາກຖານແຜ່ ແຕ່ລະເສົາມີລວງສູງ A1=6.8ແມັດ, P1=14.7 ແມັດ, P2=23.5 ແມັດ, P3=24.5 ແມັດ, A2=7.9 ແມັດ, ທາງເຂົ້າຂົວ ເບື້ອງຕົວເມືອງເຊກອງຍາວ 227 ແມັດ ແລະ ເບື້ອງຕົວເມືອງດາກຈຶງຍາວ 300 ແມັດ ລວມຄວາມຍາວທາງເຂົ້າຂົວ ມີທັງໝົດ 527 ແມັດ.

     ຂົວມິດຕະພາບ ລາວ-ຍີ່ປຸ່ນ ແຂວງເຊກອງ ແມ່ນມີຄວາມສຳຄັນຫຼາຍຕໍ່ການດຳລົງຊີວິດຂອງປະຊາຊົນ ແລະ ຊຸມຊົນ ໃນຂົງເຂດນີ້ ທີ່ສາມາດເຂົ້າເຖິງຕະຫຼາດ ແລະ ການບໍລິການດ້ານສັງຄົມທີ່ດີຂື້ນ ເປັນຕົ້ນ ແມ່ນ ການສຶກສາ ແລະ ສາທາລະນະສຸກ, ຂົວແຫ່ງນີ້ ຈະກາຍເປັນສ່ວນໜຶ່ງທີ່ສຳຄັນໃນການເຂົ້າຫາທ່າເຮືອດານັງ ໃນອະນາຄົດອີກ ດ້ວຍ.

 

ກວດແກ້ໂດຍ ທ່ານ ແສງຈັນ ຫອມສີລາຮັກ

ຂຽນຂ່າວໂດຍ ທ່ານ ແກ້ວມະໂນ ສິງສຸລິຍາ

 

 

 

 

Additional information